Kal. Ian. ui. f., l. xu., Anno Domini M. d. uii
h-Enri, mac Aodha Uí Néill, saí chinn-fhedhna & duine dob' fherr aithne ar gach ealadhain ina aimsir féin, d'h-eg an bliadhain-so im fhéil Cros.
O Flannagain d'h-eg do bhidhg a tus Erraigh na bliadhna-so; .i. Muircertach, mac Muircertaigh Uí Fhlannagain.
Ingen Mhég Uidhir, .i. Gráine, ingen Emhuinn Mhég Uidhir, ben Pilib, mic Toirrdelbaigh Mhég Uidhir, d'h-eg an bliadhain-so: .i. ben dercach, daonachtach, chogusach, deigheinigh.
Mainister Clochair do loscadh an bliadhain-so im fhéil Padraig.
Feilimidh Mhág Uínsennain d'h-eg, .i. breithemh Uí Dhomnaill & Oiffiscel Thíri Conaill & saí clerigh & duine do badh mo cogus &
Niall, mac Cuinn, mic Aodha Buidhi, mic Briain Bhallaigh Uí Neill, do ghabail le muinntir Chairrgi Ferghusa an bliadhain-so & a beth tamall a laim & sé braighdi dheg do bhuain ass 'g á léigin amach. Ocus an caislen cetna-sin do ghabail do Niall, mac Cuinn & méra {fol. B 102a} an bhaile do ghabail ann.
Tempoll Achadh Beithi do loscadh an bliadhain-so & urmhór maithisa in tíri uile do loscadh ann. Ocus bliadhain tésta do coicait bliadhan o 'n cet loscadh guruigi sin & fiche bliadhan o 'n loscadh tanuisti bheós.
Emann, mac Tomais Óig, mic Tomais aile Még Uidhir, d'h-eg an bliadhain-so do thinnis en oidhchi.
Mág Raith, .i. Tomas & Mac Con Mhidhi, .i. Solamh & h-Ua Cuill, .i. Cenn Faolaigh & h-Ua Dalaigh Fínn, .i. Gaffraigh & h-Ua Dalaigh Cairbrech, .i. Aonghus & h-Ua Gerain, .i. Seaan hii omnes poete hoc anno in Christo dormierunt.