Corpus of Electronic Texts Edition
Annals of Ulster otherwise Annala Senait, Annals of Senat (Author: [unknown])

Year U1518

U1518.0

{fol. B 106a} Kal. Ian. ui. f., l. xui., Anno Domini M. d. x. uiii.

U1518.1

An Deganach Mag Uidhir d'h-eg an bliadhain-si; .i. Aodh, mac an Espuic Mhég Uidhir, .i. mac Rosa, mic Tomais Oíg Mhég Uidhir, .i. nech do bi 'n-a


p.530

cananach coradh a Clochar & 'na persun a n-Achadh Lurchairi & 'na persun a Clain Ínís for Loch Éirne & do bo duine suairc, subhaltach & do bo sai clerigh, maille re beth deigheínigh & deghaithnech ar gac ealadháin d'á cluinedh co h-aimsir eitsechta.

U1518.2

Mac Suibhne Fánad d'h-eg an bliadhain-si; .i. Ruaidhri, mac Mail Muire Mic Suibhne.

U1518.3

Domnall, mac Seaain, mhic Pilib Mhég Uidhir, do crochadh leisin Comarba Mag Uidhir an bliadhain-si.

U1518.4

h-Ua h-Eoghusa d'h-eg an bliadhain-si; .i. Cithruadh, mac Aitheirne Uí Eoghusa, saí fhir dhána & foghlunntech maith & fer tighi n-aidhedh.

U1518.5

Feidhlimidh, mac Briain, mic Concabuir Oíg Mhég Uidhir, d'h-eg an bliadhain-si ar t-fhilled dó ó Chathair San Sem tareis a turais bliadhan na n-gras & a annlucadh a Mainister Muinechain. Duine dob' uaisle & do budh daonachtaighi d'á fine an Feidhlimidh-sin.

U1518.6

Innsoighidh le Pilib, mac Emainn Mhég Uidhir, a Tir Cendfhada ar Enri m-Balb O Néill & oilén Clabaigh do ghabhail leis & braighdi do bi ag Enrí do breth leis dó, .i. Aodh Balbh, mac Cuinn Uí Neill & mac Aodha Mic Gabhfraigh, do bí o Philib fein ann. Ocus Cathal, mac Duinn, mic Emuinn Mheg Uidhir, do mharbadh o Pilib do 'n turus-sin.

U1518.7

Mac Uí Neill, .i. Aodh Balbh, mac Cuinn Uí Néill, d'h-eg a n-deredh Fhoghmuir na bliadhna-si.