Corpus of Electronic Texts Edition
Annals of the Four Masters (Author: [unknown])

Annal M365

M365.0

Aois Criost, trí céd seascca a cúicc.

M365.1

An t-ochtmadh bliadhain d'Eochaidh Muighmhedhoin mac Muiredhaigh Tirigh ós Erinn go n-erbailt i t-Teamhraigh.

Annal M366

M366.0

Aois Criost, trí céd seascca a se.

M366.1

An ced-bhliadhain do Criomhthann, mac Fiodhaidh, mic Daire Cerb, os Erinn.

Annal M378

M378.0

Aois Criost, trí céd seachtmoghat a h-ocht.

M378.1

Iar m-beith tri bliadhna

p.126

décc 'na righ ós Erinn do Criomhthann, mac Fiodhaigh, at-bail do digh neimhe tucc Moingfhionn a h-siuir feisin dó.

Annal M379

M379.0

Aois Criost, trí céd sechtmoghat a naoi.

M379.1

An céd-bhliadhain do Niall Naoighiallach, mac Eathach Moighmhedhoin, h-i righe n-Ereann.

Annal M405

M405.0

Aois Críost, ceithre céd a cúicc.

M405.1

Iar m-beith seacht m-bliadhna fichet 'na righ ós Erinn do Niall Naoighiallach mac Eathach Moighmhedhoin, do-rochair la h-Eochaidh, mac Enna Cendsealaigh, occ Muir n-Iocht .i. an mhuir edir Franc & Saxain.

p.128

Annal M428

M428.0

Aois Criost, ceithre céd fiche a h-ocht.

M428.1

Iar m-beith tri bliadhna fichet i righe n-Ereann do Dathí, mac Fiachrach, mic Eathach Moighmheadhoin, torchair do saighit gealain ag Sleibh Ealpa.

Annal M430

M430.0

Aois Criost, ceithre céd triocha.

M430.1

An dara bliadhain do Laoghaire.

M430.2

Is in m-bliadhainsi ro faoidh an céd Celestinus papa Paladius epscop dochum n-Ereann do shíoladh creidmhe d'Eirennchoibh, & tainic i t-tír i c-crích Laighen, da fher décc a lion. Ro diult Nath I mac Garrchon roimhe, ar a ai ro bhaist uathadh daoine i t-tir n-Ereann, & ro fhothuigheadh teora h-eccailsi crainn lais, Cell Fhini, Teach na Romhan, & Domhnach Arta. A c-Cill Fhine ro faccaibh a liubhra, & an comhra go t-taisibh Póil, & Pedair, & martirech n-iomhdha n-oile. Ro fháccaibh an cethrar-so isna h-eccailsibh ishin dia eis: Augustinus, Benedictus, Siluester, & Solonius. Ag tionntudh do Phalladius for c-cul do Roimh (o na fuair airmittin i n-Erinn) dos-fairidh galor i t-tíribh Cruithnech co n-erbailt de.

Annal M431

M431.0

Aois Criost, ceithre céd triocha a h-aon.

M431.1

An tres bhliadhain do Laoghaire.

M431.2

Ro h-oirdneadh naomh Pattraicc i n-espuccoide lasa naomh-papa an ced

p.130

Celestinus, ro furail fair tocht dochum n-Ereann, do shenmóir & do proicept credmhi & crabhaidh do Gaoidhealaibh, & dia m-baitseadh idir.

Annal M432

M432.0

Aois Criost, ceithre ched triocha a dó.

M432.1

An ceathramhadh bliadhain do Laoghaire.

M432.2

Pattraic do theacht i n-Erinn an bliadhain-si, go ro gabh for baitseadh & beannachaigh Ereann, fiora mna, maca, & ingena, cénmótá uathadh na ro fhaomh baitsiodh na creideamh uadh, amhuil aisnedheas a bheatha.

M432.3

Ath Truim do fothúghadh la Patraicc iarna edhpairt do Fhedhlim, mac Laeghaire, mic Nell, do Dhia, do-somh, do Lomman, & do Fortchern. Flann Mainistrech cecinit.

    1. Pádruig, ab Eireann uile
      mac Calprainn, mic Fotaide
      mic Deisse, nar dóigh do liudh
      mic Cormuic Mhóir, mic Leibriuth
    2. mic Ota, mic Orric Mhaith
      mic Moiric, mic Leo in lan-raith
      mic Maximi, mairg na sloinn
      mic Encretta aird alaind
    3. mic Pílist is ferr ar aig cach,
      mic Fereni gan ansath
      mic Brittain, dobhra in mara,
      o tait Bretain bruthmhara
    4. Cochnias a mhathair malla
      Nemthor a bhaile bagha
      don Mumhain ni cael a chuid
      ro saor ar puthair Pádraig.

p.132

Annal M434

M434.0

Aois Criost, ceithre céd triochat a cethair.

M434.1

An seiseadh bliadhain do Laoghaire.

M434.2

Loarn mac Eachach Muinremhair do ghenedh.