Aois domhain, cuicc mile ochtmoghat a cúig.
An céd-bhliadhain d'Ederscél, mac Eoghain, mic Oiliolla, 'na rígh ós Erinn.
Aois domhain, cúig mile ochtmoghat a naoi.
Iar t-tochaithemh cóicc m-bliadhan h-i righe n-Ereann d'Ederscel, mac Eoghain, mic Oiliolla, do-rochair la Nuadha Neacht, i n-Aillind.
Aois domhain, cuicc mile nochat.
Iar c-caithemh leithbhliadhna h-i righe n-Ereann do Nuadha Necht, mac Sedna Sithbhaicc, torchair h-i c-cath Cliach i n-Uibh Dróna lá Conaire Mór. Leith-bhliadhain comhfhlaithis Cloinne Eimhir Find h-i c-cenn na leith-bhliadhan-so Nuadhat Necht comhlánaighes nocat as cúig míle bliadhain i n-aois domhain.
Aois domhain, cuicc mile nocha a h-aon.
An ceid-bhliadhain do Conaire Mór, mac Etersceóil, i righe n-Ereann.
Aois domhain, cuicc mile ced seascca.
Iar m-beith sechtmoghat bliadhain h-i righe n-Ereann do Conaire Mór, mac Etirsceoil, do-rochair h-i m-Bruighin da Derg la díbheargaibh. As a f-flaith Conaire do chuireadh an mhuir torchar gach bliadhna fa thír i n-Inbher Colpa do shonnradh. Do-gebthi bheós cna iomhais for Bhóind & Bhuais fria linn. No biodh na cethra gan comhda a n-Erinn ina flaith, ar mhéd an t-síodha & an chaenchomhraic. Nír bo toirneach ainbhtionach a fhlaith, ar ní bhuingeadh gaoth cairche a h-indlibh ó mhedhon foghmair go medhon Earraigh. Suaill ná feacdaois na feadha d'aidhble a measa fria linn.
Aois domhain, cuicc mile ced seascca a h-aon.
An céd-bhliadhain d'Erinn gan rígh iar c-Conaire.
Aois domhain cuig mile ced seascca a sé.
An céid-bhliadhain do Lughaidh Sriabh n-Dercc h-i righe n-Ereann.
Aois domhain, cúig mile ced nochat a h-aon.
Iar m-beith sé bliadhna fichet h-i righe n-Ereann do Lughaidh Sriabh n-Dercc at-bath do chumhadh.
Aois domhain, cúig mile ced nochat a dó.
Aon-bliadhain do Concubhar
Aois domhain, cuig mile ced nochat a trí.
An céid-bhliadhain do Criomhthann Niadh Náir, mac Luigdheach, h-i righe n-Ereann.