M.l. Kl. secunda feria .uii. luna. M.l.
Mael Ruanaid mac Conchobuir, ri Éile, do marbadh dia muntir fén a mebail.
Cluain Maic Nóis do argain fo thri issin aen-raithe, fecht o Sil n-Anmcadha & fo dó h-ó Callraidhi cusna Sinnchuib.
Donnchadh mac Gilla Faelán, rí h-Úa Failge mortuus est.
Land Léire do argain & do loscud la Concobur h-Úa Mael Sechlainn.
Genimain Muirchertaigh h-Úi Bríain ríg Erenn.
M.lí. Kl. ui. leg. iii feria x.u. luna. M. lí.
Murchadh mac Bricc rígdamna na n-Dessi occisus est ona brathair fen.
O Concobair, rí O Failghe, do marbadh da muntir fein.
Faelan mac Bratain maic Bricc do marbadh a n-dam líag Lis Moír Mo Chuta, is se ro marb Mael Sechlainn mac Muirchertaigh maic Bricc.
Amalgaidh mac Cathail maic Ruaidhri, rí Iarthair Connacht do dallad la h-Aedh h-Úa Concobair la ríg Connacht, cor' gab-side iarsin árus a n-Iarthur Connacht.
Maidm lé O Mael Doraidh for Chonnachtaib dú a torchair ile.
Cathal mac Tighernain, rí Brefne, do dul for creich a n-Eaba cor' toghail Dun Feíg, a torchair .l. do daínib & asa tuctha .uii. cét bó.
Diarmuit mac Domnaill maic Briain do marbad a mebail la Murchadh mac m-Briain.
Maidm for Conmaicnib a Sleib Formaela ria n-Aedh h-Úa Concobair, du a torchair ár Conmaicne.
Laidgnen mac Mailain h-Úi Leochaín, rí Gaileng, do dul do Roim co n-erbailt tair íar tiachtain o Roim.
Domnall Bán ó Briain occisus est o Aedh h-Úa Concobair ríg Connacht.
Bile Muighe h-Adhair do trascradh la h-Aedh h-Úa Conchobair.
M.líí. Kl. quarta feria .xxuii. luna.
Mac Raith h-Úa Donnchadha, rí Eoganachta Caisil, rígdamna Muman, do éc.
Crech la mac Mail na m-Bó a Fini Gall, cor' loisc in tír o Ath Cliath co h-Ailbine, acht nocho tarraidh bú, co n-dernsat scandracha móra imon Dun, du a torchair ile ille & anund, co n-dechaidh rí Gall tar muir .i. Eachmarcach mac Ragnaill, & ro gab mac Mail na m-Bo rige Gall da eissi.
Ár Callraighi imma righ .i. im Mac Airechtaigh, la Conmaicne per uirtutem scríne Cíaran.
Crech la h-Úa Concobair for Conmaicne, cor' índair co mor an tir.
Mac Mail na m-Bó do gabail righi Atha Cliath ar écin.
M.líííí. Kl. ui. feria .uii. luna.
Cu Chíar h-úa Maile Duin, rí Luirg, do marbadh la Mac na h-Aidche Ua Ruairc a mebail ina airechtas fen. Fergal mac Maic na h-Aidche h-Úi Ruairc do marbad do Chonmaicnib fo chétoír.
Niall h-úa Écnigh, rí Fer Manach, & Gilla Crist a brathair do marbad do Feraib Luirg a mebail.
Mael Cron mac Cathail, rí Desceirt Bregh, do marbadh do Uu Riacan aidhchi luain chasc, & crecha lais for Gallaib.
Sluaiged la mac Briain & la h-Úa Mael Sechlainn a Fine Gall, co tucsat etiri & co tucsat na Sinnaigh bruit moír a dam líag Lusca, & rucsat etiri o mac Mail na m-Bó.
Sluaiged la mac Mail na m-Bó a mBregaib & a Midhi, co ro loisc o Shláine co h-Iarthur Midi, & co ruc mor da buaib & do broit.
