Kl. Enair.
Ruaidri h. Canannáin rí Cinedil Conaill do marbadh.
H. Maoilrúanaidh rí Uladh occisus est.
Kl.
Diarmaid mac Maoil na mBo rí Gall & Laigen et Leite Mogha do marbadh la Concupur h. Mailsechlainn i gcath Odba & ar uime.
H. Flaitri rí Uladh & mac Aisitha rí Gabla do losccad a ttigh tinedh la fearaibh Midhe.
Kl. Enair.
Concupur h. Maoilseclainn rí Temrach do marbadh do mac a derbrathar .i. do Murchad mac Flainn tria meabail. A chenn do breith a hadhnacal ó Cluain M Nois go Cenn Coradh la Tairdealbach h. Briain Aoine Casga; Día Domnaigh fo cedóir tugadhsum andes co ndíbh failgibh óir maille fris.
Kl. Enáir.
Dunan episcopus Atha Cliath quieuit.
Donnchadh h. Ceallaigh rí H. Maine occisus est a fratre suo per dolum.
Kl. Enair.
H. Canannain rí Cineóil Conaill moritur.
Muircertach h. Bríain do rioghadh a n-Ath Cliath.
Gotraigh rí Gall moritur.