{fol. B 107c} Kal. Ian. iii. f., l. xx., Anno Domini M. d. xx. i.
Mág Mathgamna d'h-eg an bliadhain-si im Caisc, .i. Remand, mac Glaisne, mic Rémuinn, mic Rughraidhi Mhég Mathgamna & Mág Mathgamna do dhenum d'á mac, .i. do Ghlaisne Óg.
Mág Aongusa, .i. Domnall, mac
Mág Aonghusa aile, .i. Feidhlimidh, d'h-eg ím fheil Cros na bliadhna-so & Mag Aongusa do dhenam d'Emann Bhuidhe Mhág Aongusa.
Donnchadh mac Ruaidhri, mic Briain Mhég Uidhir, do marbadh an bliadhain-si le macaib Meg Samradhain, .i. lé h-Uaithne, mac Maghnusa Meg Samradhain & lé Domnall Óg, mac Domnaill Bernaigh Még Samradhain. Ocus ní roibhi fer a inmhe a n-Erinn dom' doigh dobh' ferr eineach ina an Donnchadh-sin.
O Cathain d'h-eg an bliadhain-si, .i. Tomas, mac Aibhne Uí Cathain. Ocus do ghabh Donnchadh O Cathain é roime-sin & do ben sé ainm righ & tighernuis de ar eígin.
Prioír Daim Ínnsi d'h-eg an bliadhain-si, .i. Remann, mac persuin Innsi Muighi Samh, .i. fer cleirchi daonachtach. Ocus a ég fa buaidh Ongta & aithrighe.
Maol Muire, mac Cithruaidh, mic Aitheirne Uí Eoghusa, d'h-eg an bliadhain-si.
Domnall, mac Domnaill, mic Airt, d'h-eg an bliadhain-si.
Mág Carmuic, .i. Adham, do mharbadh le Coin Connacht mac an Gilla Duibh, mic Toirrdelbaigh Mhég Uidhir, a tus Erraigh na bliadhna-sa.
Gráine, ingen Tomais Uí Eogain, .i. mathair Mhég Uidhir, d'h-eg a tus Erraigh na bliadhna-sa. Ocus ní roibhi 'sa Cuigedh, d'ar n-dóigh, ben do budh saidhbhre inas í.