Kl. enair for dardaín & .x. fuirre & bliadan tanaiste for bisex en andis transactis .cccc. quatuor post obitum
Taissi Comaín do thocbail itercíno eius usque ad translationem.
Diarmait h-Ua Briain, ard-comurba Comain, do ég a n-Ínis Clothrand.
In t-espoc h-Úa Ruadhan, sruith-shenoír in Chóicidh, do éc.
Mael Mordha mac Uairerghi, cenn chelidh n-Dé Cluana, do ég.
Concobar mac Maic Lochlainn, rí Ceneóil Eogain, do marbad do macaib Cano a n-Ard Macha.
Mac Murchadha do gabail rigi Gall Laighen.
Durmach Colaim Cille do loscud cona templaib, & caisdel Gaillmi & Ard Rathain.
Tosach uilc na h-Erenn .i. Roberd mac Stemni do techt a n-Erinn, sesca luirech, & fa Ricard mac Gilliberd .i. iarla, & da chath doib etir ridire & saighdeóir ar techt a furtacht Maic Murchadha, co n-dechatar ar Port Lairge ar eicin, & cor' facsad drem dia muntir and, & do-chuatar a Loch Carman ar écin, & do gabsad Mac Gilla Muire armand an dúine & h-Úa Faelan ríg na n-Deísi, & a mac, & ar lochta in duine co n-dorcratar secht cét dib.
Tri madhmanna ria Mac Carrthaigh for Saxanaib.
Tinólaidh Mac Murcadha co n-Gallaib arsin do dul tar Ath Cliath. Tinólaidh rí Erenn iarsin .i. Ruaidhri Ua Conchobair,
Crech la Mac Murcadha for Uib Faelan, cor' mill in tír & cor' índarb a ríg .i. Faelan & ro índarb didiu Domnall Mac Gilla Padraic ríg Osraigi a Connachtaib.
Sluaighedh la Mac Murcadha a Midhi, cor' airg Clúain Iraird. Luid asen co Cenannus, cor' airg & cor' loisc Cenannus & Tuilén & Slaíne & cella imdha aile, & luidh as-sein co Sliab n-Guaire, co n-derna airgne for Uib Bríuin, & ro sai dia thigh.
Domnall Bregach h-Úa Mail Sechlainn do thecht a tech Maic Murchadha.
Braighde Laigen & Maic Murcadha do marbad la Ruaidri h-Úa Concobair ar aslach Tigernáin Uí Ruairc andsna h-ecóraib-sin, uair tuc Ua Ruairc a chubais na budh rí Erenn Ruaidhri muna marbad íat, & ro marbad and mac Domnaill Caemanaigh Maic Murchadha & mac Murcaidh h-Úi Chaellaighe la ríg Erenn.
Righi Ceneóil n-Eogain do gabail do Níall Mac Lochlainn. Righi Iarthair Midhi do gabail do Art h-Úu Mael Sechlainn.
Conchobhur mac Diarmuda Maic Murchadha mortuus est.
Domnall Ua Bríain & Dal Cais do impódh ar ríg Erenn, cor' fhass cocadh mór aturru.
Coblach dermair la Ruaidhri h-Úa Concobair for Sinaind do índradh Muman as.
INdradh Urmuman la Condachtaib & clar-droichet Chilli Da Lua do loscud.
Braighdi Oirgiall do gabail la Mac Murchudha.
Kl. enair for aíne & .xxii fuirri, & tres bliadan for bisex.
Ruaidrí h-Úa Concobair do breith a coblaig ar Loch n-Dergderc & ar Sinaind, cor' scail drochad Chille Da Lua & co n-derna crecha dermári, & cor' marb Diarmuid Ua Cuind & O Líghda & sochaidhe archena, & urmor in choicidh do fhásugudh don coblach cétna.
Crecha Saidne & crecha Desceirt Bregh la Tigernan Ua Ruairc co Feraib Brefne, co tardsad buár diairme & cor' marbsad Mac Gilla Sechlaind, ríg Desceirt Bregh, & Gilla Énan mac Lughadha, taisech Cuircne.
