Corpus of Electronic Texts Edition
Cathréim Cellacháin Caisil (Author: Unknown)

Section 71

IS annsin do riact oirri O n-Echach .i. Dubh Dha Boireann & Lenn Turmun na h-Uidhi cona lugh-bharcuibh do comrac & do comtuarcain a chele amail da dreagan ar dhes-ghonuibh nó amail da seabac ar shaintgnimaibh. Ocus do lingedar sluagh Clainni gegdha glan Chais a longuibh na Lochlannach gur thoitset ar topthaibh & ar tren-ramhaibh na tarb-long.

Section 72

IS annsin do riachtsad {folio L 155a1} in triar croda caith-milid .i. Segda & Failbhi & Congal cu tarbh-chobhlach Clainni Tuirgeis. gu Sitriuc & gu Tor & gu Magnus & ro dibraiced cu h-athlum ona Eirenchaibh teda caela cnaib-righne tar leabar-corraibh na long Loclannach ar daigh nach scuchdais o cheli & ro dibraiced ona Loclannchaib slabrada garba glais-iarainn tar saeir-choraibh a sithlong-som & ro coraigheadh ider na curadaib cliatha crann-blaithi ceinn-gera do shleaguibh sith-righne sair-neimnecha & do threicetar a sdiurasmainn sdiuraighechta & do eirgedar a bh-foirne le ramhadhuibh um rig-borduibh a ruadh-long gur gabsat breisim barbardha ar a cheli gur bha muir mer mheall-ghaili tairm & trein-eirghi na tarb-cuithech-sin.

Section 73

IS annsin do greised & do gnaith-imredh long laech-Fhailbhi co sluagh-luing Sitriuc & do ling Failbhi leim fir-ard fiadhamail do lethan-clar a luingi cu seol-crann Sitriuc & nochtais in rig-milid in da lainn gasda ger-fhaebracha & gabais claidem dibh 'na laim dighainn deis ag freasdal laech-mhiled na luingi & claidem 'na laimh curata cli ag leadrad na tet & na sas bai um Ceallachan.

Section 74

Ocus do coraighedh cro cleas-armach cruadh-fhaebrach d' uaislibh clainni Cuirc imon crann oiret bui in laech ag leadrad na leabar-thed gur leicesdar in caith-milid a cert-lar na cnairri ider na curadaib Ocus toirberis Failbhe in dara lann a laim Cheallachain isin cruaidh-irghail & gabais Ceallachan cnamh-comach arna curadaib re slis-borduibh na saer-luingi. gur ling a luing laech-Fhailbhi Ocus do doirtedh gu dighair dasachtach ar dhegh-Fhailbhe isin dubh-luing amail is gnath gu loigenn ilar ar uathaid.

Section 75

O ro mudhaighedh in milid & o ro fadhbudh in fir-laec ider na freach-Ghallaibh ro dicennsad an deigh-fhear & ro thocbhatar a cenn ar cuirr na cnairre. O 't-conncadar dian-gasrada


p.43

duibnich an dicennad-sin & macrada mera Muimnich Ro cruadaighedh in comrac & ro dluthaiged an deabhuid {folio L 155a2} ag na degh-sluaguibh. Ad-raig Fiangal gu ferrdha ger bho tim tlaith teichthech gach deagh-laech ar toitim a fhlatha & ro ghabh oc accaine a thigerna & ro rad a breithir nach roisedh Sitriuc slan cu sloguibh Lochlainn uair ba comhalta do chaeimh-Fhailbhe in curaid & do thuic nach gebhdais a airm in t-airsidh eidigthi & ba truagh lais a tigerna isin cairbh gan coimhdigailt & at-bert in laid.

    1. Corp I Chonaire in truagh libh

      & rl.

    1. 1] Corp I Conaire i truagh libh & rl.§
      2] do bheith 'san loing Lochlonnaicc
      3] is a cheann ara cuirr chais.
      4] ua Mogha Lámha laoch-mhais.
    2. 1] Nochar dhlígh easan seach cách.
      2] gan a leanmhuin fíor an fáth
      3] da bh-féaduinn féin ina loing.
      4] Fáilbhe fer an fhuilt ór-thruim
    3. 1] Súgach saoileach ar shluaghaibh.
      2] an mílidh go mór-bhuadhaibh
      3] bá tíodhlaigtheach tighe n-óil.
      4] ua Aongusa go n-árd-mhoir
    4. 1] Failbhe Fionn ón Failbhe Fionn.
      2] do-rad a chorp tar mo chionn
      3] doilg leam a fhágbháil tar méis.
      4] a loing Shithricc meic Turgéis
    5. 1] Ni rac am beathaidh bo dheas.
      2] a c-cric Múmhan na mór-leas
      3] acht mun fhágabar go h-olc.
      4] an fear do cior a chaomh-chorp.

      Corp.

Section 76

Is annsin ro lingestar Fiangal leim sanntach seabhcaidhi cu sluag-luing Sitriuc & satius a gheal-glaca a m-brollach luirigh in Lochlannaig & sreang-thairrngius in Finnlochlannach fon bh-fairgi gu riachtsat araen grian & gainemh in ghnathmhara. gurub i-sin tarraid iat.


p.44

Section 77

IS annsin do riactsat an da oirrigh adhmara don cloinn crodha cedna .i. Seghda & saer-Congal gu da macuibh trena Turgeis .i. Tor & Maghnus Ocus nir aighti carut um cuirm ag na curaduibh & nir sherc ced-ingine da cele. gur lingset na laeich gu leomanda asna cnairribh comdluta ina m-buinnedhuibh diana doifresdail tar leabar-bhorduibh na long Lochlannach & ro fhacbhatur in laechrad a longa fein faen folumh & ba bronn-lan longa na Lochlannach & ba leath-trom na leath-buird or ba h-imarcraigh anbhail dona longuibh comdhortad cloinne Cuirc ina crislaigibh & siat lan do Loclannchaib. rompa. co nar fuirigset na longa re comrac dona curadaibh gan a slucud isin sal-mhuir gur baidhed gach barc guna buidhnibh dhibh. amail as-bert in fili na focuil-si.