Crech la Lethlobur h-Úa Laidhgnén, rig Oirghiall, for Gailengaib & for teichedh Fer Midi co ruc már do buaib, co n-dechaidh ina n-díaidh Congalach mac Senain, rí Gaileng, co tarraid bu Fer Manach, co tarrthatar Fir Manach imon righ .i. Domnall mac Mail Sechlainn {folio 19a1} co torchair léo Congalach mac Senain rí Gaileng cum multis.
Cochlan rí Delbna do marbad a suis. Per dolum occisus est.
Kl. uii. feria. luna .xuiii
K. uii.
Aedh h-úa Fergaile meic Conaing maic Neill, rígdamna Ailig & rí Cheneoil Eogain Tolcha Óc do marbad do Lethlobur h-Úu Laidhgnén ríg Airghiall cum muiltís.
Cloictheach tenedh do faicsin i r-Ros Dela dia domnaigh fhele Gíuirgi ria ré .u. n-uár do ló, & eoin duba diairme índ & as, & aen-en mor a medon, & teigdis fo cluim-sidhe na h-eoín becca
Loch Suidhi Odhrán a Sleib Gúaire do éludh a n-deredh aidhche fo fhéil Michil, co n-dechaidh isin Febail.
Cacht ingen Ragnaill, rígan Erenn, d' éc.
Cath eter Albancho & Saxancho, inar' toitset moran do miledhaib.
Crech la h-Aedh h-Úa Concobair la ríg Connacht co Corco Baiscind & co Tradraighe, cor' gab gabala diairme, & co n-dorchair lais don cur-sin Aedh mac Cenneidigh, ordan Dal-Cais.
Da mac Carrthaigh do marbadh d' U Dondcadha.
Sluaiged la mac Mail na m-Bó & la Gilla Patraic ríg Osraige co n-Gallaib & Laignib & Osraighib issin Mumain, co rancatar Imlech Iubair & cor' loiscet Dun Tri Líag, & ni tarraidh mac Briain, uair ro bái a n-desciurt Erenn.
h-Ua Gerr Uidir, espoc Cilli Da Lúa quieuit.
M.lv. Kl. prima feria luna xx.ix.
Domnall rí O Fiachrach Aidhne tre tangnacht ad-bath.
Crech la h-Aed h-Úa Concobair, ríg Connacht, ar Iarthur Midhi, co ruc gabala imda & bruit moir lais.
Crech la Dail Cais a Corco Mruad, co tucsat gabala mora esti, & ro marbadh sochaidi do Dáil Cais and.
Cath etir Dub Da Leithe, comarba Patraic, & Murchadh h-Úa Mail Sechlainn, comurba Fínden & Coluim Cille, a cosnum Martraigi, co memaidh re comurba Patraic & re m-Bachaill Issu, co torchratar ili ann.
Mael Duín mac Gilla Odran, espoc Alban & ordan Gaedel o cleircib, in Christo quieuit.
Cend Faeladh leth-rí Ciarraighe do marbadh do Choncobur mac Muiredhaigh do rig na leithe aile do Ciarraigi.
Gilla Padraic rí Osraige do éc.
Crech la Murchadh h-úa m-Briain ar Corco Mruadh, co tuc crech esti, cor' loisc dam liag Cilli Fíndabrach, & co torchair sochaidhi mór ind.
M.luí. Kl. ii. feria. luna x.
Cetfaidh espoc, cend crábaidh Muman, quieuit.
Mac Cernachain Guit do marbadh do Chonchobur h-Úu Mael Sechlainn. fec so
Fland Mainistreach ughdar Gaidhel, etir léighind & t-senchus & filidecht & airchedal in .uii. kl. Decimbris, xui. lunae, uitam feliquiter in Christó finiuit.
Odhar mac Flaind, rí Callraighe, iugulatus est.
Domnall mac in Guit do marbad do Chonchobar h-Úu MaelSechlainn.
M.luíí. Kl.iiii. feria luna xx .i.
