Corpus of Electronic Texts Edition
Annals of Ulster otherwise Annala Senait, Annals of Senat (Author: [unknown])

Year U1520

U1520.0

{fol. B 107a} Kal. Ian. i. f., l. ix., Anno Domni M. d. xx.

U1520.1

Mac Mhég Uidhir, .i. Pilib, mac Emainn & Gilla Padraic, mac Pilib, mic Toirrdhealbaigh Meg Uidhir, do dhul ar ínnsoighidh ar mac Pilib Uí Raghalligh, a n-Ichtar Tire. Ocus crech do ghabail dóibh & toír trom do


p.534

breth orra — .i. slicht Briain Uí Ragalligh & clann mic Cathail Uí Ragalligh, .i. Fergal & Mael Mórdha & clann Domnaill na Con Ínnsi — & brisedh doibh ar mac Meg Uidhir & ar mac Pilib, mic Toirrdhealbaigh Még Uidhir. Ocus mac Még Uidhir, .i. Pilib & a mac, .i. Tomas, do mharbadh ann & Gilla Padraic, mac Pilib, mic Toirrdhealbaigh & a brathair aile, .i. Emann, do mharbadh ann. Ocus do marbadh & da bathadh deichneabhar ar fichit ar an lathair-sin a timchill na n-daine uaisle-sin. Ocus Cétain an Braith & lá féile Tigernain do shunnradh do-ronadh na gnimha-sin.

U1520.2

Persun Daim Ínnsi d'h-eg an bliadhain-si; .i. Niclas, mac Píarusa Uí Fhlannagain.

U1520.3

O Caiside d'h-eg an bliadhain-si; .i. Feidhlimidh, mac Taidg Ui Caisidi, ollamh legha shlechta Pilib Mhég Uidhir & liaigh clumur, deghaithnech an Feidhlimidh-sin.

U1520.4

Plaigh mhor a bh-Feraibh Manach an bliadhain-si, d'á n-dechaidh Rughraidhi, mac Donnchaidh, mic Aodha Mhég Uidhir, .i. saí chinn-fhedhna & duine maith greannmar & Mailechlainn O Cíanain: sai re senchus & re filidecht & re dán an fer-sin.

U1520.5

Iarla o Suirrigh & Saccsanaigh do thecht a n-Erinn an bliadhain-si & nert mór do ghabail doibh ínnti & adobhradh nach tainic a n-Erinn riam mac Saxanaigh dob' fherr do dhuine ina an t-Iarla-sin.