Cloicthech Tulcha Aird cona lán do daínib do loscud lasin archoin cétna .i. la Tigernán.
Diarmuid Mac Murchadha, rí Laigen & Gall, & fer buaidhirtha na Banba & aidhmillti Erenn, iar toichestal Gall & iar n-gnath-milled Gaedel, iar n-argain & iar n-dian-scailedh chell & coicrich, do ég iar cínd bliadne do galar etualaing tria mirbuile Findén & Cholaim Chille & na naem aile ro airg.
Braighdi Domnaill h-Úi Bríain la Ruaidhrí h-Úa Conchobair.
Domnall Ua Focarta, rí Éile Desceirt, do marbad la Domnall mac Donncaidh Maic Gilla Padraic, ríg Osraigi, co n-ár adbal aile.
Cath Atha Cliath etir Miligh Gogan & Asgall mac Raghnaill ríg Gall, co n-dorchair iarom and Aschall & Eoan Lochlandach, et alii multi.
Maghnus Ua h-Eochada, rí Ulad, do marbad la brathair féin.
Sluaiged la Ruaidhri Ua Conchobair & la Tigernan h-Úa Ruairc & la Muirchertach h-Úa Cerbaill, ríg Airgiall, co hAth Clíath do forbaisi for Ath Cliath & ar in Iarla & ar Miligh Gogan. Deabaid & imresain aturo re re caictísi, cor' scailset Leth Cuind, co n-dechaidh h-Úa Concobair a condi Laighen, & co n-dechatar marc-shluagh Fer mBreifne & Airgiall do buain arba Saxanach. Do-chuaidh an t-iarla & Miligh Gogan i l-longport Leithi Cuind, cor' marbsat sochaidhi da n-daescur-sluagh & rucsad a lon & a n-edaighe & a caiple bitaille.
Sluaiged la Tigernán h-Ua Ruairc co Feraib Brefne cor'{folio 25b2} airg co h-Ath Clíath, cor' cuirsed debaidh & Miligh Gogan cona ridirib, cor' muidh for Ua Ruairc, co torchair and Aed mac Tigearnaín, rígdamna Brefne, im Ua n-Donncadha & im Donncadh Ua Cuind im mathaib Oirghiall.
Roberd mac Stemni do gabail la Gallu Locha Carman iar cur áir a muntire, & a lecan as iarsin do Mac na Perissi.
An t-Íarla do dul a Saxanaib i n-aighidh Enric ríg Saxan, co toracht-sidhi a n-Erinn sechtmuin ría samuin co Port Lairge, co taníc Diarmuit Mac Carrthaigh, rí Desmuman, ina theach. Luidh as-sen co hAth Cliath, cor' gab rige Laigen & Fear Midhe & Brefne & Oirghiall Ulad.
Pétrus espoc Cluana Ferta Brénainn do bádudh ic Port Da Chaíneóg ar Sinaind.
Kl. enair for satharn & ail uathaidh fuirri.
Drem do muntir Maic na Perisi do thiachtain o Ath Cliath ma Ugha de Laithe co Fabur, cor' caithsed a biad re caecthighis & do loiscset in baile. Lotar as-sen co Cill Achaidh, cor' airgsed an chill & cor' marbsad drem dia daínib, & cor' loisc iarsin.
Amus la Coin Aifne mac Aedha Uí Concobair Failge for muntir in Íarla i Cill Dara, cur' marbad drem dona Gallaib and & do Uib Failghe.
Mac maic Domnaill Uí Briaín, rígdamna Muman, do marbad la h-Uib Conaíng.
Enric rí Saxan do dul a Saxanaib aris iar n-gabail Lethe Mogha & oirrthir Leithi Cuind.
Tigernach Ua Mael Eóin, comurba Ciarain Cluana Maic Nóis quieuit.
Brigdin h-Úa Cathalan, comurba M' Aedhoig quieuit.
