Corpus of Electronic Texts Edition
Annals of Ulster otherwise Annala Senait, Annals of Senat (Author: [unknown])

Year U1508

U1508.0

Kal. Ian. uii. f., l. xxui., Anno Domini M. d. uiii.

U1508.1

Mac Még Mhathgamna, .i. Remann Óg, mac Rémainn aile Mheg Mhathgamna do mharbadh a n-domnach Muighi Dá Claine, lá fheili Padraig, lé mac Mhég Uidhir, .i. lé Pilib, mac Emhainn Mhég Uidhir, an bliadhain-so. Ocus mar so tharrla sin, .i. Pilib do dhul a n-onóir Padraig d'eistecht serbhise do 'n bhaile &, mar do bhádur ag estecht an Aithfrinn 'sa tempoll, Rémunn Óg do thecht, fedhan mór, fa 'n tempoll & téinnti do adhuint doibh a cethri ardibh an tempuill. Ocus mac

p.486

Még Uidhir gu sona, senamail d'á rádh nach léigfedh sé tempoll Padraig do loscadh & a muinntir do brosdughudh docum maithe do dhenum. Ocus Pilib & a braithri do dhol amach a n-ainm Dé & Padraig & Remonn Óg do trascart d'á eoch & a mharbadh & a comdalta do marbadh fáraon ris, .i. mac Briain Ruaidh mic Ghilla Bhrighdi & braighdi do gabail ann fós. Ocus do moradh ainm Dé & Padraig trit-sin.

U1508.2

Donnchadh (.i. Donnchadh Caoch), mac Briaín, mic Pilib Mhég Uidhir, d'h-eg an bliadhain-so.

U1508.3

Pilib, mac Briain, mic Feidhlimthe Ui Ragalligh, .i. cenn-fedhna & fer tighi aidedh & duine dob' {fol. B 102b} fherr aithne ar gach ealadhain d'á roibhi a n-Gairb Trian an am-sin, a ég an bliadhain-si, Aine Chasc mór do sunnradh, iar m-buaidh Ongta & aithridhe.

U1508.4

O Domnaill, .i. Aodh, mac Aodha Ruaidh Uí Domnaill, do thecht, loingis, ar Loch Érne an bliadhain-so & caislen Ínnsi Scillinn d'fagbail dó ó Ruaidhri Mhág Uidhir. Ocus O Domnall do thabairt an chaislein isin do Pilib, mac Toirrdelbaigh Mhég Uidhir. Ocus braighdi an tíri d'faghbail dó fós. Ocus O Néill (.i. Domnall) & Mag Uidhir (.i. Concabur) do thecht gu h-Ínís Sceillinn & a ríarughudh doibh & Pilib, mac Briain Mhég Uidhir, do brisedh a chaislein féin ar egla Ui Domnaill & clann Briain d'fhágbail an tíri, .i. Ruaídhri, a cend Uí Ruairc & Pilib, a cend Airt Óig, mic Cuinn Uí Neill. Ocus

p.488

cogadh mór eter shlicht Pilib Meg Uidhir de sin.

U1508.5

Mac Uí Ruairc, .i. Tighernan Óg, mac Eoghain, mic Tighernain aile, do marbadh le Seaan, mac Tighernain Fhínn Ui Ruairc, an bliadhain-si.

U1508.6

Insoighidh le cloinn Donnchaidh Mhég Uidhir, .i. le Tomas & le Pilib & le Féidhlimidh & le Clainn t-Sheaain Bhuidhi Még Mhathgamna ar Mag Uidhir, .i. ar Conchabur. Ocus Mag Uidhir do breith orra & brisedh dó orra & Feidhlimidh, mac Donnchaidh, do marbadh leis & Brian, mac Seaain Bhuidhi Még Mhathgamna, do bualadh & do ghabail leis.

U1508.7

Somairli Bacach, mac Somairle aile Mic Domnaill, cend cóirighthe galloglach do muinntir Uí Néill, d'h-eg an bliadhain-si.

U1508.8

Crecha mora le h-Art, mac Cuinn Uí Neill, ar Cheinel Feradhuigh & Eoghan Ruadh, mac Uí Neill, do breith air clainn mic Cathmhaíl & Aonghus, mac Somairle Bhacaigh Mic Domnaill, do mharbadh fa Art & Art fein d'imdhecht ar éigin & na crecha do breith leis dó.

U1508.9

Níall, mac Alaxdrainn Mic Caba & Enrí, mac Briain Mic Cappa, d'h-ec an bliadhain-si.