Kl. Enair.
Bliadain na fele Eoin an bliadainsi for Aoine gur gab egla mor fir Erenn inte conidh í comairle ar ar cinnettur clerigh Erenn da dichor .i. tredenus gach mí & trosgadh gach laoi go cenn mbliadhna & almsana don Coimdhedh. Tugsat righa Erenn saoire do ceallaibh imdha ro battur a ndocur.
Muircertach h. Dupda rí H. nAmalgaidh & H. fFiacrach a suis occisus est.
H. Flaithnen comarba Ciaráin do dol i n-ailitre.
Kl. Enair.
Tadcc mac Ruaidri h. Concupair rí Connacht do marbad a suis.
Flaithbertach do dol i n-aturdha go h-Aodh h. Concupair & rige Síl Muiredhaigh do.
Maol Brigde h. Brolchan episcopus Cille Dara quieuit.
Cloigtech Mainistrech do losccadh gusan scriptuir ann.
Bliadain na cno. {MS folio 214ra(329a)}
Kl. Enair.
Pluuialis annus & fertilis.
Flaithbertach h. Flaithbertaigh do marbadh do Síl Muiredhaigh a ndigail dallta Ruaidri.
Mide d'fasuccadh eidir Donchadh h. Maoilseclainn et Concupur h. Maoilseclainn.
Domnall h. hEni ardepscop fer Muman in .lxxui. anno aetatis suae quieuit.
Snecda mor in hoc anno.
Kl. Enair.
Catraoinedh ren-iartur Teabtha for airter Tebtha du a ttorchair Muircertach h. Airt rí Teabta & h. Lachtnáin.
Derforgaill ingen Taidg h. Gilla Patraic mathair Muircertaigh h. Briain mortua est.
Kl. Enair.
Gilla na Naom h. hEidin rí Sil Muiredhaigh & Connacht uile moritur & a Cluain muc Nois ro hadhnacht.
Donchadh h. Eochadha rí Uladh do cuibrech do Domnall mac meic Loclainn do righ Cinel Eogain.
Cu Medha h. Laogachain ardtaoisech Sil Ronain quieuit.
Mac Raith h. Flaithén comarba Ciarain & Cronain Tuama Greine a ndeoraidhecht quieuit i n-Achadh Bó.