Corpus of Electronic Texts Edition
Annals of the Four Masters (Author: [unknown])

Annal M499

M499.0

Aois Criost, ceithre céd nochat a naoi.

M499.1

A h-aon fichet do Lughaidh.

M499.2

Cearban easpoc, ó Fiort Cearban oc Teamhraigh, d'écc.

M499.3

Cath Seaghsa ria Muircertach mac Erca for Duach Teng' Umha, ri Connacht. Is eadh fochann an chatha .i. Muirchertach ro bai h-i rathaighius etir in rí & Eochaidh Tiormcharna, a brathair, go ro gabhadh Eochaidh for comairce Muirchertoigh. Ceann Faoladh as-bert da dhearbhadh.

p.162

    1. Cath Seghsa
      ben do mnaibh fodruair
      ro boí crú derg dar cruisigh,
      la Duisich, ingin Duaich.
      cath Dealcca, cath Mucramha
      acus cath Tuama Drubha,
      la cath Seghsa
      h-i t-torcair Duach Teng' Umha.

For Connachtaibh ro sraoineadh na catha h-isin.

Annal M500

M500.0

Aois Criost, cuicc céd.

M500.1

An dara bliadhain fichet do Lughaidh.

M500.2

S. Ibhar espuc, d'écc an tres la fichet do mí April.

M500.3

Ceithre bliadhna ar tri céd fod a shaoghail.

M500.4

Cath Lochmaighe ria Laignibh for Uibh Nell.

Annal M501

M501.0

Aois Criost, cuicc céd a h-aon.

M501.1

A tri fichet do Lughaidh.

M501.2

Cath Fremhainne h-i Midhe for Fiachaidh, mac Nell, ria f-Failge Berraidhe, dia n-ebradh an rann,

    1. In rí aile as-mberaidh
      Fiacha, mac Nell, ní celaidh,
      As fair, tar cremla cile,
      cath Freamhna Midhe meabhaidh.

Annal M503

M503.0

Aois Criost, cúicc céd a trí.

M503.1

Iar m-beith cúig bliadhna fichet i righe Ereann do Lughaidh, mac Laoghaire, torchair i n-Achadh Forcha, iarna bém

p.164

d'forcha tenntighe, tre miorbailibh De, tresan dímiadh tuccustoir do Pattraicc, amhail a deir an rann-so:
    1. A n-Achadh Farcha ughrach,
      bás mhic Laogaire Lughach,
      Gan molbhtha tall na sonn
      de do forcha trom teinntighe.

M503.2

Eochaidh, mac Muiredhaigh Muindeircc, ri Uladh, d'ecc.

Annal M504

M504.0

Aois Criost, cúicc céd a cethar.

M504.1

An céid-bhliadhain do Muirchertach, mac Muiredhaigh, mic Eoghain, mic Néll, na righ ós Erinn.

Annal M506

M506.0

Aois Criost, cúicc céd a sé.

M506.1

An treas bhliadhain do Mhuirchertach.

M506.2

Iollann,mac Dúnlaing, ri Laighen, d'écc.

M506.3

Cath Luachra ria Coin Corb for Uibh Néill. As do ra raidhedh:

    1. Cath lonn Luachra, uasa tuas,
      at-ces Brighit, ni frith fás,
      flannchath Fionnabhrach ba h-uas
      im corp n-Iollainn iarna bhás.

Annal M507

M507.0

Aois Criost, cuig céd a seacht.

M507.1

An cethramhadh bliadhain dho Muirchertach.

M507.2

Cath Droma Dergaighe for Foilghe m-Berraidhe, ria f-Fiachaidh mac Néll.

p.166

As la Cinel Fiachaidh an feronn o Cluain In Dibair co h-Uisnech o sin ille, amhail as-bert Cend Faoladh:
    1. Dighal Dia seacht m-bliadhan,
      ba si dighde a cridhe
      cath i n-Dromm Dergaighe
      ba dhe do-cer magh Midhe.

Annal M511

M511.0

Aois Criost, cuig céd a h-aoin n-décc.

M511.1

A h-ocht do Mhuirchertach.

M511.2

S. Bron epscop o Cúil Iorrae, i c-Condachtuibh, d'écc, an t-ochtmhadh lá do mí Iun.

Annal M512

M512.0

Aois Criost, cuig céd a dó dég.

M512.1

A naoi do Muirchertach.

M512.2

S. Earc Slaine espucc Lilcaigh, & ó Ferta Fer f-Feig i t-taobh Sídhe Truim aniar, do écc, an dara lá do mhí Nouembris. Deich m-bliadhna ar cheithre fichtib a

p.168

aois an tan thesta. As e an t-Espucc Eirc-sin ro ba breithemh do Phattraicc. As do-roine Patraicc an rand-so.
    1. Espucc Erc
      gach ní con-ceartadh ba cert,
      gach aon beireas coicheart cert
      fortraibh bendacht Easpuic Erc.

M512.3

Dubhthach .i. a Druim Derbh espucc Ard Macha do fhaoidhedh a spioraitte.

Annal M513

M513.0

Aois Criost, cuig céd a trí décc.

M513.1

An dechmhadh bliadhain Mhuirchertaigh.

M513.2

.S. Mac Nisi .i. Aonghas espucc Connere, d'écc an treas la do Nouember.

M513.3

Cath Dedna, i n-Dromaibh Breagh, ria Muirchertach mac Earca, & ria c-Colgu, mac Loiti, mic Cruinn, mic Feidhlimidh, taoiseach Airghiall, dú in ro marbhadh Ardghal, mac Conaill Cremhthainne, mic Néill.