Corpus of Electronic Texts Edition
Annals of Ulster otherwise Annala Senait, Annals of Senat (Author: [unknown])

Year U1532

U1532.0

{fol. B 112c} Kal. Ian. for Luan, l. xxi., Anno Domini M. d. xxx. ii.

U1532.1

Tomas, mac Iarla Chille Dara, d'h-eg an bliadhain-si, .i. aon macámh na Midhi & duine dob' ferr aithne ar gac ealadhaín í n-a aimsir fein.

U1532.2

Cormac, mac Mhég Uidhir, do ghabail a feall le cloinn Uí Néill, & le Fer Dorcha h-Ua Néill & le Feidhlimidh Doibhlínech,


p.582

mac Airt, mic Cuinn Uí Néill, & cuid do mharcsluagh mic Még Uidhir do marbadh ann, .i. Uilliam, mac Díarmada, mic Cormuic Mic Gaffraigh & in Ghilla Ballach, mac Enrí Buidhe Mic Gaffraigh & daíne aili nach áirímter sunn. Ocus cuid aile do marcsluagh Cormuic do ghabail faraon ris ann, .i. Ros, mac Neill Mic Caba & Eogan, mac an Diarmada-so adubhramar romainn. Ocus gidh íad clann Uí Neill ann, fós ní réidh tangadur o'n dáil-so: do buailedh & do loitedh urmhór a muinntire. Ocus is íad-so na maithi do bhói a ponc bhais ar imchar leó ann, .i. mac Uí Neill, .i. Feidhlimidh & Roibhilín Mac Domnaill & daíne aili nach áirímter sunn.

U1532.3

Crecha mora do dhenam le Maghnus O n-Domnaill a g-Cúil Mhég Tigernáin.

U1532.4

{fol. B 112d} O Cerbhaill, .i. Maol Ruánuigh — an t-aon Ghaidhel dob' ferr gart & gaisgedh, ágh & oirrdercus, uaisle & atharrdha & an t-é d'ár' bhuidhech dáma & deóraidh, eícsi & ollamhaín, uird & ecclusa & an t-é is mo do thinóil & do thidhlaic o aimsir Briain Bhórama anuas: cuingidh congmala Caich & sduir cert, cobsaidh, acinedhach & buachail tenn, taisdil na d-treabh & mal medhrach, mórdhalach Muman: leag loghmhur & geam charrmogail & inneoin fhorais & uaithne oir na n-éilech — a ég íar m-buaidh Ongtha & aithrighe ina mhórlongport féin. Ocus a mhac do oirdhnedh í n-a ínadh dia éis, edhon Fer gan Ainm.

U1532.5

Eoghan, mac Tigernáin Uí Ruairc, do mharbadh leis O Mail Mhiadhaigh & lena braithribh a Mainistir na m-Brathar Minur í n-Druim Dhá Shiaar.

U1532.6

Seaan, mac Pilib, mic Toirrdhealbuigh Mhég Uidhir, do marbadh an


p.584

bliadhain-si le Domnall, mac Mhég Uidhir, .i. mac Chon Chonnacht, mic Chon Connacht, mic Briain, mic Pilib Mheg Uidhir, d'en sathaidh do sgín.

U1532.7

Mac Mhég Samradháin, .i. Domhnall Ócc, mac Domnaill Bhernaigh, do mharbadh d'én bhuille ga du Aithne, mac Maghnusa, mic Tomais Meg Samradháin.

U1532.8

An Ingen Dubh, ingen Mhég Raith, d'h-eg an bliadhain-sa, .i. ben an Dubhaltaig Mic Domnaill: .i. ben shuairc, shubháltach, ghreanmar.

U1532.9

Mag Samhradhain d'h-eg an bliadhain-si, .i. Tomás, mac Maghnusa Meg Samradhain; .i. taisech dob' ferr da tainic a Teallach Echach re cuimne cáigh.

U1532.10

Comarba Fidhnach d'h-eg an bliadhain-si, .i. Brian O Rodacháin.

U1532.11

Enrí Aimreidh, mac Briain, mic Cuinn Uí Néill, do ghabail les O Néill, .i. lé Conn, mac Cuind.

U1532.12

Cormac O h-Ulltachanain, .i. oirchinnech Achaidh Bethe, d'h-eg an bliadhain-si.

U1532.13

Tomas Mac Amlaibh, .i. mac Cormuic Mic Amlaibh; Gilla na Naom, mac Airt Mic Gaffraigh, d'h-eg an bliadhain-si.

