Corpus of Electronic Texts Edition

Annals of Ulster otherwise Annala Senait, Annals of Senat (Author: [unknown])

Year U1502

U1502.0

{fol. A 115c} Kal. Ian. uii. f., l. xx., Anno Domini M. d. ii.

U1502.1

Indsoighidh leis O Raighilligh, .i. le Seaan, mac Cathail h-Ui Raighilligh, ar Pilib, mac Toirrdelbaigh Meg Uidhir & eachreidh an tire os cind Clainni h-Amhlaim do shibal & do loscadh leo & Emonn, mac Pilib Riabhaigh Mic Amhlaim, do marbadh leo & u.er, no ui.er, aile. Ocus do marbadh fa 'n sluagh, .i. mac h-Uí Raighilligh, .i. Domnall an Mhagha & mac Mic Mheol Mhartain, .i. Concobur.

U1502.2

Mac Mic Rithbertaigh, .i. Maelechlainn, mac Con Chonnacht Mic Rithbertaigh, .i. mac olloman Meg Uidhir re dan, do marbadh a feall le h-Emonn Carrach, Mac Briain Mic Maghnusa & le mac Mic Rusteil an bliadhain-si.

U1502.3

Toisc le mac Seaain Buidhe Mheg Mathgamna & le clainn Emuind Meg Uidhir ar clainn Flaithbertaigh Mheg Uidhir, d'ar' crechadh iad, achtmadh bec & d'ar' gabadh Brian Crosach, mac Flaithbertaigh & h-e buailti. Ocus Toirrdelbach, mac Flaithbertaigh, d'fhágbail a richt duine mairbh & Concobur, mac Taidhg h-Ui Chaiside (.i. sai leagha), do tromlot ann & a ég dhe.

U1502.4

Donnchadh (.i. mac Meg Uidhir), mac Concobuir, mic Tomais Óig Meg Uidhir, d'h-eg in bliadhain-si da lot: .i. a lot roime-sin a maidm Shleibhe Beatha & a eg di fa dheoigh. Ocus dob' uasal, deigbesach in mac-sin.

U1502.5

O Baighill, .i. Niall h-Ua Baighill & a dhias mac do marbadh le clainn Toirrdelbaigh h-Ui Baighill an bliadhain-si.

U1502.6

Art, mac Enri, mic Eogain h-Ui Neill, d'a marbadh an bliadhain-si le h-Art, mac Cuinn, mic Enri, mic Eogain cetna & Eogan, mac Aedha, mic Airt

p.460

U1502.7

Mainistir an Chabhain do ghnothughadh o 'n Roim in bliadhain-si leis O Raighilligh, .i. le Seaan, mac Cathail h-Ui Raighilligh, do na Braithribh de Obseruancia a n-aghaidh na m-Brathar de Communi Uita.

U1502.8

Eogan Bocht, mac Neill, mic Enri h-Ui Neill, d'h-eg in bliadhain-si.

U1502.9

Cathal, mac Mailechlainn Duibh Meg Shamradhain, do marbadh an bliadhain-si le clainn h-Ui Raighilligh (.i. le clainn Sheaain, mic Cathail), ar tarraing mic Briain & a chloinne.

U1502.10

{fol. A 115d}Da abb do bi fada a coinntinn fo abdaine Essa Ruaidh, .i. Art, mac an espuic h-Uí Ghallchubair & Eoin h-Ua Laisdi, {fol. B 100a} a n-eg fa dha ló gu n-oidhci a n-diaigh a cheile.

U1502.11

Ingen Ruaidhri Caeich Meg Uidhir d'ég in bliadhain-si, .i. Medbh, in ben do bí ag Tadhg Mac Gaillghile & rug clainn do 'n abb og.

U1502.12

Comhorba Cluana Eois d'h-eg in bliadhain-si, .i. Sémus, mac Rughraidhe Meg Mhathgamna, in xc.a annorum senectute.

U1502.13

Tadhg, mac Cuinn, mic Domnaill h-Ui Neill, d'h-eg in bliadhain-si.

U1502.14

Domnall, mac Feidhlím h-Ui Neill, d'h-eg in bliadhain-si.

U1502.15

Donn, mac Pilib Mheg Uidhir, d'h-eg in bliadhain-si.

U1502.16

Domnall, mac Briain Ui Uigind, oide scol Erenn & Alban re dán, d'h-eg.

U1502.17

Doinenn dermar isin bliadhain-si, gur' mairbh urmhor eallaigh Erenn & gur' tairmisc frecar na talman um na treabtachaibh.

U1502.18

Ruaidhri, mac Muircertaigh Ui Fhlannagain, do marbadh la slicht Aedha Ui Ruairc.

U1502.19

Indsaighidh la Mag Uidhir (.i. Seaan) & la h-Aedh h-Ua n-Domnaill a n-Dartraighi Conindsi for mac Seaain Buidhi Meg Mathgamna &

p.462