Corpus of Electronic Texts Edition

Annals of Ulster otherwise Annala Senait, Annals of Senat (Author: [unknown])

Year U1503

U1503.0

{fol. A 116a} Kal. Ian. i. f., l. i., Anno Domini M. d. iii.

U1503.1

Mag Uidhir d'h-eg an bliadhain-si, .i. Seaan, mac Pilib, mic Tomais Moir (.i. an Gilla Dubh) Meg Uidhir: en rogha uirrigh Erenn 'mun am-sin & an t-aen Ghaeidhel do bo mo trocaire & daenacht do bi ina aimsir & is ferr do chothaigh & do chosain a thir & a thalmain fein ar nert coicrich & dob' ferr smacht & riaghail a cill & a tuaith. A eg ina morlongport fein a n-Inis Sgeillind, 'sa sechtmadh Kallainn do mhí Aipril fa buaidh Ongtha & aithrighe, Dia Domnaigh do shunnradh, iar n-eitsecht n-uird Aiffrinn do. Ocus a adhlucadh a mainistir Duin na n-Gall, iar togha dó innti & araile.

U1503.2

Mac Uilliam Burc d'eg in bliadhain-si, .i. Teaboid, mac Uater a Búrc.

U1503.3

Mac h-Ui Domnaill, .i. Donnchadh na n-Ordog, do ghabail le clainn Cuinn h-Ui Neill in bliadhain-si. Ocus Albanaigh do bi ag clainn Cuinn da breith leo a cenn h-Ui Domnaill fein & Domnall, mac h-Ui Domnaill, do sgathadh Donnchaidh do 'n chur-sin & a ég dhe & araile.

U1503.4

Brian, mac Aedha Mheg Uidhir, d'h-eg an bliadhain-si.

U1503.5

Emunn, mac Eogain, mic Aedha Mheg Uidhir, {fol. B 100b} do marbadh

p.464

U1503.6

Ben righ Saxan d'h-eg in bliadhain-si, .i. ingin Cing Edbard & Isibel a h-ainm: ben do bo mó deirc & daenacht o Eadail co h-Erinn. Ocus inghin righ na Caislen do thabairt ina h-inadh do 'n righ.

U1503.7

Gairm o righ Saxan ar an Giustis an bliadhain-si, .i. ar Iarla Cille Dara, .i. ar Geroid, mac Tomais Iarla & a dhul a luing an Domnach ria m-Beltaine a m-Baile Atha Cliath.

U1503.8

Mac Domnaill Galloglach, .i. Eoin, mac Somuirle Mhoir mic Domnaill, do marbadh an bliadhain-si le clainn Colla Mic Domnaill & Mac Domnaill do ghairm do Cholla fein ina dhiaigh-sin.

U1503.9

An Mabach do mharbadh in bliadhain-si ina chaislen fein le cloinn Emuinn, mic Glaisne h-Ui Raighilligh & cogadh mor d'eirghi eter Ghallaibh is Ghaidhelaibh de sin & dighbhala mora ar Ghallaibh fos do 'n chogadh-sin & mac Símain do marbadh o Ghaeidhelaibh & araile.

U1503.10

Mac h-Ui Chathain, .i. Risderd, do sgathadh lena derbrathair fein, .i. le Domnall Cleirech O Cathain.

U1503.11

An Giustis, .i. Iarla Cille Dara, .i. Geroid, mac Tomais, {fol. A 116b} do thecht fa onoir mhoir ó righ Saxan a n-Erinn in bliadhain-si, a cenn sechtmaine d'Fhoghmur. Ocus a mac, do bi ocht m-bliadhna a Lunnaind a m-braighdenus tairisi uadha ag an righ, do thabairt leis dó & ben do thabairt da mac t-shoir, .i. ingen Iarla.

p.466

U1503.12

Mac Tomais Pluingced d'h-eg an bliadhain-si, .i. Alaxandair, fer dighníte moire & Gallmacamh dob' ferr ina aimsir fein. Ocus a eg isna laithib a tanaig in t-Iarla & araile.