Corpus of Electronic Texts Edition
Annals of Ulster otherwise Annala Senait, Annals of Senat (Author: [unknown])

Year U1504

U1504.0

Kal. Ian. ii. f., l. xii., Anno Domini M. d. iiii.

U1504.1

Prioir Locha Derg d'h-eg in bliadhain-si .i. Toirrdelbach, mac in espuic Meg Uidhir, ar tuitim do do sdaighri cloch a m-Baile Atha Buidhe & a adhlucadh i mainistir in Chabhain. Ocus rob' fhear suairc, subaltach, moirealadhnach an Toirrdelbach-sin & do bi se ina chananach coradh a Clochar & ina persun a n-Doire Mhaelain & 'na prioir ar Loch Derg a n-ein-fhecht. Ocus fa fheil Padraig ad-bath.

U1504.2

{fol. B 100c} O Caiside Cuile d'eg an bliadhain-si, .i. Piarus, mac Tomais h-Ui Chaiside, .i. ollam leagha Mheg Uidhir & sai derbtha i l-leighind & a fisigecht & a teoreicecht & a praiticecht & fer tighi aidhedh gu coitchenn do cach. Ocus a eg do chluichi an righ. Mailechlainn, mac Aithirne h-Ui Eoghusa d'h-eg in bliadhain-si do 'n galar cetna.

U1504.3

Ainnrias Mag Raith d'h-eg in bliadhain-si, .i. mac comarba Termuinn Da Beooig. Ocus ni roibe re n-a linn fein a n-Erinn an tan-sin mac termonnaigh budh mho cáta & onoir & dob' ferr tech aidhedh innas e.

U1504.4

Mac Mic Diarmata Muighi Luirg do marbadh an bliadhain-si, .i. Concobur, mac Ruaidhri Mic Diarmata, le Mael Ruanaigh, mac Tomaltaigh Mic Diarmata.

U1504.5

Art, mac Cairbri, mic Aedha h-Ui Neill & a mac & a derbrathair do marbadh le slicht Remuinn Meg Mhathgamna in bliadhain-si.

U1504.6

{fol. A 116c}Somairle Aneloigh,

p.468

mac Aenghusa Mic Domnaill, .i. ceand coirighthi Albanach do bi ag Mag Uidhir (.i. ag Conchobur), do gabail in bliadhain-si le h-Aedh, mac Seaain Buidhe Meg Mathgamna & moran do na h-Albanchaibh do ghabail & do marbadh leis fos.

U1504.7

Brian, mac Mheg Uidhir, .i. mac Seaain, mic Pilib Meg Uidhir, d'h-eg in bliadhain-si.

U1504.8

Bicair Cluana Eois d'h-eg in bliadhain-si, .i. Ruaidhri, mac an Comarba Moir Meg Mathgamna.

U1504.9

Abb Cluana Eois d'eg in bliadhain-si (do cluichi in righ), .i. Gilla Padraig, mac Enri h-Ui Chondalaigh, ar n-gnothughadh espocoide Clochair do.

U1504.10

Abb Cenanntais d'h-eg in bliadhain-si, .i. Pilib, mac an Espuic h-Ui Raighilligh & a derbrathair aile (.i. Eogan), .i. cananach do bi 'sa baile cetna, do cluichi in righ sin fos.

U1504.11

Sluaighedh lesin n-Giustis, .i. Iarla Cille Dara, .i. Geroid, mac Tomais Iarla & urmor Gaidel Erenn maille fris, .i. O Domnaill & O Raighilligh & Mag Mhathgamna & O Ferghail & O Conchobuir Fhailgi & Gaeidhil Lethe Cuinn uile, achtmadh O Neill amhain, ar Mac Uilliam Clainni Ricaird. Ocus O Briain a foiridin Mic Uilliam. Ocus teagmhail d'a cheile doib a Clainn Ricaird ar Cnoc Tuagh & gnithir cath croda etorra da na frith inntshamhail 'sa n-aimsir n-deighenaigh. Co clos co fada o na fedhnachaibh-sin cathais na cathmiledh & fedhmanna na feinnedh & ruathar na ridhamna & torann na triath & broscar na m-buidhin ag a m-baeghlughadh; mellghal & menmanrad na macraidhe & na maethoglach & athmhairecht na treinfer ag a tescadh & imurcraidh na n-uasal arna h-uirislibh. Maidigh tra in cath ar {fol. B 100d} Mac Uilliam & ar h-Ua m-Briain

p.470

& cuirter a n-ár. Ocus an baile irrabadur na noi coirighthi galloglach ina cipi comdaingin catha, ni terno i m-beathadh dib acht aen chorúghadh uiresbach nama.

Ocus ni rainig airim ar mharcachaibh, no ar troightheachaibh ann,

gur' aimreidhigheadur an fhaighthi o na h-echtaibh-sin re h-imad na craisech & na cloidhim & na cathsciath & na colann crosbuailti comarthach & na slaedoglach sinti, secmharbh & na n-gillaidhe namulchach, n-eidighi 'n-ait-breghdha. Gur' cuireadh ár na Muimnech in móir-ghliaidh-sin & co n-dorcradar sochaidhe imdha d'anradhaibh in Iarla do 'n leth aili. an t-Iarla, imorro, do impodh dia thigh do 'n turus-sin fo buaidh cosgair & cethrur do cloinn Mic Uilliam a laim leis, .i. dias mac & dias ingen, beos.

U1504.12

Fuabairt fheille ar h-Ua & Neill (.i. ar Domnall) in bliadhain-si lena muinntir fein, .i. le Tadhg h-Ua n-Ogain & lena cloinn a caislen h-Ui Neill fein & an caislen do ghabail doibh. Ocus Dia do impodh forro-sum 'sa n-uair-sin fein & an baile do buain dibh & Tadhg féin & dis da chloinn do chrochadh & an tres fer do sgathadh {fol. A 116d} dib 'san lo cedna.

U1504.13

Greis oidhce le Pilib, mac Emuinn Meg Uidhir, a Lucht Tighi Meg Mathgamna & Eogan Ruadh, mac Cuinn, mic Magnusa Meg Mhathgamna, do marbadh leis & derbrathair aile do. Ocus toir trom do leanmuin

p.472

Pilib & ser le h-ochtar da mhuinntir do buain de, a timcell mic Remuinn (.i. Donn), mic Briain, mic Anrigh Meg Uidhir & daine aili nach airimter sunn. Ocus imthecht ar eigin do Philib fein & do chuid aile dia muinntir co h-aithuseach & araile.

U1504.14

Tomas Ruadh, mac an Abad (.i. ab Lesa Gabail), .i. mac Uilliam, mic an Espuic Meg Uidhir, d'h-eg in bliadhain-si.

U1504.15

Flaithbertach, mac Failghi, mic Briain Mic Caba, do marbadh an bliadhain-si le Brian, mac Alaxandair Oig Mic Caba a trodan.

U1504.16

Mag Samradhan d'h-eg an bliadhain-si, .i. Emonn Mag Samradain.

U1504.17

O Cianain, d'h-eg, .i. Gilla Padraig, mac Taidhg Ui Cianain.{fol. A ends}