Corpus of Electronic Texts Edition
Annals of Ulster otherwise Annala Senait, Annals of Senat (Author: [unknown])

Year U1537

U1537.0

Kal. Ianair for Luan, l. xui. Anno Domini M. d. xxx. uii.

U1537.1

Macanamha, .i. Taedhg, do dhul d'eg in bliadhain-si.

U1537.2

Sluaghadh leis h-Ua Neill air Níall Óg. Níall & a chaeraidhecht do theicidh for shleibhtib Thire h-Aedha & fo Thearmann Mheg Craith. h-Ua Neill da leanmhain & a sgeimhledh do dhul gu Port na Garbh Arda & gu Cois Deirgi & aircthe mora do bhreth leo. h-Ua Neill ampersir; Níall do dhenam sigha in la-sin feín & aissig do dhul air na creachaibh uile & Mag Aengasa, do bhi a láimh ag Níall, do thabairt asna crechaibh du O Neill & cardis-Crist do dhenam etir h-Ua Neill & o n-a chlaínn re Niall. h-Ua Neill do th-fhilliudh da thigh gu meanmach, agintach.

U1537.3

Art Og, mac ín Phriorach Mheg Aenghasa, do mharbadh in bliadhain-si.

U1537.4

Alexandar, mac Mic Domhnaill, .i. mac Rubhraighi, do dhul d'eg in bliadhain-si.

U1537.5

{fol. B 116a}Brian, mac Cormaic Ui Chianain, soei fhir thed, do dhul d'eg in bliadhain-si.

U1537.6

Semas Ruagh Sabhaeis do tharraíng Shaxanach aír mac Senecín Sabhaeis & mac Sénecin do mharbadh leo & se fir dheg da mhaínntír simul fris & a chaisdel do gabail leó.

U1537.7

h-Ua Domnaill, .i. Aedh, mac Aedha Ruaidh Ui Domnaill, do dhul d'ég a n-dheredh shamhraidh na bliadhna-so. Ocus ní taníg o Bhrian Bhoraimhe anuas righ dob' fhearr smacht & riaghail 'nas e. Ocus h-Ua Domnaill do dhenam da mac, .i. do Mhaghnas.

U1537.8

Mag Uídhir, .i. Cu Connacht, mac Con Connacht eile, ín fear is mo do ghabh tren air Eoganachaibh & air Chonallachaibh & air Oirgiall & air Bhreifnibh & aír gac comarsain da raibhe 'na timchill,


p.616

do mharbadh a bh-fheill le Flathbertach, mac Philib, mic Thorrdhealbaigh Mheg Uidhir & le claínn Fheighlímidh Dhuib, mic Gilla Phadruig Mheg Uidhir & le mac Gilla Phadruig Oíg x. die Octobris.

U1537.9

Clann an Íarla Mhoir, .i. Semas & Oleuerus & Ristard & Seaan & Uater, & Tomas, mac an Íarla Óig, do di-cheannadh le Saxan in bliadhain-si.

U1537.10

Saxanaigh do thíacht a m-Breifne Ui Ragilligh ar siubal & moran da maínntir do mharbadh & mac Ui Raghilligh, .i. Brian in Dubhthari do mharbadh leosan.

U1537.11

Feall ghranna do dhenam do chlaínn Ui Fhlannagain, .i. do chlaínn Gilla Ísa, mic Thorrdhealbaigh, .i. Torrdealbach & Muírcertach, air Muircertach, mac Gillibert Ui Fhlannagain. Ocus Día do t-impog air lucht na feille & iad cuig fír dheg & gan a mhaínntir eile acht cearthar. Muircertach, mac Gillibert, tareis a bhuailte gu mór, imchecht ar eigín do & gur' mo in dighbhail do-rínne se no gach a n-dernadh air.

U1537.12

An Íngin Dubh, ingin Ui Domnaill, .i. bean Olíuerus Burcc, do dhul d'eg in bliadhain-si.

U1537.13

h-Ua Gairmleghaidh, .i. Emann Dubh, d'athrighudh in bhliadhain-si & h-Ua Gairmleghaidh do dhenamh do Rubhraidhe.

U1537.14

Teampoll Macaire na Croissi & teampoll Cille Sgire do losgadh in bliadhain-si.

U1537.15

{fol. B 116b} Maidhm mor do thabairt du Ath Chonchubhair Fhailghi air Shaxanachaibh & air in Iustís Saxanach. Ocus in íustis do cur air marbadh do na Saxanaibh. A teampoll da losgadh air cesta gu fuíthi re n-aireamh iat & taníg tre fertaibh & tre mhírbhulibh De gur' loisgedh iadsan uile & nar' loisgidh in tempoll.

U1537.16

Art Og, mac Airt, mic Cuinn Ui Neill, d'eg in bliadhain-si.