Corpus of Electronic Texts Edition
Annals of Ulster otherwise Annala Senait, Annals of Senat (Author: [unknown])

Year U1534

U1534.0

Kal. Ian. for Dardain, l. xiii., Anno Domini M. d. xxx. iiii.

U1534.1

Esbuc Clochair d'h-eg an bliadhain-si, .i. Padraig Cuiliun.

U1534.2

Mac Domnaill d'h-eg an bliadhain-si, .i. Rugraidhi: saí n-einigh & n-engnuma an fer-sin. Ocus Mac Domnaill do dhenam da derbrathair, .i. do Ghilla Espuic.

U1534.3

Bicaire Claoin Ínnsi d'h-eg an bliadhain-si, .i. Rémann, mac an Oirchidecain Mhég Uidhir.

U1534.4

Seaan, mac Uaithne Uí Raghalligh, tígherna Cloinn Mathghamna, do mharbadh a bh-feall an bliadhain-si lé cloinn Uí Raghalligh, .i. Toirrdhealbach & Brian, clann Ferghail.

U1534.5

O Gallchabhair d'h-eg an bliadhain-si, .i. Emhann, mac Eóin, mic Tuathail.

U1534.6

Ruaidhri Carrach, mac Cormaic, meic Aodha Meg Uidhir, d'h-eg an bliadhain-si, duine maith, uasal, guaisbertach.

U1534.7

Iarla Cilli Dara, .i. Geróid, do dhul fá ghairm righ Saxan ín bliadhain-si. Ocus dob' e damna na togharma-sin, .i. imchosaídi imdha do cur do Ghallaibh Erenn

p.594

fair tre aibhle a aindlighedh & égcora orra, gu madh h-í comuirle do-rinne in rí & maithe Saxan an t-Iarla do cur a tor Lunnuinne a n-oirchill {fol. B 114a} a mhillti. Imthusa meic & oighre an Íarla, .i. Tomos, mac Geroid: íar n-a cluinsin-sin, is í comairle ro chinn féin & a combraithre & a cairdi Gall & Gaidheal: comaonta cogaidh do dhenamh a n-agaidh an righ. Iar cluinsin na comairle-sin dh' airdespac baile Atha Cliath & do prieoír Cilli Maighnend d'espag na Midhi & do móran aile nach áiremter sunn, ag a roibhi cuid do 'n Íarla do cur a n-áit a millti, do ghabh egla adhbal mhór íat, ínnus gur' fhágbhadhur a tighernus & a cuírti & a caisléin & gach uile maithus aile día roibhi acu gan ímcoimédh, gur' theithset a h-Erinn co h-athlamh, anurmuisnech, égcobhsaidh do dhul a Saxanaibh ar uaman & ar imeagla mic an Íarla d'á cur docum báis a n-dighail a athar. Imthusa airdespuig bhaile Atha Clíath, do berar ós aird do ghluais roime ar síubal oidhchi d'fagbail Erenn & gan acht uathadh da muinntir maraon fris. Ocus, ag dul a luíng a m-Beínn Edair dó, rugadur muinntir meic an Íarla fair & do gabadh léo h-é gan fhechemh día pridhiléitt, no día cádhus & do chuiredh drochar anbhoil fair & rugadur leó h-é co h-Ard h-Aidhin, a comfhoigsi do Chluain Tarbh. Od'chúaladh mac an Íarla an ní-sin, bá deach lais: ní derna fosadh, no comhnuidhe, no gu raínic co h-airm a roibhi an t-Espag & tug ar a muinntir gnim íngantach, aníarmartach, étrócair, tre 'nar' dibhtha mes & clas & mórthóradh, sidh & soinend & soaimsir an tan-sin, .i. cethrumna cudruma, coimthesgtha do dhénam do 'n Airdespac. Gu madh é sin bruíne an chogaidh adubrumar.

U1534.8

Gnim amgi,

p.596

urcodeach do-rínedh a Feraibh Manach oidhche fheil Martain do shunnradh; .i. Maghnus Buídhe h-Ua Duibhgenain, soi seanchaidh, do thachtadh ina thaigh fein & do mhuchadh & do fholach lena mnai fhein & le Brian, mac Tomais, mic Toirrgealbhaigh Mhég Uidhir. Fir na fínghaile-sin do dul fa 'n tír & Brian do teichidh a n-Oirghiallaibh. Ocus Flathbhertach, mac Philib, mic Thorrghealbhaigh, do ghabhail na mna-sin & do ghabhail deisi dilmhaineach eile do bhi fa 'n fínghail-sin & a toirbert do Mhag Uidhir & Mag Uidhir do losgadh na deissi-sin {fol. B 114b} a n-en lo. Ocus in bhean do bhi torrach o n-a fer fein, a cur a prisun no gu rug si in toirchis-sin & a crochadh fa deredh. Días derbhbhrathar in Bhriain-sin da leanmhain a n-Oirghiallaibh & a mharbadh leo a feill. Ocus is mairg do ni fínghal, no feall, gu brach a n-dhiaigh na fíngaile-sin & a fheabhas do dighladh h-i tre mhírbale De & Mhartain.