    1. Mor menma na miled muai

      & rl.

    1. 1] Mor menma na miled muad & rl.§
      2] Failbe Seagda is Conall cruaid
      3] dias díobh do Shiól Chonaire an airm ghlais.
      4] fir bo calma re ciorrbadh cneas.
    2. 1] Fágbhaid a longa féin fólam.
      2] na milidh sin ní dáil doilg
      3] gur lingséd ina longaibh dé.
      4] ar Cloinn Turgéis toghúidhe
    3. 1] Cómhrag ar an muir mearrdha.
      2] do rín an triar tréan-chalma
      3] gur lingsed gér chruaidh an cleas.
      4] ar lucht na lúireach lán-glas
    4. 1] Ba fórlann dá gach carb chruaidh
      2] lucht dá long gér lán anbhuain
      3] is bá leatrom búird na m-bárc.
      4] do Lochlonnaibh Chuirc na c-caomh-thracht
    5. 1] Súghaidh chuice an mhuir monuar.
      2] gach long gach curach colg cruaidh
      3] níor threigsed a c-cómhlann de.
      4] Clann Turgeis is trean-Chairbre
    6. 1] Ag sin óighedh mo laoch luath.
      2] ar an muir ní sgéal guach
      3] Séagda is Conall na slogh.
      4] Tor is Maghnus mer-mór.

      Mór.


p.45

Section 78

IS andsin do riachtsad colg-longa cath-armacha Ciarraide & foirne fraecda ferg-mora Finnloclann & ro dibraigedh eturra saitheda soigeat & groid-greasa garbh-cloch & frasa fir-gera faghadh & sleagh seolta sith-remar & do-ronsat trodach thulgarbh & gleo ainmin escardach. IS ann sin do riacht Conncubar ri curata Ciarraigi

[

  • 1] Tiumnuim mo bú do bochtduibh.
    2] m'olc do macaibh mallachtduibh
    3] mo clí don talmuin o d-tig.
    4] m'anmuin donti o d-tainicc.
  • ]

    [Misi Ricard Baired do sgribh so & tuccadh gach n-duine bennachtuin ar m'anmuinn.] {folio L 155b1} & Ilbhrech imgonach mac righ Finnlochlann & dochathuighset gu dur & gu dichra & rocuimnighset Ciarraige crecha a criche don curaid & ro imerseat imarcraigh a sainnti ara sleaghuibh & treisi a tachuir ara tuaghuibh & cruaidhi a comluinn ara cloidhmhibh & sceanamdeacht a scainder ara scenuibh uair ba dluith na deghlonga da cheli air doroichdis a n-airm ochta & urbhruinne aroile. gur comhtuitset alliu & anall ina longuibh. Sed enim rotharraing Concubar Ilbreach alos a chinn chuigi & ros dichenn in deighlaech & commhaidis an cenn & toitis fein ar muin in miled cu bh-fuair bas amlaid. Conudh da forgell sin do can in fili in laid.


    p.46

      1. 1] Concubar ba calma in cing

      1. 1] Concubar ba calma in cing§
        2] Rígh Chiarruidhe an fhuilt áluinn
        3] a thuitim as truag an cleas.
        4] le lucht na lúireach lán-ghlas
      2. 1] Níor fhágsad a mhuinter mhear.
        2] ua Fhergusa an fer finn-gheal
        3] gur thuitsed tuaidh ar an muir.
        4] lé sluaigh Fionnlochlann fosuidh
      3. 1] Conchubhar is Ilbhreac án.
        2] Mac righ Lochlainn fa laoch lán
        3] troidsed na curaidh chródha.
        4] ina longaibh lan-mhóra
      4. 1] Bá farsiong fiór-chreachta fear.
        2] bá ciorrtha caomh-cheinn churad
        3] ba tollta a taoibh go tric.
        4] ba h-anbhfann gach laoch lán-ghlic
      5. 1] Fágbhuidh an fear-sin go faon.
        2] Mac Righ Fionnlochlann folt-chaomh
        3] is beanaidh de a cheann gan chol.
        4] Mac Mic Beathadh Conchubhair.

        Conchubhar.

    Section 79

    IS andsin do riachtsad clanna Cairbre re n-abar Baiscnigh & loingius na Pers ar amus aroili & ro chuimhnighset a nua-fhalta & a n-escairdeas & ro suidhigedh gu sunnradac sarugad Senan ag na saer-shluaghuibh & creachad Innsi Cathaig ar an cruadh-loingius Ocus ro deigh-imredh ag Diarmaid & ag Baisceann a m-barc & ro dibraiged eturra a soighdi & a sleagha do chuadar ar a ramadaibh reamra ruadh-fuinnsin & ro gabsad cruadh-comairt ar a chele.


    p.47

    Section 80

    Cidh tra do riacht an dias dhighair dhoi-freasdail sin .i. Diarmaid & Baiscinn ana m-borb-ruathar a luing in Lochlannaig. gur mharbhsat in milid ar lar-medhon a luingi .i. Lenn Turmun na Pers Ocus ad-rochuir Diarmaid isin dub-luing & ros-dicheann Baiscenn in borb-Loclannach amail is-bert in fili.

      1. 1] Do thuitset isin cath cruaid.
        2] clanda Cairbri claidim-ruaidh.
        3] is sluagh na Pers gerb easbach
        4] acht mad Baiscenn buain-eascrach.