Corpus of Electronic Texts Edition
Annals of Ulster otherwise Annala Senait, Annals of Senat (Author: [unknown])

Year U1506

U1506.0

Kal. Ian. u. f., l. iiii., Anno Domini M. d. ui.

U1506.1

Mac Meg Uidhir, .i. Aedh, mac Emuinn, mic Tomais Oig Meg Uidhir, do marbadh an bliadhain-si le cloind Cuind h-Ui Neill & le Pilib, mac Gilla Padraig Meg Uidhir, a toraidhecht creiche do-rinne mac h-Ui Neill, .i. Aedh, mac Cuinn Ui Neill, ar Cuil na n-Airther.

U1506.2

Mac Goffraigh Ruaidh Meg Uidhir d'h-eg, .i. Magnus.

U1506.3

Mac Briain Theallaigh Eathach d'h-eg, .i. Feidhlim.

U1506.4

Semus, mac Pilib, mic an Gilla Duibh Meg Uidhir, d'h-eg.

U1506.5

Tomas, mac Oiliuer Pluingced do marbadh le cloind Mathgamna h-Ui Raighilligh, idon leisin Calbaigh, mac Feidhlím & lena cloind. Ocus cogadh Gall & Gaeidhel d'eirghi trid-sin.

U1506.6

Paidin h-Ua Mael Conaire, en rogha Erenn a filidhecht & a senchus, do abailt do bidhg, aidhchi Luain Minchaisc & araile.

U1506.7

{fol. B 101c}Mac h-Ui Cathain, .i. Brian Finn, mac Seaain h-Ui Cathain, do marbadh le Domnall, mac Neill, mic Enri, mic Eogain h-Ui Neill. Ocus mac do 'n Brian-sin, .i. Maghnus h-Ua Cathain, do marbadh le Donnchadh h-Ua


p.480

Cathain 'sa raithi cetna.

U1506.8

Tomas Buidhe Mag Coscraigh, .i. aircinnech Cluana Eosain, d'h-eg.

U1506.9

Mac Uibhilin, .i. Ualtar, mac Cormaic, mic Séinicin Mic Uibhilin, do marbadh leis O Cathain, .i. le Tomas, mac Aibne h-Ui Cathain & le cloind t-Sheaain h-Ui Cathain, .i. le Donnchadh & le Domnall Cleirech. Ocus do marbadh maille fris ann da mac Tuathail h-Ui Domnaill & da mac h-Ui Ara & tri mic h-Ui Buighellain & da mac h-Ui Chuinn. Acht cena, do-thuitetur ceithri fir dec do mhaithibh a muinnteri mailli fris. Ocus troscadh laei Lughnasadh do-ronait insin.

U1506.10

Baile Atha Truim do loscadh do 'n leth tall d'uisce d'urmor de teinidh diiait hoc anno.

U1506.11

Aedh Ruadh, mac Glaisne Meg Mathgamna, do marbadh leis O Raighilligh, .i. le Seaan, mac Cathail h-Ui Raighilligh & lena cloind in bliadhain-si.

U1506.12

Mag Murcaidh do marbadh an bliadhain-si ag buain creichi de do glac se a Fern Muigh.

U1506.13

Rughraidhe, mac Toirrdelbaigh Meg Uidhir, do lot gu guasachtach ina shuil do urchur do shaighid a tóraidhecht creichi do-rinne Emunn, mac Philib, mic Briain Meg Uidhir ar cuid do Teallaigh Eathach.

U1506.14

Cogadh mor & dighbala ímdha eter in da Philib trid-sin, .i. Pilib, mac Toirrdelbaigh Meg Uidhir & Pilib, mac Briain Meg Uidhir & araile.

U1506.15

Roinn duthaigi do luadh eter slicht Pilib Meg Uidhir in bliadhain-si. Ocus Ruaidhri, mac Briain Meg Uidhir & a clann do beth ag iarradh na ronna-sin & Pilib, mac Briain, do thabairt Albanach chuige, .i. Somairle Aneloigh, cona muinntir & crech do dhenum doibh air Ruaidhri. Ruaidhri, imorro, & Pilib, mac Toirrdelbaigh Meg Uidhir, do dhul a tóraidhecht na creiche. Mac Toirrdelbaigh do beth ag iarradh gan an tóraidhecht do dhenum an la sin &


p.482

sidh do denum. Ruaidhri do dul tar comairle & an crech do lenmuin doibh. Albanaigh do impodh friu & brised forro & Ruaidhri do ghabail annsin {fol. B 101d} & a mac do marbadh, .i. Seaan Mag Uidhir. Ocus Pilib, mac Toirrdelbaigh Meg Uidhir, do gabail ann & a lot gu guasachtach ina cois & a legan amach gu luath iar sin. Ocus milledh an tire uile do thecht de sin, eter cill & tuaith, mar nach tainig re h-aimsir fhada roime-sin & araile.

U1506.16

Domnall O Craidheain, .i. cennaigi onorach, cogúas, a eg do bidhg ag eistecht Aiffrinn a mainister Duin na n-Gall an bliadhain-si.

U1506.17

Mac Briain Mic Magnusa d'h-eg (.i. aidchi Nollaig móir) .i. Murchadh; nech da n-goirthi an Gilla Dubh, mac Tomais Oig, mic Tomais Mhoir, mic Briain, ar caithim morain da ais re tegh n-aidhedh & araile.

U1506.18

Maghnus Mac Amlaim d'h-eg, .i. mac Briain, mic Amlaim Meg Uidhir.