Dungal h-Úa Donnchadha rí Caisil occisus est.
Cath etir Firu Manach & mac Neill h-Úi Ruairc .i. Ualgarg, co torchair mac Neill cum multis.
Mael Ruanaid h-Úa Focartaig, rí Desceirt Eli occisus est.
Mugron h-Úa Mutan, comurba Barra & espoc, occisus est oa muntir fen ar taidecht ón iairmerghi.
M.luííí. Kl. u. feria. luna ii. M.l.uiii.
Lulach, rí Alban, do marbad la Mael Coluim mac Donnchada per dolum.
Creach la h-Aedh h-Úa Concobuir & lasna Sinncho, coro airgset Lothra.
Sluaigedh la mac Mail na m-Bo isin Mumain, coro loisc Luimneach, & conus-tarraid Donnchadh mac Briain, co tard cath do, cor' muidh for mac m-Briain, cor' marbadh and Cairbre h-Úa Lighdha comurba Ailbe; & Rigbardan mac Concorne,
Longes la mac ríg Lochland, co n-Gallaib Indsi Orcc & Indsi Gall & Atha Cliath, do gabail rigi Saxan, acht nocor' deonaig Dia sin.
Mac Bethadh mac Findlaich, aird-rí Alban, do marbad do Mael Colaim mac Dondchada.
Gallbrat h-Úa Cerbaill, rína Temrach, do marbad la Concobur h-Úa Mael Sechlainn tre mebail.
Domnall mac Neill Uí Ruairc occisus est.
M.luíííí. Kl. ui. feria. luna .xiii.
Concobar h-Úa Mael Sechlainn do loscud & do argain Findabrach Eaba & Dubadha.
Sluaiged la Diarmuit mac Mail na m-Bo co Midhi, co fargaib drem moir dia muintir and, im Murchertach mac n-Dalbaigh mac Mael Ruanaid.
Niall Ua Mael Doraig, rí Cenéoil Chonaill, do éc i n-aithrighe.
Ruaidrí h-Ua Gadhra, rígdomna Luigne, occisus est.
Dúarcan h-Úa h-Eagra a suis occisus est.
Cathal mac Tigernain maic Neill maic Aedha h-Úi Ruairc, rí Brefne & Airrthir Chondacht, do marbadh do Aedh h-Úu Ruairc .i. Aedh mac Airt Uallaig.
Creach-sluaiged la Diarmuit mac Mail na m-Bo isin Mumain, coro loisc Dun Maic Ingair & Aenach Tédi & Dun Furudran.
Congalach h-Úa Riacan, rígdamna Temrach, do marbad la Murcadh mac n-Diarmuta. Gilla Caemgin & Gilla Comgaill & Mael Mordha mac maic Faelan do marbadh don Murchadh chétna.
Murchadh mac Murchadha h-Úi Bricc, ri na n-Dese Muman, do marbad la mac Gilla Brighdi h-Úi Faelan.
O Faircellaig comurba M' Aedoíc la Condachta & la Laigniu, quieuit.
Dondchod mac Briain do dul a teach Ruaidri h-Úi Choncobair rig Connacht, co tucadh a riar do braighdib dó.
M.lx. Kl. uii. fería. luna. xx.íííí.
Cenannus do loscadh & Leithglend ex maghna parte.
h-Eili & Ua Focartai do argain Cluana Mac Nois, co rucsad bruit moir o Chrois na Screbtra, & cor' marbadh dis and .i. mac leigind & oclach eli, co ro isis Dia & Ciaran Delbna ina n-díaidh, cor' laissed a n-ár am rigdamna h-úa Focarta, air is esidhe ro marb in fer leigind. Do-rocht tra a m-bu trath eirgi do lo arnamarach co Cluain tre fertaib Ciarain.
Anadh h-Úa Lochlaind, rí Corco Mruad mortuus est.
Mac Briain do dul a teach maic Mail na m-Bo, co tuc seoit & maine imda dó.