U1532.14

{fol. B 113a} O Domhnaill & Mag Uidhir do dhul a cenn an Ghiusdis th-Shaxanaigh gu Droichead Atha & a gnothaidhe do ghenum & a toigheacht fo bhuaidh día tigibh dorighisi.

U1532.15

An Giuisdis gu na th-Shaxanachaibh & Goill na Midhe do dhul a Tir Eoccain & sluagh Ghaidhel do eirghi amach ina coinne, mar ata, Níall Og O Neill & Mag Uidhir & O Raighilligh & Mag Mathgamna & slicht Aodha h-Ui Neill & slicht Aodha Buidhe & Clanna Rughraidhe do 'n taobh a tuaigh 'gadam doibh 'ga tuirimh. Acht do impoadur Gaidhil Letha Cuind uile ar O Neill 'munn am-sa, achtmadh becc. Rangadur na sluaigh-so, leth ar leth, gu Dún Gheanainn a coinne


p.586

a cheile, gur' brisedh & gur' blaghadh, gur' muradh & gur' mughaighedh, gur' toirnedh & gur' trascradh, eter chrunn & cloich, eter tighibh & teccar, eter duinedh & deccharus, in baile, gu nar' aithgin Gall na Gaidhel, da faca roime ariamh, ar in tres lá e. Do h-indredh & do h-innarbadh, do dilghiedh & do dilaithridhedh, do loiscedh & do lainmhilledh in tir uile a or gu h-or leo. Do-chuadur almha & innile thire h-Ui Neill gu h-imshlan ar fainnel & ar fordul, no gu rangadur Sliabh Betha, mhic Naói. Do leanadur na Gaidhil-so adubramur romhaind íat, no gu rucadur orra & do thóccbhadar ín bhorumha dhoairme-so leó, no gu rangadur amesc Ghall. Do boi mart ar in m-bonn & mart gacha bhond ag Gallaibh in oidhci-sin. Do-rinnetar Goill & Goidhil a cadach & a caradradh, a cuir & a cumartha, do cheangal re cheile ar lo. Do impádur Goill da n-duintibh & Gaidhil día n-deghbhailtibh gu m-buaidh coscair & araile. {fol. B 113b} Is and do bhai O Domhnaill in uair-sin & Mac Domhnaill na h-Alban & a fheacht ina fhochair, ag gabail neirt a Cuigedh Medhbha.

U1532.16

Creacha mora & airccthi aniarmartacha do dhenumh do Niall Óg O Neill ar Roibhilin Mac Domhnaill & a tabairt a Feraibh Manach leis.

U1532.17

Iarla Cille Dara do thoighecht a n-Erinn i n-Errach in bliadhain-so, edhon Geróid Óg & fedhmanntus in righ do thabhairt do leis gu cend x. m-bliadhan. Ocus gairm do chur ar in n-Giusdis Saxanach da tharraing gu baile Atha Cliath & in Comairle Mhor do shiughudh ann & in Saxanach do chur, do


p.588

dhruim cert Ghall, gu baile in rígh do righisi fo mhela & fo mhasla mhoír.

U1532.18

Mac Uibhilin, .i. Geroid, mac Ualtair, do mharbadh a feill le Mac Ruaidhri an Ruta & le mac Domnaill Chlérigh Uí Cathain a tempull Duna Uó & Conchobur, mac Enrí, do mharbadh & do loiscadh an aghaidh cetna.

U1532.19

Clann Uí Néill, .i. Ruaidri Gallta & Tuathal, do crochadh leis O Néill, .i. le Conn, mac Cuínn.

U1532.20

Feidhlimidh, mac Eogain Boichd Uí Neill, do ég an bliadhain cetna, .i. an fer thug minna nách tiucfedh sluagh Conullach a Tír Eogain ré n-a beathaidh nach muirfedh ech, no duine, dib & do comuilledh sin.

U1532.21

Piarus, mac Sémuis, .i. Iarla Urmuman, línd a tinóil, do techt a crich Ele & Urmuman & Baile an Gárrgha do losgadh lais. Ocus ag impodh tar a n-ais doibh, clann Ui Cerbuill do breith orra ag Ath na Darach Caime. Gréim anbfoil do cur orra & ár dí-rímtha do tabairt orra & na aidhme allmurdha is mo le' r' gabsat trén & treisi do béin dibh, .i. a n-gunnadha. Ocus do len for tormuch anma d'on ath-sin, .i. Ath na Fadbcun. Ocus do benad fós móran da n-ór & da n-arged dibh & a lon & a cartacha & a n-eocha, achtmad begán. Ocus as e an la-sin do shunnradh torchair O Cerbuill.