Corpus of Electronic Texts Edition
Annals of Ulster otherwise Annala Senait, Annals of Senat (Author: [unknown])
Year U1510
U1510.0
{fol. B 102d} Kal. Ian. iii. l. f., xuiii., Anno Domini M. d. x.
U1510.1
Sluagh la Geroid, Iarla Cilli Dara .i. Giústis Erenn, a Cuiced Muman co maithibh Gall & Gaidhel Laighen leis, d'ár' cumdaigh caislen d'aindeóin Gaidhel Muman a
p.492
Carraic Cital. Ocus lenais h-Ua Domnaill, .i. Aodh, mac Aódha Ruaidh, tresan Midhe 'sa Mumain é, ar began buidhne & tíaghait araon ar siubhal a n-Ellaib & gabait caislen Cinn Tuirc & airgit an tír & tiaghait iarum a n-Desmumain Móir & gabait Caislen na Pailisi & caislein Coisi Maingi co léir & ticit slán tar a n-ais a Cunntae Luimnigh. Doníat iarum a t-tinol sluaigh íar sin & cruinnighit Geraltaich na Muman im Shemus, mac Iarla Desmuman & Goill Muman arcena & Mag Carrthaigh Ríabach, .i. Domnall, mac Diarmata, mic Fingin & Cormac Óc, mac Cormaic, mic Taidg & Goill & Goidil Midhe & Laighen & tíagait co Luimnech. Ocus tinóilit Toirrdhelbach, mac Taidg Ui Briain, ri Tuaghmuman & Mac Con Mara & Sil Aodha & Clann Ricaird morshluagh ina n-aghaidh. Ocus téid an t-Iarla cona t-slúagh trid Bealaigh na Fadhbaighe & trid Belaigh an Gamna no co raínic droichet romaith croind do-rinded les O m-Briain tar Sinainn & brisis an droichet & anais oidhci a faslongpurt andsa tir. Ocus doní O Briain cona t-sluagh faslongport ré n-a toeb, indus co cluineadh gach cuid dib a comrádh, no an scélaighacht doníthi do 'n leth eile. Iarna mharach iarum
ordaighis in t-Iarla a t-shluagh & cuiris Goill &
p.494
Goidil Muman ar tus & cuiris Goill Midhe & Atha Cliath ar deredh a t-sluaigh. Toirrloingis O Domnaill an becan buidhne do bí & anais ar deredh amesc Gall. Gabait an athgirre
docum Luimnich trid Moin na m-Brathar & innsaighit na sluaigh sin t-Sil m-Briain an sluagh Gall & marbthar léo and Barún Cint & Bearna Bhalach Circistoún & dóine maithi eile nach airimter sund. Ocus imighit an sluagh Gall a cóir madhma & impait an sluagh-sin t-Sil m-Briain iar n-aithes & iar n-edalaibh imdhaibh. {fol. B 103a} Ocus ni raibe do Ghallaibh na do Ghaidhealaibh do 'nd da thaob-sin en lámh bud mó clú an la-sin aná O Domnaill, ac breith deridh t-shluaigh Gall leis.
U1510.2
Mac an Baird Tire Conaill, .i. Eoghan Ruadh, do dhol d'éc a n-Indsi Mic an Duirn an bliadhain-si.
U1510.3
O Fialáin, .i. Ferghal, mac Eoghain, sai ré dan, & re daónacht, d'fhagbail báis.
U1510.4
Eoghan, mac Briain Uí Uiginn, oide Connacht re dan, do dul d'h-ec.
U1510.5
h-Ua Domnaill, .i.Aodh, mac Aodha Ruaidh, tigerna Tíre Conaill & Ichtair Chonnacht & Ceniuil Moain & Innsi h-Eoghain & Fer Manach, do dhol a lár a aisi & a neirt, d'aindeoin gach aín, d'á oilithre docum na Romha.
U1510.6
O Ragalligh d'h-ec in bliadhain-si, .i. Seaan, mac Cathair Uí Raghalligh. Ocus is leis do cumdedh in t-Ord Minur de Obseruancia 'sa Cabhan.