Corpus of Electronic Texts Edition
Chronicon Scotorum (Author: [unknown])

Annal CS1126

Kl.

Enna mac Murchadha {.i. mac Donnchadha} ri Laigen moritur.

Sluaighedh la Toirdealbach h. Concupair go ttug {MS folio 216vb(334b)} rige Laigen et Gáll da mac fén do Concupur.

Murchadh h. Maoilseclainn i Midhe.

Morlongport la Tairdealbach a n-Urmumhain ó Lughnusadh go feil Brighde & ro airg fect asin longport sin Tír Conaill & a fect aile go


p.280

Mona Móir & go Glenn Maghair & fecht go deisgert Osraighe & ro cuir ár Osraighe um h. Caróc.

Domnall Fionn h. Dupda do badhadh ag tabairt creche ó Cinel Conaill.

Annal CS1127

Kl.

Giolla Crist h. Maoileóin abb Cluana M Nois topar ecna & deirce, cenn soma & saidbriusa na hErenn, quieuit.

Murchadh h. Maoilseclainn d'aitrioghadh. Domnall a mac 'na ionadh. Domnall d'aithrighadh a ccinn ráithe et Diarmaid h. Maoilseclainn 'na n-ionadh a ndís.

Cath eidir da righ Uladh dú a ttorchair Aodh h. Mathgamna & Niall mac Duinnslebhe h. Eochadha.

Annal CS1128

Kl.

Giolla an Coimdeadh mac Cuinn Dealbhnaigh tanaisi abbadh Cluana M Nois quieuit.

Annal CS1129

Kl.

Maghnus mac meic LochlainnCineoil Eogain & an tuaidhsgitt do marbadh ó Cinel Maien.

Ceallach comurpa Patraic & airdepscop Erenn d'éc a n-Ard Patraic & a adnacal i lLis Moir.

Teasbach mór isin bliadhain gur mill na guirt.

Altoir daimhliag móir Cluana M Nois d'fhoslugadh & seóid do breith este .i. carrachan tempuil Solman tuccadh o Maolseclainn mac Domnaill et cuidin Donnchadha meic Flainn {MS folio 217ra(335a)} ogas na trí seóid tuc Toirdealbach h. Concupair .i. bledhe argaid et copan argaid et cross óir thairis et corn co n-ór et corn h. Riatai rig Arad et cailech argaid & niam óir fair cona teisc et copan argaid Ceallaigh comarba Patraicc.

Annal CS1130

Kl.

Diarmaid h. Fallamain taisech Clainne Uadach moritur.

Goll Cluana h. Airectaigh moritur.

Seóid Cluana M Nois d'foillsighudh ar Gallaibh Luimnigh iarna ngaid do Giolla Comghain & ra crochadh é ig Dún Cluana Ithair iarna tidnacal ó Concupur h. Briain o righ Muman. Ro sir tra an Gilla Comgain sin Corcaigh & Lios Mor & Port Lairge do dol dar muir &


p.282

an lóng a ffaghbadh ionadh ní fagbadh sech gaoith seolta & fogebdís na longa archena. Dethber on dano ar na fhastadh Ciaran an long i ttrialladhsom tect tairis et do radsom gubitir fri bas indsein co n-aicedh Ciaran cona bachaill ic fastádh gacha luinge i ttrialladh dot tairis. Ra morusttur tra an Coimde an tí naom Ciaran isin firt sin.

Cu Aifne h. Concupairh. fFailge moritur.

Maidm re Tigernan h. Ruairc for airter Midhe dú a ttorchair Diarmaid h. MaoilseclainnAirtir Mide et Aongus o CaindealbainLaoguire et Cochall Fliuch mac meic SenainGaileng et alii multi.

Mess dimór gach toraidh in hoc anno.{MS folio 217rb(335b)}