Sex aetates sunt mundi, id est ó Ádam co dílinn in chétna æs, ó dílinn co Abrám ind æs tánaisi, ó Abrám co Dauíd in tres æs &c.
De Babilonia hoc carmen.
{folio 43vb}
- Babilóin ro-clos h-i céin,
dind ro-chumtaig Nín mac Béil
ar sír-ecla slait na slóg,
cathir dírecra dímór.- Cethrochair in chathir chain,
dona flathib fót n-ortain,
súairc solus, sét co n-glaine,
co cét n-dorus n-umaide.- Sesca mór-míli immacúaird,
rob hé a tomus, nirbu dúairc,
do chémendaib uird ellaig
ar rémendaib ro-thennaib.
- Cóica cubat tigi a m-múir,
annsa a thogail do nach dúil,
dá cét cubat, comul n-glé,
súas i n-aér i nh-airdde.- Fichi cetharríad, cóem dúib,
talldais for mulluch a m-múir,
gním cen nach cleith cumuing lib,
etir dá sreith do thigib.- Ní dernad ríam tíar nó thair
etir selbaib síl Ádaim,
foclaim, ar is cangen chóir,
dún dangen mar Babilóin.Babil.
- Tic sruth n-Éofrait dar a lár,
de bæ gléo-throit is gléo-dál,
conde roforbad a fóir
is ro-toglad Babilóin.Babil.
- Do-dechaid Cír lín a slúaig
dochum in t-srotha ruitrúaid,
ro scáil, ro fadail 'masech,
co m-ba sét soraid soinmech.- Luiditar tría bríg m-brotha
innund for slicht in t-srotha
co dorus in tigi móir
i m-bái in rí 'sin Babilóin.Babilóin.
- Íar sin ro-airg cathraig Nín
cona rígraid, cona ríg,
Ballasair, ba h-ardd a blad,
robo mac do Negussar.- Negussar co lúathi a h-ech,
mac-side Labudsardech,
Labudsardach crúaid i cath
ba mac Euilmoradach.- Euilmoradach fodéin
ba mac Nabcodoin nár féil,
is h-ic Nabcodon cen fell
ro airggeth ar thús Salem.- Ruc brait móir a cathraig n-Dé
ocus ro mill a aidme,
ro-síachtatar lais dia thaig,
læchaib, cléirchib, mnáib, maccaib.- Sechtmoga do blíadnaib dóib
i n-doíre 'sin Babilóin,
co tánic Cír, comul n-glé,
co ro fúaslaic a ndoíre.- At-rubairt friu Cír íar sin:
'Éirgid dia bar tír feissin,
ocus imthigid co tenn
co rissid Hierusalem'.- Íar sin do-chúatar fodes
dochum a tíre cen chess,
cor' chumtaigset cathraig n-Dé
etir aidmi ocus tige.- Íar sin insaigis Cír cain
ríge for feraib domuin
tricha blídan bái a glóir
's a h-ardrígi i m-Babilóin.Babil.
- Luid íar sin Cír lín a slúaig
cosin Scithia n-úabrig n-úair,
ic íarair chána ní is sía
ro marb rígan na Scithia.- Cethri flathiusa cen on
ar méit neirt, ba cain comol,
ro gabsat in domun n-dóid,
amal innises canóin.- Flathius na n-Asarda n-án
co tánic Cír mó cech mál,
{folio 44ra}
flathius Med is Pers, ba glicc,
conas-tánic Mac Pilipp.- Flathius na n-Gréc n-gribda a n-gáir
conas-táncatar Rómáin,
Rómáin raid h-i r-rígi íar sain
co tici déad in domuin.- Inad in tuir Nemrúaid náir
ar lár in maige Sennáir,
sluind im sruth n-Éofrait co n-glóir
ro cumtacht in Babilóin.Ba.