Kal. Ian. for Mairt l. xxuii. Anno Domini M. d. xxx. octauo.
Aedh Buídhe, mac Aedha, mic Aedha,
Cathaeir Modartha, mac Ui Raghalligh, saei chínn-fheadhna, do mharbadh lena Saxanachaibh in bliadhain-si.
Cathaeir, mac Mheg Fhlannchaidh, [gap: erasure/extent: half line] do dhul d'eg in bliadhain-si.
Barun Dealbhna, tigerna mor do Ghallaibh, do dhul d'eigi do in bliadhain-si.
{fol. B 116c} Semas Ruagh Shabhaeis do mharbadh le claeinn Senccin Sabhaeis etír Nollaig & fheil Brighde in bliadhain-si.
Brian, mac Neill Oig Uí Neill, do dhenam ínnsoighdhe air Níall, mac Cuínn, mic Neill Uí Neill, a caisdel na h-Oghmaidhe & sith & carrdis-Crist etorra & in caisdel do ghabhail doibh gan fhís & Níall fein, sgel mor, do mharbadh ann & Eoghan, macamh óg do budh mac dó, do mharbadh ann & Eogan, mac Emaínn Mic Somharle & Emann, mac Gilla Phadraig Mic Somharle, do mharbadh ann.
Fínghal ghranna do dhenam a Teallach Eathach, .i. Torghealbach Ballach, mac Tomais Mhaeil, mic Feidhlimídh Mheg Samhradhain, do ghabail lae cum cardisa-Crist do dhenamh re slicht Taeidhg Mheg Samradhain & teachd a ceann a chele dhoibh gu sithchanta. Do mharbh Torrghealbhach ochtar acu, .i. ceathrar da n-dhaeinibh uaisle & ceathrar eile faru & ceathrar leanam neamurchoideach. Ocus ar teacht do Fhlathbertach, mac Philib, mic Thorrgherlbhaigh Mheg Uidhir, orra, do thoirbhir siad dho in chrannog do bhi acu & do chuir Flathbertach a bharrdaegha fein uírre & do bhi si aigi feadh raithe, no gu bh-fhuair Semas, mac Philib, mic Bhriain Mheg Uidhir, a brath dho & gur' ghabh h-i & gu bh-fhuair edail mhor uírre. Semas
Niall Caech, mac Gerailt Ui Dhocharthaigh, do mharbadh a bh-fheill le claínn Fheidhlímidh, mic Conchubhair Charraigh Ui Dhomnaill.
h-Ua Flannagain Tuaithi Ratha, .i. Gilla Isa, mac Torrghealbhaidh, do mharbadh le Gilla Padraig, mac Magnasa Ui Fhlannagain & le claínn Gilla Issa Ui Fhlannagain & a mac, .i. Torrghealbadh, do mharbadh leo a teampoll an Achaidh Moir 'sa lo cednna.
Seaan, mac Domnaill, mic Airt Mheg Uídhir, do dhul d'eg, .i. tigerna na Leth Trian.
In Decanach, mac Airt, mic Lochlainn Ui Gallchubhair, do dhul d'eg.
Anabla, ingen Mheg Craith, .i. bean Tomalthaigh Mheg Uinnsinain, d'eg in bliadhain-si.
Sluaghadh leis h-Ua n-Domnaill gu Tir Fhiathrach & creacha mora do dhenam dhó & bualadh cladaich do dhenam orra.
Maidm mor do thabairt do chlaínn Ui Thuathail air Shaxanachaibh in bliadhain-si.
{fol. B 116d} Feall ghranna do dhenam do chlaínn Bhriain Mheg Fhlandchaidh air mac Meg Fhlannchaidh, .i. aír Thaedhg, mac Fearadhaidh & carrdis-Crist etorra: a mharbadh le tuaith chonnaichch.
Clann Philib, mic Torrghealbaigh Mhég Uidhir & slicht Gilla Padraig Mhég Uídhir & a m-buainidhe, .i. clann Eoghain Ruaidh Mic Shuíbhne, do dhul ar creich air claínn Mhég Uídhir in tres la do Cínncighis. Creach cille & tuaithe do ghlachadh dhoibh a purt Dam Ínnsi. Clann Mhég Uídhir do breth orra air baile Concubhair, tuarim xx. marcach & a creach do bhuain dibh & iad fein do mhaidhmachudh. Da mac Eoghain Ruaidh, .i. in Dubhaltach & Eoghan Ruadh, do mharbadh ann & in tres mac & mac Murchaidh, mic Eoghain Ruaidh, do ghabail ann & tuilledh tri fithid do mharbadh ann, um mac
Sluaghadh leis h-Ua Raghilligh gu Cnoc Ninthi, air tarraing ingine Ui Raghilligh & chlaínne Mheg Uidhir. In Cnoc & Baile Uí Mhanchain & Clann Amhlaimh & Cill Naale do losgadh leo.
Niall Mor, mac Airt, mic Aedha Ui Neill, saei chínn-fheadhna, do dhul d'eg in bliadhain-si.
Rémann, mac Colla, mic Ruaídhri, mic Aedha Ballaigh Mic Domnaill, do dhul d'eg in bliadhain-si.
Sluaghadh leis h-Ua n-Domnaill gu Sligeach & Slígech do ghabhail doibh gu h-athasach & a n-dul asa-sin fa chaislen Ui Ghara & mac Ui Domnaill, .i. Níall Garbh, do mharbadh annsin d'aen urchur do ghunna. Ocus neart mor & tren do ghabhail doibh air Ichtair Connacht & t-fhilledh da tigh.
Sluaghadh leis h-Ua Neill eodem tempore gu Feraibh Manach & ordínas Gall simul fris & dream do na Saxanachaibh. Ocus a n-dul gu h-Innis Sgeillín & in caisdel-sin do ghabhail doibh um fheil Mo Laissi & comnaidhe cethre la do dhenam doibh annsin. Ocus Feighlímídh Caech, mac Uí Neill & corachadh marcsluaigh & corachadh Albanach & a lód uile d'fagbhail annsin. h-Ua Neill féin do dhul gu baile Uí Ruaircc & nach rug se air {fol. B 117a} chreachaibh. Ocus in tír do losgadh leo air a t-fhilliudh & caislen Ínnsi Sgeillínn do bhrissidh dhoibh & a m-beth da la, no tri, 'sa tír. Ocus Mag Uidhir do thiacht, moran daeíne, ina ceann & h-Ua Neill do th-fhilliudh da thigh gu meanmnach.
Duine maith oireacht, .i. Feighlímidh, mac Gilla Padraig Bhuidhe Mheg Ualraigh, air caitheamh fhorgla a aeíse, do mharbadh le Domnall, mac Mheg Uidhír & le claínn
Tairmchrith mor do thiacht 'san aidheor a Feraibh Manach a tossach an fhoghmhair & cith mor clochshneachta do chur ann & gac ní re' r' bhain in cith-sin do na gortaibh, do mhilled uile iad.
Sluaghadh leis in Íustís Shaxanach gu Leth Cathail & mainístir Dhuin do losgadh leo & taissi Padraig & Choluim Chille & Bhrigde do bhreth leo & dealbh Chatrina. Ocus in caiptin Saxanach do breth na deilbhe leís gu faithche caisléin Duin A Droma & e fein do dhul 'sin chaislen & poll do bheth 'sin caisdel & in fer-sin do thuitim ann trid mhirbhuile De & Catrina & gan a fhís osin gu se.
Dealb Muire bhaile Atha Truim & Croch Naem bhaile Ui Bhogain & in Bhachall Issa do losgadh leísna Saxanachaibh in bliadhain-si.