Gilla Asalta, senchaidh Ruaidhrí Uí Concobair ríg Erenn,
Tighernan Ua-Ruairc, rí Brefne & Conmaicne & urmoir crichi Midhi, & coimsidh crich n-Oirgiall, flaith choicidh Connacht, onchu gnimartach na n-Gaedhel, fer bagha & buan-cosanta Lethi Cuind, crechaire & indsaigheach Erenn, letroman na n-Gaidhel ar thresi & ar línmairecht, do marbad la h-Eoan Mear & la Ricard mac in Íarla & la Domnall mac Andaigh Uí Ruairc, a Cnuc Tlachtgha a fill, & a corp do breith léo co h-Ath Cliath dia tescadh & dia tarraíng.
Muirchertach Ua Briain & Murcadh Mac Murcadha do marbadh do muntir Maic na Perisi tria mebail.
Crech fhill la mac Maic Andaigh & lasna Saxanachaib ar Muntir n-Angaile & ar Muntir n-Gillgan, co rucsat bu & bruit imdha.
Sluaiged doridhise lasna Gallaib cétna & la mac Maic Andaigh Uí Ruaircc co h-Ardachadh Espuic Mael, cor' airgsit an tír ar medhon. Ocus as leo a-torcair Domnaill O Fergail, taisech Muntire h-Angaile & Sil Fínghin don chur-sin.
Senudh Erenn la cóicidh Connacht, laechaib, cleirchib, ic Tuaim Da Gualand, im Ruaidhrí Ua Concobair im ríg n-Erenn & im Chadhla Ua n-Dubtaigh, aird-espoc Connacht, & tri tempuill do cosecradh léo and.
h-Úa Caellaidhi, leth-rí Osraigi, do marbadh la Domnall mac n-Donncadha Maic Gilla Padraic.
Gilla Aedha h-Úa Muigin do muntir Airidh Locho Con, espoc Corcaighe, tuir chrabaidh & egna & oighe na h-Erenn, 'arna naemadh o Dhía, quieuit.
Mac Gilli Espuic, taisech Clainne Ailebra, rechtaire Catha Monaigh, do marbad la Donn Sleibe Ua n-Eochadha, la rig Ulad, a fill, & na slana badar aturo .i. maithe Ulad, do marbad Duinn Sleibe ind.
Kl. enair, luna .x.ííí., feria secunda. Millesimus centesimus septuagesimus tertius ab Incarnatione Domini.
Dond sleibe,{folio 26a1} rí Ulad, do marbad do Úib Eachach Ulad & da brathair fen.
Ua Cobthaigh airdespoc Cenéoil Eogain, quieuit.
Cinaeth Ua Ronan, espoc Glinni Da Lacha & tuaisceirt Laigen, quieuit.
Edruth h-Úa Mandachan aird-espoc na Midhi quieuit.
Conaing Ua h-Aengusa, cend cananach Rosa Cre.
Mael Mochta Ua Fidhabra, ard-ab Cluana Maic Noís quieuit.
Domnall Breghach Ua Mael Sechlainn, rí Midhi, do marbad la h-Art Ua Mael Sechlainn le mac a athar féin, & la Muintir Láighechan a n-Durmuigh Coluim Chille. Art ina inadh.
Aedh Ua Con Chenaind do ég.
Lochlaind mac Maic Lochlainn do marbad.
Sluaiged la Domnall Ua m-Briain d' innsaighidh caislén Cilli Caindigh & na n-Gall ro batar ann, & cath iarthair Connacht araen ris 'arna cur do Ruaidhri do ríg Erenn lais, im Concobar mac Ruaidhri, & ad-clos na scela-sin dona Gallaib. Ro facsat caislen Cille Caindigh & rancatar co Port Lairge. Ro brisidh an baile tar eis na n-Gall, & ro h-airgedh an crich uile. Ba dimbaigh le Gallaib Erenn an imgabail-sin.
Teidm mor ro marb daíni imda a Connachtaib & a Mumain isin bliadain-sin.
IMpodh do mac Domnaill Caemanaigh ar mac an Íarla, & ár do thabairt leis ar Gallaib.