M.lxí. Kl.
Sluaighedh la h-Aedh h-Úa Conchobair 'sa Mumain, cor' loisc Cill Da Lua & cor' scail coraidh Cínd Choradh co lar, co n-duatarfec so na bratain ro batar a tiprait Chínd Chorad, cor' muradh
Teidm mor a Laignib .i. in bolgach & treghaid, cor' ladh ár daíne sechnón Laighen.
Murchadh mac Diarmuda maic Mail na m-Bó do dhul a Manaínd, co tuc caín esti & cor' bris for mac Ragnaill.
Niall mac Mail Sechnaill, rí Ailig, do éc.
Fland h-Úa Cellaig rí Bregh do marbad dona Saitnib.
Mundter Murchadha do gabail for Loch Oirbsen, cor' athrighsat O Conchobair.
Gairbíth h-Úa Fallomain do marbad la Gairbith h-Úa Cathusaigh, rig Fer m-Bregh.
Gairbíth rí Bregh mortuus est.
Ua Cathail, rí Eoganachta, do tabairt a dam liag Maenaigh & a marbadh.
Mac Dunlaing, rí h-Úa mBríuin quieuit.
Ruaidhri h-Úa Flaithbertaigh do marbad la h-Aed h-Úa Conchobair.
Niall mac Mail Sechnaill, rí Ceneoil Eogain in Christo quieuit.
Flaithbertach O Briain do marbadh do Choncobar O Briain.
Mlxíí. Kl. iii. feria. luna xui.
Tadhg mac Aeda h-Úi Concobair do marbadh do mac Aeda maic Ruáidhri a fell.
Eochaid mac Neill meic Eochadha rí Ulad mortuus est.rí Ulad
h-Úa Mail Doraigh, comurba Cholaim Cilli quieuit.
Mlxííí. Kl. Ian. iiii. feria, luna .xx.uíí. Bliadan deirid chiccail .i.d..xxx.ii. Dionisi inso.
Gilla Erraith h-úa Mael Mithigh, ard-oicthigern na n-Gaedhel, mortuus est.
Cathal mac Dondchada, rí O n-Eachach & Descirt Erenn, occisus est on Fhíndshuilech.
Mac Eochada, rí Ulad quieuit.
{folio 19b1}Sluaiged la Toirrdelbach h-Úa m-Briain & la mac Mail na m-Bó, cor' loiscet Luimnech & co [...] Luachair iarsin. Tanic mac Briain & a mac Murchadh co socraidi moir tar Sinaind atuaidh, cor' gabsat gabala ic Sliab Ardachaidh a n-Eoganacht, co tarraidh Tairrdelbach iat im Eas Moíngelan, & gnither cath eaturro, cor' muid ar mac m-Bríain & ar a mac, cor' ladh
K. u.
Dub Da Leithi, comurba Patraic, quieuit.
Donnchadh mac Briain Boroma, rí Muman, do athrighad, & a dul do Roim dia ailithri, co n-erbuilt iar m-buaidh n-aithrighe a mainistir Sdefain.
Ardgal mac Lochlaind h-Úi Neill mortuus est.
Kl.feria .uii. luna .xx.
Orgain Cluana Maic Nóis do Conmaicne & do Uib Mane. Cluain Ferta Brenaind do argain arnamarach doib. It e andsa na righ ro batar acon argain-sin .i. Aedh mac meic Neill h-Úi Ruaircc, ri Brefne, & mac Taidhg h-Úi Cellaigh & a mac. Tuc Aed h-Úa Concobair maidm forro arnamarach tre rath Chiarain, co fargsat a muntir & a longa tucsat léo ón fairrgi aníar tre lar Condacht co Sinaind. Diarmuit mac Taidhg h-Úi Cellaig & a mac & h-Úa Flaithbertaigh do marbad la h-Aedh h-Úa Conchobair ria cínd m-bliadne. h-Úa
Mac Mail Miadhaigh h-Úi Eolais do marbad la Ua Concobuir.
