{fol. B 111a} Kal. Ian. for Mairt, l. xx. ui. Anno Domini M. d. xx. uii.
Mac Donnchaidh Tíre h-Oilella, .i. Cormac, mac Taidc, mic Briain, d'fhagail báis & coccadh mór ider a chinedh fá tigernus an tíre & Mac Donnchaidh do ghairm d'Eogan, mac Dondchaidh, mic Murchaidh.
Brían, mac Feilimthe, mic Magnusa Uí Concabuir & Domnall, mac Féilimthe, mic Toirrdelbaigh Carraigh Ui Concabuir, d'fagail báis an bliadhain-si.
Sith do dhenam ider O n-Domnaill & O Néll, amail do ordaigh Maghnus O Domnaill: .i. roind do chis Chois Derge & Luirg do thabairt d'O Néll & ó Loch soir d'Feraib Manach fós can imresain.
O Cleirigh (.i. in Gilla Ríabach), .i. ollamh Uí Domnaill re sencus, mortuus est.
Domnall, mac an Esbaic Ui Ghallcubuir, do mharbadh a m-bruighin le cuid dh' á cined fén.
An Doctúir, mac Eoghain Ulltaigh, saí fhisici &
Mág Uidhir (.i. Concubur) do dol d'éc an bliadhain-si & Mág Uidhir do ghairm do 'n Comarba Mág Uidhir.
Toirrdelbach, mac Ecnecháin Ui Domnaill & Feilimidh, mac Seaáin Luirg Uí Domnaill, do dol d'éc in hoc anno.
Sluaighedh les O n-Domnaill, .i. Aodh, a Muigh Luirg & an tír co h-imshlán do loscadh & do milliudh, eter arbhar & fhorgnem. Ocus in Caislen Mór & caislen an Bhennota do gabail do & caislen an Calaidh & Baile na h-Úamha & an Caislen Riabach do gabail & do brised dó & marcach maith do 'n t-shluagh do marbadh a n-ucht an Bealáigh Buide, .i. Aod Buidhe, mac An Dubhaltaigh Uí Ghallcubuir.
Caislen do denam le Maghnus O n-Domnaill an bliadhain-si ac Port na Tri Námhat & a crichnughudh le bloidh m-bic do 'n t-Sanmradh, iter obar croind & cloiche.
Maghnus O Domnaill do dol ar creich a n-Glenn Eile ar Aod m-Buidhe O n-Domnaill, & días ócmarcach do muinntir Maghnusa do marbadh, .i. mac Domnaill, mic Féilimthe, mic Aonghusa Óic Ui Gallcubuir & mac Briain Caich, mic Domnaill Mic an Decanaigh.
Mac Maghnusa Meg Uidhir, saí cleirich & duine tuicsech, treighech do thaob Laitne & Ghaidilge & fer muirir moír & fer tighe n-oíghedh d'imchar, do dol d'éc in hoc anno.
Ruaidhri, mac Murchaidh Mic t-Suibni, do mharbadh do cloind a athar féin in hoc anno.
Uilliam, mac Andrias Meg Raith, duine saidhbir & fer thighe n-aighedh coitcenn & a ben d'fhagail báis a n-en ló co n-oidci.
Caitilín, ingen
{Slip A } Mac Uilliam Burc d'h-eg an bliadhain-si, .i. Emann & Seaan an Termuinn do rigedh d'á eis.
Mág Aonghusa d'h-eg an bliadhain-si, .i. Emann Buidhi, mac Aoda Mhég Aonghusa.
Cathal, mac Séimais, mic Pilib Mhég Uidhir, d'h-eg an bliadhan-si, saí duine re h-uaisle & re tech n-aidhedh.
Ros, mac Toirrdhealbaigh, mic Philib Mhég Uidhir, d'h-eg an bliadhain-si.
Tadhg, mac Eogain Uí Fhíalain, d'h-eg an bliadhain-si, adhbur maith fhir dhána.
Art Balbh, mac Seaain, mic Airt Uí Neill, do mharbadh le Toirrdhealbach, mac Donnchaidh, mic Briain Mhég Uidhir, a tigh Briain {Slip B } Óig Mic Donnchaidh, a m-Beallach Coille na g-Cuirridin.
Torrdelbach O Maoilechlainn do marbadh an bliadhain-si le cloinn Fheidhlimthe, mic Ruaidhri, Uí Néill.
Flaithbertach, mac Rúaidhri, mic Briain, mic Pilib Mhég Uidhir, do marbadh le h-Uaithne, mac Maghnusa Mhég Samradháin, ar sith.
Abb Lesa Gabhail d'h-eg an bliadhain-si, .i. Labhras abb.
O h-Airt d'h-eg an bliadhain-si, .i. Cormac O h-Airt, duine maith, greannmhar & do bo maith tech n-aidhedh & O h-Airt do dhenum d'Feidhlimidh O Airt ina ínadh & bás d'fhaghbail an bliadhain cétna.
Art ele, .i. mac Aedha Caeich, mic Neill, mic Airt, mic Eogain, mic Neill Oig Ui Neill, do marbadh an bliaghain-so le cloinn mic Aodha in Mullaigh felloníce.