Domnall mac Andaigh h-Úi Ruairc do marbad d' áes gradha Thigernain Uí Ruairc. Gilla Tighernain mac Gilla Th' Aedhoic h-Úi Mael Brighdi in t-óclach ro buail é, & a leathlam do búain de, & a cur 'cum Ruaidhrí Uí Choncobair & do chur h-Ua Concobair tairrngi trempi a mullach caislen Tuama Da Gualann.
Les Mor do argain do mac an Iarla.
Mael Issu mac an Báird, espoc O Maíne, d' ég.
IMar mac Carrgamna, taisech Munntire Mail Sinna mortuus est.
Sitriuc Ua Flandacan, rí Airthir Theftha, do marbad d' Airthir Midhi.
Kl. enair for mairt & .xx.uii leg. iiii fuirri tresbliadan for bisex.
Mael Isu h-Úa Connachtan, espoc Sil Muiredhaigh mortuus est.
Gilla Maic Líac, comurba Patraic quieuit.
Muirgius h-Úa Dubthaigh, cét-ab mainistrech Atha Da Loarg ar Buill.
Plorínt O Gorman, ard-maighistir Arda Macha, do ég.
Gilla Mo Cathbeo, ab reiglésa Petair & Póil, do ég.
Amlaim Ua Cuind, taisech Muntiri Gillgan mortuus est.
Ruaidri h-Úa Cerbaill, rí Eile, do marbad dia brathair fén ar lar Indsi Clothrand.
Congalach Ua Con Fiacla, rí Tebtha mortuus est.
Sluaiged lasan Iarla do índrudh Muman. Sluaiged aile la Ruaidhrí Ua Concobair la ríg Erenn a n-Urmumain d' furtacht na Muman ar an Iarla. Batar na Goill i Caisil andsin. O 't-cúalai in t-Íarla & na Goill rí Erenn do thecht a n-Urmumain d' iarraidh chatha, cuirter fesa uathaib co h-Ath Cliath ar cend ar' fhacsat and do Gallaib co tancatar o Ath Clíath aen-cath crodha
Mael Ruanaid Ua Ciardha, rí Cairpri, do marbad do Gallaib Atha Cliath isin bliadain-sin .i. do mac Turnín & do mac Aedha h-Úi Ferghail & Cellach Ua Findallan rí Delbna Moire leo beous tria mebail.
Long do bádudh allaniss do Luimnech & ro báidh{folio 26a2}edh sochaidhe do degh-dhaínib innti, im Tadhg mac Uí Choncobair & im Ó n-Ócán & im Uib Cendédigh & im Uib Dedhaigh et ailii.
Fairchi Iarthair Midhi do chur le cathair Cluana Maic Nóis do réir clerech Erenn in bliadain-sin.
Mael Sechlainn Ua Donnacán, rí Aradh, do marbad d' Ú Conaing.
Kl. enair for cétain & luna .u. fuirri, & .iii. for bisex.
Tadhg in t-Slebe mac Ruaidhrí do bádhadh a caraidh Doghair & araill do macaib righ Dal Cais aráen ris.
Maghnus h-Úa Mael Sechlainn do chrochadh do Gallaib Atha Cliath & Tulca Airdi.
Diarmuit mac Taidhg I Briain & Mathgamain mac Tairrdelbaig Ua-Briain do dallad do Domnall O Bríain i Caislen I Chonaíng ar lar a thighe fén. Mac in Gilla Leithderg I Chonchobair do marbadh la Domnall O m-Briain isin lo cétna.
IN t-espoc O Briain, espoc Cilli Dara, quieuit.
Mael Issu mac in Cleírig Chuirr, espoc Ulad, quieuit.
Cluain Iraird do argain do Gallaib.
Fergal Ua Braín do marbad do Gallaib Atha Truim.
Da chreich díaidh a n-díaidh la Gallaib for Muntir Sercacháin & for Muntir Mail Sinna.
Teichidh d' Feraib Teftha, laechaib, cleirchib.
