Kal. Ian. for Cetain, l. xxiii., Anno Domini M. d. u.
Mag Carrthaigh Riabach d'h-eg in bliadhain-si, .i. Fingin Mag Carrthaigh.
{fol. B 101a}Abb mainistrech Muighi Cosgain, .i. an t-Ab O Cathain, do crochadh le Ruaidhri, mac Magnusa h-Ui Cathain, in bliadhain-si.
Cairpri, mac Briain h-Ui Uiginn d'h-eg do bidhg in bliadhain-si.
O Domhnuill d'h-eg in bliadhain-si, .i. Aedh Ruadh, mac Neill Gairb, mic Toirrdelbaigh an Fhina h-Ui Domnuill. Ocus ni thainig o Brian Borumha, no o Cathal Croibderg, anuas ri, no tigherna, dob' ferr smacht & riagail & do bo mo nert ina 'n rí-sin. Ocus is e do chosain tighernus o Sliabh anuas ar Chonnachtaibh do Conallchaibh & cis Innsi h-Eogain & buannacht Cinel Modhain o Clannaibh Neill. Ocus is leis do cumdaighedh maínister Brathar Mínur de Obseruancia a Tir
Prioir Fobhair d'h-eg, .i. Emunn Dorcha, do shlicht an Ridere, .i. an t-Simunaigh.
Feidhlim, mac Neill, mic Airt h-Ui Neill, do marbadh la clainn (Briain, mic Aedha Meg Uidir).
Sluaighedh le mac h-Ui Domnaill, .i. Aedh Og, mac Aedha Ruaidh, a Tir n-Eogain & baile h-Ui Neill (.i. baile Domnaill h-Ui Neill) do loscadh leis & baile Aedha, mic Domnaill h-Ui Neill & baile Briain, mic Domnaill Ui Neill & o Abhuind Mhor astech do imthecht leis gan frithbert, gan imresain. Ocus suide fa caislen na Dergi do ar a ímpudh & an caislein do ghabail do & a barda fein d'fhagbail ann & a dhul assin co Cill Mic n-Enain & ainm righ do gairm dhe for Thir Conaill do thoil De & daine & araile, 2 die mensis Augusti.
Sluaighedh leis h-Ua Neill, .i. le Domnall, a n-Dartraigi Oirgiall & an tir do milliudh & do crechadh leis & Aedh, mac Seaain Buidhe, mic Eogain Meg Mathgamna, do marbadh ann & araile. Ocus O Neill do toighecht dia tigh do 'n turus-sin fo buaidh cosgair.
Domnall, mac Airt h-Ui Neill, do marbadh le Brian, mac Cuinn h-Ui Neill.
Mac Domnaill Galloglach, .i. consabal h-Ui Neill, do marbadh a feall a n-Ard Macha, .i. Colla, mac Colla aile, le clainn Gilla Espuic, mic Somairle Ruaidh Mic Domnaill.
Ingen Iarla Cille Dara (.i. Geroid Iarla), .i. ben baruin Slaine (.i. Sar Uilliam Bailis), d'h-eg do 'n plaidh. Ocus an bean do bi ag an bharun mor d'h-eg do 'n chas cetna.
Fliuchaimsir do shir an bliadhain-si, innus gur' mill arbannu Erenn d'urmhor & co h-airighi a Feraibh Manach.
Padraig O Feidhil d'h-eg .i. Brathair Minur de Obseruancia & {fol. B 101b} senmontaighi oirrderc, onorach a n-Erinn & a n-Albain. Ocus a eg a mainister Tegh Molaigi & a adhlucadh innti.
Eogan, mac Emuinn Meg Uidhir, do marbadh le cloind Gilla Padraic Meg Uidhir a toraidhecht creichi. Ocus Fergus Mor Mac Caba do marbadh o cloind Gilla Padraic ar an cumusc cetna.
Prioir Daim Innsi d'h-eg, .i. Labrais, mac an Priora Moir h-Ui Flannagain.
Cormac, mac Cormaic h-Ui Fhlannagain, d'h-eg.
Concobur Riabach O Caiside d'h-eg, .i. fer daenachtach, deghsolathair & maighistir saethair maith, fer tighi aidedh & araile.
Eogan Dubh Mac Amlaim mortuus est.
Mac Meg Uidhir, .i. Toirrdelbach, mac Seaain mic Pilib Meg Uidhir & da mac Taidhg Mic Gaffraig & Tadhg Óg Mac Gaillghille, ocht n-duine deg, do bathudh a n-en choiti ar Finnloch in bliadhain-si.
O Fedhaigh Machaire
Seaan a Burc do marbadh le cloind Uilleg a Burc.
Ingen Meg Samradhain, .i. Una, ben Fhailghi, mic Domnaill Bain h-Ui Raighilligh, d'h-eg in bliadhain-si.
In Gilla Gruamdha, Mac an Caeich h-Ui Raighilligh, do marbadh ina tigh fein la ceirbach dia cinedh fein d'en urchur do sgin, aidhci Luain Chasc.
Uilliam Og Mag Treinfher d'h-eg an bliadhain-si do uthar a choisi.
Isibel, ingen Ghilla na Naem h-Ui Droma, mortua est.