{fol. B 111d} Kal. Ian. for Satharn, l. xxix., Anno Domini M. d. xxx.
Gilla Padruicc, mac Cormaic, mic Airt Chuile Mhécc Uidhir, d'h-eg in bliadhain-so. Ocus dob' é-sin fear a inmhe dob' ferr da cuala cach 'na aímser féin.
Aodh O Flandaccain, .i. mac Persúin Índsi, neoch do bhoí lán d'innscni & d'ealathadh & da gach uile th-subhaltin aircheana & do bo maith teach aidhedh, a ecc in bliadhain cétna.
Domnall, mac Briaín, míc Domnaill h-Ui Neill, do thecht ar creich andsa Machaire Steabhanach & crech do ghlacadh lais. Ocus an tir do breth air & a leanmhuin ar Slíabh Betha & mac Briain do filledh orra & brisedh ar in foír & ár di-airmhe do thabairt orra, du í n-gabadh ar da mac Eoccain Ruaidh h-Uí Neill & inar' marbadh triur do chloind Ruaidhri na Learrccadh & días mac Maghnusa Mic Mathgamhna & mac Enrí, mic Briaín & mac Emuind, mic Tomais Meg Uidhir, .i. Tomás na Cairrge & morán aile nach airmhtir sund.
Inghen Aédha Caeích Ui Neill, .i. Una, .i. bean Taidg Buíde mhic Meg Craith, .i. mac Ruirigh, mic Diarmada, mic Marcuis Meg Craith a h-ecc.