Durmach Colaim Chilli & Midhi uili d' fhasughudh ó Ath Luaín co Drochad Atha do Gallaib.
Domnall Caemanach Mac Murcadha, ri Laigen, do marbad la h-Uib Níallan.
Gilla Coluim h-Úa Mael Muaidh, rí Fer Cell, do marbad do Ruaidhri mac Concobair Mec Cochlain tria mebail.
Tadhg mac Fergail Uí Ruairc occisus est.
Gilla Domnaigh mac Carmaic, espoc Ulad quieuit.
Sluaiged la Ruaidhrí Ua Concobair i Tuadhmumain cor' indarb Domnall O Briain a n-Urmumain, & tuc rigi Tuadmuman do mac Murcaidh h-Úi Briáin, do mac a máthar fen.
Tancatar Gaill Atha Cliath & Puirt Lairge & Domnall h-Úa Gilla Padraic, rí Osraigi, fo thogairm ríg Erenn .i. Ruaidri Hua Conchobair, co rancatar Lumnech cen rathugud do Dail Cais, cor' airgsed Lumnech, & cor' loisced Connachta urmór Tuadhmuman don turus-sin.
Cadhla Ua Dubtaigh do thiachtain a Saxanaib o Mac na Perisi & sith na hErenn lais, & a righe, etir Gall & Gaedel, do Ruaidhri Ua Chonchobair, & a chóicedh do gach coicedhach o ríg Erenn, & a cissa do Ruaidhri.
Mor-coblach la ríg Erenn for Loch Dergderc, cor' dithlaithrigh Urmuma uile & co tuc .uii. m-braighdi ó Uib Briain tar cend a righi & a feraind.
Kl. enair for dardaín & .xuí. fuirri.
INis Cathaig do argain ona Saxanachaib ro batar a Luimneach.
Domnall Ua Briain, rí Tuadhmuman, do denom sitha re Ó Conchobair & do thabairt braighed dó.
Gilla Comgaill Ua Tuathail, rí h-Úa Muiredhaigh mortuus est.
Da fiched dona Saxanachaib do marbad do mac Gilla Padraic Uí Chiardha.
Riccard íarla Atha Cliath do ég. In nech nach tanic a n-Erinn tar éis Tuirgeís dibergach as mo ro mill anáss. Uair ro mill Conmaicne & Midi & Leath Mogha, itir chill & tuaith, cor' marb Brighid esin, co faicedh fen ina fiadhnaise í oca marbadh.
Niall mac Maic Lochlainn do marbad do Dáil m-Buinne.
Crech la Gallaib Atha cliath, co rancatar Sliab Fuait & doirrsi Eamna, co rucsad Oirgialla orro i Fidh Chonaille, cor' cursed ar forro ota sin co Tulaig Aird & co h-Ath cliath, cor' marbad .u. cét do Gallaib.
Domnall mac Tairrdelbaig h-Úi Briain, rígdamna Muman, do éc.
Domnall mac Toirrdelbaig h-Úi Conchobair mac ríg Erenn,
Díarmuit mac Cormaic Mec Carrthaig, rí Desmuman, do gabail do Cormac Liathanach, da mac fen.
Cormac Liathanach Mac Carrthaig, rí Desmuman, do marbad a fill dia muntir fen iar n-aithrigadh {folio 26b1} a athar, & an t-athair do gabail na righi iarsin.
Domnall Mac Gilla Padraic, rí Osraigi, do ég.
Domnall mac Gilla Padraic, rí Cairpri Ó Ciarda, do marbad a fill do h-Úa Mael Sechlainn.
Art h-Úa Mael Sechlainn do aithrighadh do Feraib Midhi & rigi do Dondchadh Ua Mael Sechlainn.
Glenn Da Lacha d'argain do Gallaib.
Flann mac Donncadha Uí Mael Sechlainn do marbad o Chairpri O Ciardha.
Cú Muighe mac Ín Deoradh h-Úi Flainn, rí Tuirtri, do marbadh da oireacht fein a fill.