Dondchadh h-Úa Mathgamna, rí Ulad per dolum occisus est.
Donnchadh h-Úa Loingsigh, rí Dal Araidhe mortuus est.
Leochan mac maic Maelan, rí Gaileng, occisus est la Concobar h-Úa Mael Sechlainn.
Murchadh h-úa Briain do dul a longport Tairrdelbaig h-úi Briain a Cind Coradh, cur' ládh ár daíne and.
Kl. feria .i. luna .i..
Retla mongach íngnadh adhbal do faiscin isin aér dia mairt iar minchaisc h-ic octkalaind Mái co .ui.xx. fuirre. Rob e a med & a soillsi co n-erbartatar daíne
Gilla Bruidi mac Domnaill meic Tigernaín maic Ualgairg meic Neill uí Ruairc, rí Breifne, do marbadh do mac Gilla Chuirr h-Úi Chinaith do cois mairt ic Oilén Duinecharr ar Loch Mac n-Én.
Aibind ingen h-Úi Concobair ben h-Úi Muiricen quieuit.
Mac Conaing h-Úi Muiricen, rígdamna Teftha, do marbad la h-Aedh h-Úa Concobair & la Tadg h-Úa Muiricen. Luach .xxx. unga dh' ór do tabairt o Tairrdelbach h-úu Briain & o mac Mail na m-Bó d' Aedh h-Úu Choncobair, ar chongnum léo & a congnom leis.
Caemoran comurba Caíndigh quieuit.
K. ii.
Murchadh h-úa Carrtaigh, prim-druith & prim-ollom Condacht, do bathadh ar Loch Calgaigh.
Dond Sleibe h-Úa Gadra, rígdamna Luigne, do marbadh do
Coileachair espoc Clúana Maic Nois quieuit.
Tadhg h-Úa Muiricen, aird-ri Teftha, occissus est o Muintir Tlaman.
Sluaíged la Diarmuit mac Mail na m-Bo co n-Gallaib & Laignib & la Domnall h-úa n-Gilla Patraic co n-Osraigi & la Tairrdelbach h-úa mBriain co feraib Muman uile co h-Aedh h-Úa Concobair a Connachtaib, co tuc Aedh fuabairt forro, cur' marbadh Ó Concobair Ciarraighi and .i. rí Ciarraighi Luachra, cum muiltis nobilibus. Tancatar didiu Fir Brefne im Aedh mac Airt h-Úi Ruairc do indradh Condacht mar in cétna. Trí fichit cet a lín. Ferthair cath amnus aniarmurtach .i. Connachta im Aedh in Ga Bernaigh mac Taidg in Eich Gil, & Fir Brefne im Aedh mac Airt Uallaig meic Aeda meic Sen-Fergail, & tucad cath Turlaigh Adhnaigh eaturru, a torchair Aed in Gha Bernaigh, aird-rí Connacht uile, &{folio 19b2} caithmilid iarthair domaín, & Cu Culainn na n-Gaedhil, tuile ordain & oireachais na h-Erind, duine is mo do-bered d' etach & d' innmus, d' or & d' echaib ar a anmain a n-Erinn. Robo reil trocaire Dé dó ara maithius. Aedh h-Úa Ruaircc a righi Connacht iarom.
K. iii.
Murchadh h-úa Briaín, rígdamna Erenn, do marbad(h) la Feraib Teftha.
Domnall ua Mael Sechlainn, rí Ceneoil Eogain, duine as craibthighe ro bái a n-Erind ina aimsir fén, a fratre suo occissus est.
K. u.
Diarmait mac Matadain maic Gadhra h-úi Dunadhaigh, rí Síl n-Anmchadha, do marbadh d' ua Matadhan.
Sluaiged la Murchadh mac Diarmuda maic Mail na m-Bo a Midhi, cor' loisc Granard & Fabur Feichin & Ard Brecan. Ro marb didiu Feichin eísin gnuis do ghnuis, & ár Laigen & Gall immaille friss.