Muinter cennansa erraid deoraid ro edpair ard camma .i. baile ui uidrín co na muiliund & co na herund uili, & baile ui comgain cona herund uili & cona muiliund, do dia & do cholum cilli & dond epscop uí cellaig do senoir fer midi uili, & do maelmaire uí robartaig, do chind in disirt .i. hi teirt id. nouimir, la feili martain .i. in bliadhain at báthatar bai herenn & a mucca. Itteat inso na maithe ro edpratar .i. Muiredach ua clucain abb cennansa conanign ua breslen in sacart guaere ua clucain in ferlegind aed mac mic rechtacan in fosairchennech fiad laichaibh mathib imdaib .i. i fiadnaise tigernán uí ruairc rig fer breibne uile & gafraid ui regelluig (.i. ri macaire gaileng) & ade ui egra & fiad maccaib uí ruairc .i. donnchad & sittriucc ro edparthea dan na da baile sen .i. luigne connacht.
Disiurt cennannsa, do deoradaib craibdechaib do gres. Cipé tra laech no clerech ti in agid in cintisea bid esconte hé o colum cille & fhinán, & óclerchib herenn, óndh eclais cristaide co coitchenn.