Derbfhorgaill, ingen Fiachra h-Úi Flaind, ben Aeda h-Úi Raduib, do ég.
IMar h-Ua Ruaidhin, espoc Ua Fiachrach, do éc.
Sadb, ingen I Chuind, ben I Con Chenaind, d' ég.
Sluaiged la Mael Sechlainn mac Maic Lochlainn & la Cenél Eogain & la h-Oirgiallaib d' indsaighi caislen Shlaíne, cor' airgsed in caislen & ro marbsad Ricard Plemendach in Gall rob eir and, & .u. cét do Gallaib maille friss, & ro cuir sin egla mór a n-Gallaib.
Aedh mac Gilla Bruite Uí Ruairc, rí Brefne, in treas Aedh as fherr do bai a n-Erinn ina aimsir féin, do ég.
Domnall Ua Maille, rí Umaill, do ég.
Kl. enair for satharnn & .iiii. fichit fuirri & cét-bliadan for bisex.
Murchadh h-Úa Beollan, comurba Droma Cliab & Colaim Cille, do ég.
Crech la Gallaib Atha Cliath & la Gallaib Atha Truim a n-Iarthar Midhi, cor' gabsat ni do buaib Muntire Tadhgan, Tínolaid Munter Tadgain & rucsat orro, & ro bensat in crech dib & ro marbsat Uga Sirrisbel et alios.
Eoán na Cuirti do dul co Dun Da Leathglass, cor' milled in baili leis, & Ulaid uile do milled lais, co tucadh maidm fair ann, & cor' marbad maithe a muntiri & cor' gabad e fein.
Tempall Tigi Saxan do loscadh o chair tenidh.
Cuilén Ua Cuilen do dallad do mac Maic Carrtaigh a n-dighail marbtha a maic .i. Cormac hoc anno.
Amlaim h-Úa Domnallan, ollam Connacht re dan, do ég.
Aed h-Úa Neill, rí Ceneoil Eogain, do marbad la Mael Sechlainn mac Maic Lochlainn.
Cith cloic-snechta do ferthain a Cuircne .i. a n-Druim Cliabaigh, & ro mill Gním na Tri Sesreach, & ba commor re h-uball fiadhan gach cloch dib.
Domnall Ua h-Egra, rí Luigne mortuus est.
Trí loíngsi do Saxanachaib do thecht a n-Erinn .i. longes Ugha de Laithi & longes Uilliam maic Atalín & longes Pilip de Preis. Uga co h-Ath Cliath. Uilliam co Loch Garman, Pilip co
Miligh Gocan d' índarba do Ugha o Ath Cliath co Corcaigh.
Mael Morda mac Faelan, rigdamna rob fherr do Laignib, do marbad do Uib Tuathail a fercongal.
Tomaidm mór uisci, co m-ba samulta la sliab ar meit do dul tre lar Glinni Da Lacha, co ruc drochaid & muille in baile leis, & cor' facaib ní da iasc ar lar in baile, & co n-dechaidh a n-Inber Mór, & cur' báidh an t-iascaire & co rug a lín isin fairrge.
Sluaiged la Gallaib Atha Cliath & Tulcha Aird ma Miligh Gocan a Condachtaib cen rabad rompo, co rancatar Ros Coman, & tri h-aidhchi doib a Ros Coman, & tic Murchadh mac Ruaidhri cuccu andsin, & tic ar eolus rompo ar fud Connacht.
Tarrustair immorro Ruaidri h-Úa Concobair, rí Erenn, a n-iarthur Connacht ar cuairt rige in tan ranic fis na n-Gall chuice. Ro loiscet Gaill in Machaire rempo & Oilich Find & Ferta Geígi & Imleach Fordeorach & Imleach m-Broccadha & Dun Imdain, & tancatar na Gaill có Ath Mogha & a Fidh Manach & a tochar Mona Connedha, & a Slighidh Móir Líge Gnathail, & tar Ath Fine os ur Dune Móir, & co Tuaim gach n-díreach; & ni dernatar crech na ruathar ar fad in choicidh, ar ro teichsit Connachta ina n-dangnib. Ocus ro falmuighedh Tuaim & ro losced Cell{folio 26b2} Benéoin & Cell Medhoin & Leccach &
Murcadh mac Ruaidhrí do dallad la Sil Muredhaigh & la Ruaidhri fein ina mignimaib.
