Corpus of Electronic Texts Edition
Annals of the Four Masters (Author: [unknown])

Annal M4540

M4540.0

Aois domhain, ceithre mile cuig ced cethrachat.

M4540.1

An céd-bhliadhain do Macha h-i righe n-Ereann iar n-eg do Ciombaoth mic Fiontainn.

p.74

Annal M4546

M4546.0

Aois domhain, ceithre mile cuig ced cethrachat a sé.

M4546.1

Iar m-beith seacht m-bliadhna h-i righe n-Ereann do Macha Mongruaidh, inghen Aodha Ruaidh, mic Badhairn, do-cher la Reachtaidh Righdercc, mac Luighdheach. As h-í Macha ro forail for macoibh Diothorba (iar na t-tabhairt fo daoire) Raith Eamhna do claidhe, gomadh si priomhchathair Uladh do ghres, amhail rémraidhsem, & ba h-e Ciombaoth & Macha ro oil Ughaine Mór.

Annal M4547

M4547.0

Aois domhain, ceithre mile cúig céd cethrachat a seacht.

M4547.1

An céd-bhliadhain do Reachtaidh Righdercc, mac Luigdheach, h-i righe n-Ereann.

Annal M4566

M4566.0

Aois domhain, ceithre mile cuig céd seasccat a sé.

M4566.1

Iar m-beith fiche bliadhain i righe n-Ereann do Reachtaidh Righdercc, mac Luighdheach, do-rochair la h-Ughaine Mor a n-dioghail a bhuime .i. Macha Mongruadh.

Annal M4567

M4567.0

Aois domhain, ceithre mile cuig ced seasccat a seacht.

M4567.1

An céd-bhliadhain d'Ughaine Mór, mac Eathach Buadhaigh, h-i righe n-Ereann innsin.

Annal M4606

M4606.0

Aois domhain, ceithre mile sé ced a sé.

M4606.1

I f-forchend na bliadhna so, iar m-beith cethrachat bliadhain comlán d'Ughaine Mhór na rígh Ereann & Iarthoir Eorpa go h-iomlán go muir Toirrian, do-rochair la Badbchadh, i t-Tealach

p.76

an Chosgair i Maigh Muireadha i m-Breghoibh. As é an t-Ughaine-sin ro gabh ratha na n-uile dúl aicsidhe & nemhaicsidhe for fiora Ereann go coitcend, gan iomchosnamh im righe n-Ereann fria a chloinn go bráth na fria shíol bheós.

M4606.2

Badbchadh, mac Eachdhach Buadhaigh, iar n-Ughaine Mór lá go leith isin righe, go ros-marbh Laoghaire Lorc, mac Ughaine, a n-dioghail a athar.

Annal M4607

M4607.0

Aois domhain, ceithre mile se chéd a seacht.

M4607.1

An céd-bhliadhain do Laoghaire Lorc, mac Ughaine Mhoir, h-i righe n-Ereann innsin.

Annal M4608

M4608.0

Aois domhain, ceithre mile sé chéd a h-ocht.

M4608.1

Iar m-beith dá bhliadhain h-i righe n-Ereann do Laoghaire Lorc, mac Ughaine, do-rochair la Cobhthach Caol m-Bregh h-i c-Carman.

Annal M4609

M4609.0

Aois domhain, ceithre mile se chéd a naoi.

M4609.1

An céd-bhliadhain do Cobhthach Caol Bhregh h-i righe n-Ereann indsin.

Annal M4658

M4658.0

Aois domhain, ceithre mile sé chéd caogat a h-ocht.

M4658.1

Iar m-beith caogatt bliadhain i righe n-Ereann do Cobhthach Caol Bregh, mac Ughaine Mhóir, do-rochair la Labhraidh Loingseach Maen mac Oiliolla Aine, co t-triochaid riogh ime h-i n-Dionn Righ for bhrú Berbha.

p.78