Corpus of Electronic Texts Edition
Annals of Ulster otherwise Annala Senait, Annals of Senat (Author: [unknown])

Year U1531

U1531.0

{fol. B 112a} Kal. Ian for Domnach, l. x., Anno Domini M. d. xxx. i.

U1531.1

O Flannagain (Mághnus O Flánnagáin) Tuaithi Ratha d'h-eg an bliadhain-si, .i. Maghnus, mac Ghillebert, mic Cormuic, saí dhuine re h-uaisle & re tech n-aidhedh.

U1531.2

Cormac Mac Maghnusa, mac Cathail Óig, mic Cathail Medhonaigh, d'h-eg an bliadhain-si. Ocus nír' aithnech duin 'na aimsir mac brughaidh dob' ferr inas é.

U1531.3

Innsoighidh do dhenum le Mhég Uidhir, .i. lé Cormac, a Cinél Feradhaigh, d'ar' chrech an tír. Ocus toír do bhreth air & mac Meg Uidhir do brisedh forra & mac Briain, mic Domnaill Ui Neill, do marbadh leis & daine aili nach airímhter sunn.

U1531.4

Tuathal O Neill, .i. mac

p.578

Uí Néill, .i. mac Airt, mic Cuinn, do ghábail leis O Neill, .i. le Conn, mac Cuinn.

U1531.5

Sluaighedh leisin n-Gíuisdís Saxanach & le h-Iarla Chilli Dara & le maithibh Gaidhel Erenn a Tir n-Eogain ar tarraing Uí Domnaill & Neill Óig Uí Neill & t-slechta Aodha Uí Neill. Ocus Tir Eogain do loscadh leó o Dhun g-Cal gu h-Abhainn Mhoir & caislen nua Phuirt an Fhaillegain do brisedh leo & duthadh Briain na Mocheírghi do crechloscadh leo & Muinechan d'fhagbail folam ré n-ucht. O Domnaill & Níall Óg do dhul a cend an t-sluaigh Ghallda h-isin gu Cinn Aird & caisdiall Chinn Airtt do brisedh leó. Ocus O Neill do beth, sluagh dí-armhe, re n-ucht & nar' lamhadur a dhul teris-sin a Tir n-Eoghain & do impodur na sluaigh-sin, leth ar leth, dia tighibh fó bhuaidh coscair, gan sith, gan osadh, ag Ua Neill friú.

U1531.6

Ruaidhri Gallda, mac Uí Neill, do ghabail leis Ua Néill, .i. le Conn, mac Cuinn.

U1531.7

Conn, mac Seaain Bhuidhi Még Mathgamna, do marbhadh le Mág Mathgamna & le cloinn Briain Még Mathgamna.

U1531.8

Eogan, mac Ghilla Padruic Oícc Mhég Uidhir, do marbadh lé n-a derbrathair féin, .i. le h-Emann.

U1531.9

Baile Uí Donnghaile d'innsoighidh an bliadhain-so le Níall Óg O Néill & in baile do ghabail leís & mac Uí Néill do ghabail ann, .i. Seann, dalta Uí Donnghaile & eich & édaíl an baile do breth dó fáraon ris.

U1531.10

Aodh Óg, mac Tomais, mic Tomais aile, mic an Ghilla Duibh Még Uidhir, d'h-eg an bliadhain-so, ar m-breth bhuaídhi ó dhomun & o dhemhan.

U1531.11

Mág Uidhir do dhul, sluagh, a Tir Conaill ar tarraing Uí Domnaill & a dhul ar

p.580

Maghnus O Domnaill {fol. B 112b} dóibh & urmhór an tíri do crechloscadh leo, idir thigibh & arbur, ider buaibh & chaiplibh & gac ínnile olchena. Ocus Maghnus do beth, sluagh, ar faighthi Chaisléin na Finne an uair-sin & marcsluagh mic Uí Domnaill & a chlann do thecht thar Finn anall a coinne in t-sluaigh. Ocus Mág Uidhir & a mac & clann Uí Domnaill da n-ínnsoighidh & imruagadh do beth acu & do bualedh eich & daine etorra. Ocus do b' é crich an imruaigthe brisedh ar mharcsluagh mic Uí Domnaill & a cur ar Sgairbh Bechoigi da n-aindeoin & Mág Uidhir do ímpodh día fhaslongport fa bhuaidh cc-cosgair. Ocus Toirrdhelbach, mac Donnchaidh, mic Briain, mic Filib Még Uidhir, do mharbadh d'aon bhuille ga ar an ímruagadh-sin le marcach do Muinntir Ghallchabuir & a thabairt beo dia bhaile féin & bás d'fágbail fó cend tri n-oidhche dó ann, íar m-buaidh Ongtha & aithridhi.

U1531.12

Inghen Mhég Raith d'h-eg an bliadhain-si, .i. Fínnghuala, an bhen do bhi ag Giolla na Naom O Uiginn.

U1531.13

Conn Modurra, mac Airt, mic Neill, do marbadh la Níall Óg, mac Cuinn, mic Nell, an bliadhain-si.

U1531.14

Semmus O Flandagáin, .i. mac Persúin Indsi, neach do bí lán d'innscni & d'ealadhaín & do bo maith teach n-aidedh, d'ég in bliadhain-si.