Corpus of Electronic Texts Edition
Annals of Ulster otherwise Annala Senait, Annals of Senat (Author: [unknown])

Year U1536

U1536.0

{fol. B 115} Kal. Ian. for Satharn, l. u. Anno Domini M. d. xxx. ui.

U1536.1

Clann Mheg Uidhir, .i. Cormac & Brian & Domnall & slicht Seaain & Semais & Ruaidhri Chaeich Mheg Uidhir do dhul air cogadh air Mag Uidhir a cinn Neill Oig Uí Neill. Ocus creacha chlainne Tomais na Carrgi do dhenam do chlaínn Mheg Uidhir um fheil Brighide & creacha mora do dhenam do claínn t-Shemais & do chlaínn Ruaidhri Chaeich a Cuil Mhec-Tigharnain air Chlaínn Ghabhfraidh & creacha mora eile do dhenam do shlicht Airt Uí Neill 'sa Chuil chetna & creacha eile do dhenam do Niall Óg & do chlaínn Mheg Uidhir ar slicht Flathbertaidh Mheg Uidhir. Ocus Eogan Buidhe, mac Aedha, mic Gilla Phadruich, mic Fhlathbertaich, do mharbadh ann le Cormac Mag Uidhair & daeíne eile, leth ar leth.

U1536.2

h-Ua Concubhair do gairm do Taedhg Óg, mac Taeidhg, mic Aedha, in bliadhain-sin.

U1536.3

Magnas Mac Mathgamna, abb Cluana h-Eois & Taedhg, mac Bríain Caich Ui Chasside & Eogan Buidhe h-Ua Chasside & Adham Mac Murchaidh & in persun Mac Ubhaid & in persun Mac Somairle — hii omnes moriebantur hoc anno.

U1536.4

Creach eile do dhenam do Níall Óg & do Chormac, mac Mhég Uidhir: a sgeimledh do dhul o Chuil Mhec Tigharnain gu Doíre Bhrosga & gu Clain Ínís & dith


p.606

mor do dhenam doib air cheallaibh & do 'n tuaith in tire.

U1536.5

Slicht Airt Ui Neill do dhenam creichche a Lorg & Pilib Balbh, mac Cathail, mic Eogain Mheg Uidhir & Donnchadh, mac Uilliam Dhuib Uí Mhanchain & Conchubhar, mac Fearghail Uí Mhanchain & da mac Feighlímidh Ui Mhaela Duin do mharbadh a toraidhecht na creiche-sin.

U1536.6

Mag Fhlannchaidh, .i. Fearadach, do ég do 'n galar bhreac.

U1536.7

Niall Mag Ruaidhri & Donnchadh, a derbhrathair, do eg do 'n galar cetna.

U1536.8

Manistir na m-Brathar bhaile Ui Ruairc do losgadh & cupla brathar do losgadh inti, .i. Eremhan h-Ua Domnaill & mac Mael Seaclaínn Mheg Samradhain & moran dighbhala do 'n tir uile do dhenam inti.

U1536.9

Mag Craith Termaínn do throsgadh air chlaínn Aedha Caich Uí Neill, .i. air Fhailghi & air Mhaelechlaínn. In clann-sin & gach comluadar da bh-fhuaradar do dhenam creicche ar Mhag Craith & mac Mheg Craith, .i. Se{fol. B 115b}mas Buidhe & Nícolas, mac in Priorach Meg Craith, do mharbadh leo in la-sin a n-dighailt in troisgi-sin.

U1536.10

Seaan, mac Eoghain Ruaigh Uí Neill, do ghabhail le h-Art, mac Enri Bhailb Uí Neill & a thairbirt do Mhag Uidhir & Mag Uidhir & Clann Ghabhfrait d'a chrochadh.

U1536.11

Clann Iarla Chille Dara, .i. Semas & Uater & Oliber & Ristard & Seaan, do bheth a ceann fir inaid in righ, .i. Loord Línard, a cur leis a n-aghaidh mic a n-derbhrathar in n-athar fein, .i. Tomas. A n-ghabhail uile a n-aenfecht & a cur a Saxanaibh


p.608

& dar linno nach maith do frith sin.

U1536.12

Righ Saxan do dhenam chasaide air in m-bhannrighain gu n-derna si adhalltras & a cur cum bais trid-sin & a ceann do bhuain dí & nar' th-fhill se fein o n-a sheachran credim.

U1536.13

Flann Mac Con Mídhe, ceann caeraidhechta moíre, do mharbadh ar Trian Conghail le h-Albanachaibh.

U1536.14

Gilla Easbaig Daeíneachair, mac Mhic Domnaill na h-Alban, a bheth ag denam mhorain anatechta ar fud Triana Conghail.

U1536.15

Níall Óg, mac Neill, mic Cuinn, do thínol in tíre & amas do thabhairt orra & Gilla Easbaigh fein do mharbadh & da fichit, no tri, da maínntír farís.

U1536.16

Mac Domnaill na h-Alban a dhul d'h-eg (.i. Alastrann, mac Aeon Cathanaidh).

