861 K. iiii. Gormlaith ingean Donnchadha, rioghan Teamhrach, in poenitentia obit.
862 K. u. Fionán Cluana Cáoin, epscop & anchoire, quieuit.
862 K. u. Finncheallach, ab Fearna, .m.
859 K. i. Ségonan mc. Conaing, rí Cairrge Brachaidhe, .m.
860 K. ii. Flanagan mc. Colmáin .m.
860 K. ii. Guin Aodha mc. Duibh da Baireann, rí .H. f-Fidhgente.
861 K. iiii. Ceannfaoladh i ríghe Muman.
862 K. u. Domnall mc. Ailpin, rex Pictorum, .m.
862 K. u. Deargár do thabhairt do Chearbhall mhac Dunlaing & do Cinnedigh mhac Gaithine, .i. mc. deirbhseathar Chearbhaill, for longus Rodlaibh, & bá gairid remhe tangattar a Lochlann; & Conall Ulthach do mharbhadh ann agas Luirgnen, cum plurimis alíis.
863 K. ui. Inreadh Breagh la Lochlannachaibh, & dul ar uamhannaibh iomdhaibh, & as eadh ón na dearnadh go minic reime.
863 K. ui. Ár na n-Gall lá Cearbhall mc. Dunlaing ag Fearta Caireach, & a creach d'fagbhail.
863 K. ui. Muiriogan mc. Diarmada, rí Náis & Laighean, cid do marbad la Gentibh, & sochaide mór do mhaithibh Laighean.
863 K. ui. Aodh mc. Cumuscaigh, ri .H. Nialláin, .m.
863 K. ui. Muireadhoch mc. Maoil Dúin, rí na n-Airthear, iugulatus est ó Dhomhnall mc. Aodha mc. Neill.
{MS page 45} 864 K. uii. Cearbhall mc. Dunlaing do innreadh Laighean. Níor bó cian iar sin go ro thionolsad Laighin Lochlannaig & íad féin, go ro indridhsiod Osraighe 'na dhioghail sin. Ba mór an trúaighe do neoch rá theich d'Osraighibh i m-Mumhain; ra marbhaid & ra h-airgid uile. Bá móo ra ghortaigh sin meanma Chearbhaill, .i. an lucht ro gabh aige amhail tairisi, .i. Eoganacht íad-saidhe, da n-argain & da mharbhadh. Beag air imorro caingean na namhad, uair nír bo iongnadh leis iad-saidhe do genamh na n-dearnsad, uair ra dhlighsiot. Ro thionol iaramh slóigh Gaoidheal & Lochlannach, & ra mhill na fearanna comhfochraibhe; ra mhill Magh Feimhin & Fir Muighe, & tug braighde ciniudha n-iomdha lais.
865 K. ii. 'Sin bliadain si, .i. in tertio anno regni Aodha Finnleth, tangattar Saxain i m-Breathnaibh Gaimud, & ra ionarbaidh na Saxain Breatain as an tír.
864 K. uii. Dalladh Lorcain mc. Cathail, rí Midhe, la h-Áodh mac Neill.
864 K. uii. Concupar mc. Donnchada, leithrí Midhe, do badh la h-Amlaibh i Cluain Iraird.
864 K. uii. Inreadh na n-Déisi lá Cearbhall mc. Dunlaing, & lánmilleadh .H. n-Aongusa.
Abdaine Tíre da Glas do Maoilpeattar in hoc anno.