Maidm ar Chenel n-Eogain & ar Ulltaib re n-Gallaib Duín Da Leathglas, & Concobar Ua Cairellan as fherr a-torchair ann.
Cella Machairi na Muman do loscad do Domnall Ua Briaín & re Miligh Gocan & re Pilip Cnam & re Henric & mac Steimni, & ro imposat cen riar ar ecla Dal Cais.
Kl. enair for domnach & nómadh uathaidh fuirre, & bliadan tosaigh naidhecdha & bliadan tanaiste for bisex.
Sochaidhe do Saxanachaib do marbad la h-Úa Faelan ríg
Concobur Maenmuighe mac Ruaidhri Uí Chonchobair do breth ar ecin a h-índsi Locha Cuan do Mael Chulaird Ua Flaithbertaigh & do Cathal h-Úa Flaithbertaigh & do Gilla Beraigh h-Úa Sluaghadhaigh & da aes gradha archena, arna beith bliadain a l-laim ica athair ina ecóraib fen.
Gaill Atha Cliath im Ugha do thecht ar creich ar Feraib Cell, & tanic Uga de Laithi ruadh-chath romór do argain Cluana Maic Nóis, & nir' leicset Connachta codladh na h-aidchi-sin doib, & ro h-imcuiredh co moch arnamarach é ar egla Ruaidhrí h-Úi Chonchobair & Sila Muredhaigh do breith orro a Cumang Cluana.
Aedh h-Úa Flaithbertaig, rí Iarthuir Connacht, do ég a n-Enach Dúin.
IN Gaillem do tragudh a Oilen na Cleireach co muir o trath iarmeirghi co medhon lái arnamarach, & tochar mór eisc d'fhaghail indti.
Caislen Cenanduis do denom la Gallaib.
Sic mór co n-dechas do cois locha Erenn ri re mís.
Bachall Colmain maic Luigdech do beth ag imagallaim re mac cleirech fein co fiadhnach isin bliadain-sin.
Ailén do thecht ar Sinaind, & ni fes can as tánic.
Crech la Gallaib Locha Garman a n-Uib Muiredhaigh, cor' marbsad Dunlang h-Úa Tuathail, ríg h-Úa Muiredhaigh.
Domnall Ua Focarta, espoc Osraigi quieuit.
Maidm ria n-Art h-Úa Mael Sechlainn & re n-Uib Failghe & re Gallaib for Delbna Eathra & for Mael Sechlainn m-Becc & for drem do Feraib Teftha, inar' marbad Muirchertach mac in t-Sinaigh.
Cath etir Gallaib & Ultaib & Airgialla ac Iubar Chínd Trachta, cor' muidh for Gallaib, co n-dorchair ceithri cét co leith dib and, & a-torchair cét do Gaidelaib a frithghuin in chath-sin, ím h-Úa n-Ainbeith, ríg h-Úa Meith, & Murcadh h-Úa Cerbaill, ríg Oirgiall, & Ruaidhrí mac Duinn Slebe Ua Eochadha uictores erant.
Tucsut didiu h-Úi Fhailghe maidm mór ar Gallaib isin bliadain-sen.
Tadhg mac Murchertaig I Briain & Tadhg mac Taidhg h-Úi Briain do thabairt air moír ar muntir Domnaill h-Úi Briain.
Loch Gair do argain do Cuilen na Cláenglaise.
Na Gaill do batar a n-Dun Da Lethglas do dilgend la Cenel Eogain & la h-Ulltaib & la h-Airgiallaib tre mírbuilib Padraic & Coluim Cille & Brenainn.
Ranic Éoan na Cuirti ar écin [gap: text breaks off imperfect/extent: unknown]