{fol. B 106c} Kal. Ian. uii. f., l. xxuii., Anno Domini M. d. x. ix.
O Néll, .i. Art Óc, mac Cuinn, nech budh mór clú & einech na mac rígh na thigherna, d'fhagail báis a lár a inmhe & a aísi, in hoc anno.
Feilimidh, mac Maghnusa Uí Concabuir, tigherna o t-Shliab anuas, mortuus
Espuc Doiri, .i. Semus, mac Pilib, mic Semuis, mic Ruaidhri Meg Mathgamna, d'h-eg an bliadhain-si.
Innsoighidh le cloinn Uí Néill, .i. le cloinn Domnaill, mic Enrí Uí Neill, ar mac Uí Neill, .i. ar Brian, mac Cuinn Uí Neill & crecha mora do ghabail dóibh ar Slíabh this. Rabadh d'fhaghbail do Brian & coimthinol mor do beth aigi ar a cend & é da lenmhuin a toraighecht. Ocus brisedh do Brian ar chloinn Uí Neill a h-aithle a muinntire d'imdhecht leis na crechaibh. Ocus dá mac Uí Neill do ghabail ann, .i. Aodh & Eogan & Mac Cathmail do mharbadh ann, .i. Cu Uladh, mac Emuinn & Tomas, mac Emainn & dá mac Gilla Phadraic mic Cathmail, .i. Emann & Brían.
Mac Uí Neill, .i. Brian, mac Cuinn, mic Enrí, mic Eógain Uí Neill, d'h-eg an bliadhain-si. Ocus do ba sai chinn-fhedhna an Brian-sin, gan choigill do chill no do thuaith aigi & fa terc fer a egaine 'sa Cuiccedh.
Da mac Ruaidhri, mic Briain Mhég Uidhir, do ghabail leisin g-Comarba Mhág Uidhir an bliadhain-si; .i. Ros & Tadhg.
Ab Esa Ruaidh d'h-eg an bliadhain-si; .i. Emann Dubh O Duibhír, saí duine.