Corpus of Electronic Texts Edition
Annals of Ulster otherwise Annala Senait, Annals of Senat (Author: [unknown])

Year U1535

U1535.0

Kal. Ian. for Aíne, l. xx. iiii., Anno Domini M. d. xxx. u.

U1535.1

Aedh, mac Domnaill, mic Enri, mic Eoghain Ui Neill, sai chinn-fheadhna & fear lan d'uaisle & d'eineach, d'h-eg in bliadhain-si.

U1535.2

Sluaghadh leis h-Ua Neill gu Trian Congail & caisdel Edain Dubhcharge do ghabhail do air chloínn Aedha, mic Neill & a thabairt do Níall Óg, mac Neill, mic Cuinn.

U1535.3

h-Ua Raghalligh, .i. Ferghal, mac Seaain, mic Cathail Uí Ragalligh, neoch fa lan Eire uile da gradh, etir chealla & tuatha, ar feabhas

p.598

a uaísle & a enídh & a dhaenachta, d'h-eg fa buaigh Ongtha & athrighe.

U1535.4

Mag Uidhir, .i. Cu Connacht, mac Con Connacht, do dhul ar creich a Cinel Feradhaich & creach mór do thabairt leís o 'n tír & o Chlochar. Ocus ní fhuair se toir in la-sin. Clann Eoghain Ruaidh Ui Neill da leanmhain an oidhce-sin & Mac Gabhfraidh, .i. Feidhlimidh, mac Briain, mic {fol. B 114c} Uilliam Mic Gabhfraidh, do marbadh leo air leargaidh Locha Séarchaidh, air n-a fhadhail ann, began do dhaíníbh, air fadogh thenígh & air marbadh mhairt do 'n creich.

U1535.5

h-Ua Dobhilen, .i. Seaan, d'h-eg in bliadhain-si do 'n fhiabhrus.

U1535.6

Sluaghadh le Taedhg, mac Taeidhg, mic Aedha, gu Madh n-Eine & in Magh do losgadh leo. Ocus fuireach doibh ínn oidhche-sin air in Magh & mac Ui Domnaill, .i. Donnchadh Cairbreach & clann Ui Buighill & clann Mheg Fhlannchaidh do dhul reampa an oidhche-sin air Sgairbh Insi in Fhraith. Ocus nar' thogbhadar ceann do thorrach in t-shluaigh, ceann do thogbhail doibh do dheredh in t-sluaigh & moran dibh do ghabhail & dream do mharbadh. Mac Ui Ruairc, .i. Brian, do chur theachta chum Mheg Fhlannchaidh da innesin dó gu rabha sith aige re Taedhg Óg & da radh ris na braighde-sin do lígan do dhruim na sithe-sin. Mag Fhlannchaidh do ligan na m-bhraghad-sin uile & aíssig imshlan do thabairt doibh arna mharach.

U1535.7

Gilla Padraig, mac Pilib, mic Emaínn Mheg Uidhir, d'h-ech.

U1535.8

Eigneachan, mac Domnaill Ui Domnaill, do mharbadh a b-feall le cloínn Ui Bhuighill in bliadhain-si.

U1535.9

Fínghal & feall granna do dhenam da oglach & da constabla gradach fein air mac Iarla Cille Dara & a bhaile, .i. Magh

p.600

Nuad, do reicc & do tharbírt do na Saxanachaibh & bardaghadh in baile ina colladh & forgla na m-bardagh do mharbadh ina colladh & cuigír no seisir do chleirchibh & do shagartaibh do mharbadh ann. Ocus, mar do-chuaidh acu air ín m-baile, do thugadar in fer-sin do thairbhir in baile dhoibh a fiadhnaise fhir inaíd in righ. Ocus do fiafraghidh de ca fad do chainneochfadh se in baile, man' tairbhrigh se é. Ocus adubert gu cuinneomhadh gu ceann m-bliadhna. 'N-a dhiaigh-sin do fíafraighídh de cred do-rínne mac an Íarla aír fa 'n-derna se feall ar a thígherna. Ocus adubert sin nach derna ni 'sa bíth riam budh místi leis. Ocus do h-imordadh air gu n-derna se moran dithe do Ghallaibh fare mic an Íarla & adubhradar na Saxanaigh gur' chora dosan feall do dhenam orra fein, nac tug en ní dhó, na feall do dhenam air mac an Íarla do thug moran dó. Ocus as i breth do-rugadh fair gac ní d'ar' gealladh do do {fol. B 114d} thabairt da athair, o' s e nach derna feall no meabhal & in fer do-rínne in míchongill & an fheall granna air a thigherna do chur

p.602

cum báis, air cesta gu n-dighnedh tuilledh orrasun, no air neach aile, do 'n míghnim-sin. Ocus do-rínedh cethre cethramna de-sin. Ocus is mairg do dhenadh feall, no finghal, no meabhal gu brach, mar da dheonadh Dia in míchonghill-sin do dhul mar sin. Ocus beannacht do 'n fhir do-rug in breth-sin.

U1535.10

Cogadh etir Mhag Mhathgamna & slicht Aedha Ruaidh Mhég Mhathghamna.

U1535.11

Slicht Aedha Ruaidh & slicht Aedha Uí Neill do-thiacht ar creich ar Mhag Mhathgamna & creacha mora do dhenam doibh & h-Ua Condhálaigh do mharbadh leo.

U1535.12

Cormac, mac Donnchaidh Mic Gabfraigh, do mharbadh le claínn Eoghain Ruaigh Uí Neill & Gilla Padruich, a derbrathair, d'h-eg in bliadhain-sin.

U1535.13

Aodh, mhac Uí Fhlannagáin, do mharbadh a bh-feill in bliadhain-si lé cloinn Pilip, mac Briaín Mégh Uidhir, .i. Sémus & Pilib Ócc, an Domnach ré b-féil Petair & Poíl.

U1535.14

Mac Suiphne Bóghuine do mharphadh lé mac a athar & a mathar féin a bh-feill, .i. lé Níall, lá féili Petair & Poíl.

U1535.15

Mac Iarla Chille Dara, .i. Tomas, do ghabhail gu h-olc leis na Saxanachaib tareis arrcisse do chur air & a thiachtain 'na ceann leis an arrcis-sin & a chur soir chum righ Saxan.

U1535.16

Sluaghadh do dhenam do Mag Uidhir & d'inghin Mic na Míghi, .i. do mhnai Ui Dhomnaill & a n-dul do chumnadh leis na Saxanachaibh & le fer-inaid in righ, .i. le h-Uilliam Sgeimhíltan.

U1535.17

Uilliam fein do ég um Nollaig-sin a n-Droithid Atha & Mag Uidhir do th-fhilliudh o na Saxanachaibh da thir fein & nach bh-fhuair se fein, no ingin Mic na Míghi, sluagh Gall leo cum Sligigh .

U1535.18

Plaigh mor & galar breac fo Erinn in bliadhain-sin.

U1535.19

Síuban, ingin Chuínn, mic Enri, mic

p.604

Eoghain Ui Neill, bean Mhaghnusa Ui Domnaill,d'h-eg.

U1535.20

Gilla Coluim h-Ua Eogasa & Aengas, mac Emaínn Mheg Craith, d'h-eg in bliadhain-si.