U1536.17

h-Ua Cathain do dhul ar creich air Mac Ubhelín. Rabhadh do dhul cum Mic Ubhelín & in tír uile do thínol dó & Albanaigh & a n-dul gu folaieach a n-inadh arithe. h-Ua Cathain do ghabhail creach in tíre & a cur roime. Mac Ubhelín do thegmhail daibh 'na n-arrcis & brísedh orra & na creacha do bhuain dib & moran da maintir do mharbadh & nar' th-fhillidar gur' loisgedh teach Ui Chathain leo.

U1536.18

Tomas Ballach, mac Anrías Mheg Craith, & Eoin, mhac Briain, mic Torrdhealbaigh Mheg Craith & Diarmaid, mac Seaain Mheg Craith, d'h-eg in bliadhain-si.

U1536.19

Sluaghadh do dhenam leis h-Ua n-Domnaill um Mhag Uídhir, &


p.610

um Níall Óg h h-Ua Neill & um chlaínn Ui Ragalligh & a n-dhul a n-Íchtar Chonnacht & a m-beth etir Dhuibh & Dhrobhais in cet oidhche. h-Ua Domnaill da fhuagra do 'n t-shluagh farareachadh & lucht comheta do chur etorra & in sluagh Connachtach do bhi tinolte ina n-aghaidh. Aedh Buidhe, mac Ui Domnaill, do cur dhroinge do shlicht an Easbuig Ui Ghallchubhair cum comheta & h-Ua Buighill do dhul, began da mhainntir farís, a bh-fhoraire. In da fhoraire fein do thegmhail da cheile & Uath Buighil do mharbadh gu tubaisdeach etorra d'en buille do gha. {fol. B 115c} In sluagh do dhul trid a cheile uime-sin &, man' bheth feabhus ann edragain, gu tuitfidh moran etorra fo bhas Ui Bhuighill. In sluagh do dhul gu Tir Fhiathrach & a m-bheth annsin ocht la, no noi, ag milliudh in tire. Clann Ui Domnaill & Mag Uidhir & clann Ui Raghalligh do dhul, ocht xx., no noi, marcach, gu Tir Amhalghaidh. Moran dighbhala do dhenam dhoibh fo mhainístir na Maighne & creacha mora do thabairt leo cum in t-shluaigh. In sluagh do th-fhilliudh tareís Ui Domnaill do dhenam sithe etir in Easbach Baired & clainn t-Sheaain a Burc. Imruagadh minic do beth etír na sluaghthe-sin & ní mor n-díghbhala do-rínneadh etorra. h-Ua Domnaill do tiacht da thigh gan sith gan ossadh.

U1536.20

Sluaghadh leis h-U Neill ar Niall Óg h-Ua Neill fa in Cargín & fa Mhachaire in t-sheanchaislein. Moran arbha do mhílliudh dhoibh. h-Ua Neill do dhul asa-sin gu h-Oireacht Ui Chathain & gu Trian Conghail. Niall Og da dhul gu Locht Taighi Uí Neill & a beth ló gu n-oidhchi


p.612

a losgadh ann & ag mílliudh an tire. Clann Uí Neill & Mag Aenghasa do breth orra, toir throm. Ocus Mag Aenghasa fein do bheth 'na rofhear eich & e fein & Níall do bhualadh a ceile gu mor & Mag Aenghasa do ghabhail annsin le Níall & lena mhaínntír & le mac Mheg Uidhir do bhi faris, .i. le Cormac. Níall do th-fhilliudh slan da thigh fa bhuaigh cosgair.

U1536.21

Cormac Óg, mac Cormaic, mic Thaeidhg Mhec Carrthaigh — sgel mor & easbaidh romor d'Feraib Erínn uile; fear dob' fhearr smacht & riaghail & dob' fhearr do chínn eaglaise da raibhe a n-Erínn re n-a línn fein — do dhul d'eg in bliadhain-si fa buaigh Ongtha & aithrighe.

U1536.22

Feiglímidh, mac Feidhlímidh Ui Ruairc, d'fhadhail bais a m-braídhdenas a m-bhaile Briain Ui Ruairc in bliadhain-si.

U1536.23

Donnchadh, mac Tigernain, mic Eoghain Ui Ruairc & Tigernan, mac Taeidhg, mic Eogain cednna & Seaan, mac Cuinn, mic Tighernain Fhínn Ui Ruairc, do mharbadh a b-fheill le Domnall Ruadh, mac Donn{fol. B 115d}chaidh, mic Donnchaidh Ui Ruairc.

U1536.24

Gilla Dubh, mac Aedha, mic Ruaidhri Ballaigh Ui Chonchubhair, d'eg in bliadhain-si.

U1536.25

O Ruaircc do ghairm do Bhrian O Ruairc gairid beg roim Nollaig in bliadhain-si.

U1536.26

Toirrghealbach, mac Osgair, mic Taeidhg, do mharbhadh le claínn Eoghain Ruaidh Ui Neill in bliadhain-si.

U1536.27

Huone Mac Uaid, persun Cuil Maine & a bithcarr & bithcair is persun & oirrcinneach Cille Sgyre & dob' e-sin persun dob' fhearr da g-cuolomur a n-Erinn, gu n-dubairt in fer dana:

    1. Persun Cylle Sgire,
      Ceand fine, no féle,
      Is fairsind urlar a thaidhe,
      Ceand uidhe gacha cleire
— do ég Saatharn Minchásga in bliadhain-si.


p.614