Corpus of Electronic Texts Edition
Annals of the Four Masters (Author: [unknown])

Annal M3657

M3657.0

Aois domhain tri mile sé ced caogatt a seacht.

M3657.1

An ced-bhliadhain d'Erind gan righ iar t-Tighernmas innsin.

Annal M3663

M3663.0

Aois domain, tri mile sé ched sesccat a trí.

M3663.1

An seachtmadh bliadhain indsin. Baoi Ere gan rígh frí ré na secht m-bliadhan sin.

Annal M3664

M3664.0

Aois domhain, tri mile sé ced seasccat a cethair.

M3664.1

An cead-bhliadhain d'Eochaidh Eudgadhach na righ ós Erinn indsin. As aire at-berar Eochaidh Eudgadhach fris ar as lais tuccadh ilbhrechtradh gacha datha i n-edighibh ar tús

p.44

i n-Erinn d'eidirdeliughadh onóra gach aoin as a edach, ótha íseal go h-uasal. As amhlaidh din ro deligh ettorra, aen-dath i n-edoighibh moghadh, a dó i n-edoighibh amhoss, a tri i n-édoighibh daghlaoch & oigtighernadh, a ceathair i n-edoighibh brughadh, a cuig i n-edoighibh tighearnadh tuath, a se i n-edoighibh ollamhan, a secht i n-edoighibh ríogh & ríoghan.

Annal M3667

M3667.0

Aois domhain, tri mile se ced seasccat a seacht.

M3667.1

An cethramhadh bliadhain d'Eochaidh. H-i b-foircend an cethramhadh bliadhain dia righe do-rochair lá Cermna mac Ebric i c-cath Teamhra.

Annal M3668

M3668.0

Aois domain, tri mile sé ced seasccat a h-ocht.

M3668.1

An ced-bhliadhain do Sobhairce & do Cermna Fiond, dá mac Ebric, mic Emhir, mic Ir, mic Mileadh, ós Erinn, & ro rannsat eatorra í ar dó, Sobairce tuaith i n-Dún Sobhairce, & Cermna teas i n-Dun Cermna. Dá céd rígh Ereann do Sliocht Ir iad-sidhe.

Annal M3707

M3707.0

Aois domhain, tri míle seacht c-ced a seacht.

M3707.1

Ar m-beith cethrachat bliadhain do na rioghaibh si a c-comhfhlaithius os Erinn, do-chear Sobairce la h-Eochaidh Meand d'Fomoiribh, & do-rochair Cermna la h-Eochaidh b-Faobharglas mac Conmhaoil.

Annal M3708

M3708.0

Aois domhain, tri mile seacht c-céd a h-ocht.

M3708.1

An ced-bhliadhain d'Eochaidh Faobharglas, mac Conmail, mic Emhir, os Erinn.

Annal M3727

M3727.0

Aois domhain, tri mile seacht c-ced fiche a seacht.

M3727.1

Iar m-beith imorro d'Eochaidh fiche bliadhain i righe Ereann torchair lá Fiacha Labhrainne i c-cath Carmain i n-dioghoil a athar.

M3727.2

At iad andso na catha ro cuirid & na maighe ro sleachtaid lá h-Eochaidh f-Faobharglas. Cath Luachra Deadhadh, cath Fosaidh Da Gort, cath Comair Trí n-Uiscce, cath Tuama Dreacon i n-Uibh Briúin Breiffne, cath Droma Liathan. At iatt na maighe, Magh Smetrach

p.46

lá h-Uibh f-Failghe, Magh n-Aidhne, Magh Luirg i Connachtaibh, Magh Leamhna, Magh n-Inir, Magh Fubhna, & Magh Da Gabhor lá h-Airghiallaibh.

Annal M3728

M3728.0

Aois domhain, tri mhíle secht c-ced fiche a h-ocht.

M3728.1

An céd bhliadhain do righe Fiachach Labhrainne os Erinn indsin.

Annal M3751

M3751.0

Aois domhain, tri mile seacht c-céd caoccat a h-aon.

M3751.1

An cethramhadh bliadhain fichit-so foirchend righe Fiachach Labhrainne, & do-cher lá h-Eochaidh Mumho don Mumhoin i c-cath Bealgadain. As lasan b-Fiacha Labhrainne-si ro briseadh na catha-so: cath Gathlaighe i t-torchair Mo Febis mac Eachdach Faobharglais, cath Fairrge for Cloinn Emhir, cath Slebhe Feimhin, cath frí h-Ernoibh d'Feroibh Bolg an bail i fuil Loch Erne. Iar meabhsain an catha forra as ann ro meabhaidh an loch tairsibh, conadh uatha ainmnighther an loch, .i. loch tar Ernaibh. As a reimhius an Fiacha cedna tobhruchtadh na t-teóra n-aibhneadh, Fleasc, Mand, & Labhrand, dia ro lil an forainm fair-sium.