Corpus of Electronic Texts Edition
Annals of Ulster otherwise Annala Senait, Annals of Senat (Author: [unknown])

Year U1501

U1501.0

{fol. A 115a} Kal. Ian. ui. f., l. ix., Anno Domini M. d. i.

U1501.1

Mac Meg Uidhir do mharbadh an bliadhain-si, .i. Tomas, mac Tomais Oig Meg Uidhir, mic an Gilla Duibh (.i. Mag Uidhir), ar Sliabh Beathadh le clainn Briain, mic Remuinn Meg Mathgamna, co n-ar di-airnidhe ina timcell. Ocus is iad so na maithi ro marbadh ann ina fhochair: .i. Gilla Isu, mac Emuínn Meg Uidhir


p.452

& Tomas, mac Duinn, mic Emuind Meg Uidhir & Cormac, mac Seaain, mic Emuínn, cetna & Ruaidhri Buidhe, mac Emhuinn Oig Meg Uidhir & Ruaidhri, mac Emuind, mic Tomais Greannaigh Meg Uidhir & Emund, mac Aedha, mic Briain Meg Uidhir, & Maghnus Eoghanach, a derbrathair-sin. Ocus do marbadh and da mac Taidhg, mic Dhaibheid, mic Gilla Bhuidhe mic Maghnusa, {fol. B 99c} .i. Brian & Dondchadh & u.er aile do 'n cinedh cetna. Ocus do marbadh ann morseisear & dá fhicheat do 'n cuairt-sin.

U1501.2

Rughraidhe, mac Ui Concobuir Failghi, .i. mac Cathair, mic Cuind, mic an Calbaigh, d'h-eg.

U1501.3

Rughraidhe, mac Meg Mathgamna (.i. mac Brian, mic Remaind), dó marbadh le clainn Meg Aengusa an bliadhain-si.

U1501.4

Mac Caba d'h-eg an bliadhain-si, .i. Ruaidhri, mac Enri Mic Caba.

U1501.5

Ruaidhri, mac Aedha Ballaigh Mic Domnaill, d'h-eg, .i. ceand coirighti galloglach do muinntir Ui Neill.

U1501.6

Niall, mac Airt, mic Eogain Uí Neill, d'h-eg mí ria Nodlaic: .i. saí cinn-fedhna.

U1501.7

Somhairli, mac Alastrainn Oig, mic Alastrainn Moir Mic Caba, d'h-eg gar ría Nodlaig.

U1501.8

Ingen Mic Mhaghnusa d'h-eg in bliadhain-si, .i. Mór, ingen Cathail Oig, mic Cathail Mhoir Mic Maghnusa, .i. ben h-Ui Fhialain, .i. Fherghail; saí mhna gan fhrasabhradh.

U1501.9


p.454

Caislen Sligigh do ghabail le dreimiribh seólta as a bharr anuas an bliadhain-si le clainn {fol. A 115b} Ruaidhri, mic Thoirrdelbaigh Charraigh h-Ui Conchobuir & le clainn Feidhlím, mic Toirrdelbaigh Charraigh. Ocus an Calbhach Caech, mac Domnaill, mic Eogain h-Ui Concobuir, do marbadh ann & Seaan, mac Ruaidhri, mic Toirrdelbaigh Carraigh Ui Choncobuir, do thuitim leisin Chalbach ar an lathair cetna.

U1501.10

Aibne, mac h-Ui Cathain, .i. mac Seaain Ui Cathain, do marbadh in bliadhain-si l' a derbrathair feisin, .i. Brian Find.

U1501.11

Crecha mora la clainn Aedha Ui Neill for Mag Mathgamna, .i. Ros, mac Maghnusa, in bliadhain-si.

U1501.12

Gilla na Naem Mac Domnaill (.i. Mac Domnaill Clainni Ceallaigh, .i. mac Cormaic, mic Airt, mic Domnaill) do marbadh la Feidhlim, mac Donnchaidh, mic Tomais Oig Meg Uidhir, a tus Samraidh na bliadhna-sa.

U1501.13

Cocadh eter Oirgiall fein: .i. slicht Aedha Ruaidh & slicht Remaind. Mag Mathgamna (.i. Rosa) do breith a chaeraighechta leis for an Lucht Tighi & slicht Remaind do cur asin tir amach a cenn Uí Neill. Mag Mathgamna do innsaighidh for slicht Remaind co Muinechan & tegmhail da cheli doibh fa Ath an Coleir & Toirrdelbach (.i. mac ingine an Iarla), mac Cuinn,


p.456

mic Enri Ui Neill, do beth ag congnam la slicht Remaind. Toirrdelbach imorro — .i. mac righ a aesa fodein rop' ferr do 'n fhuil Gaidhelaigh — do marbadh annsin la Mag Mathgamna & Eoin, mac Colla Mic Domnaill, .i. mac Mic Domnaill Galloclach, do marbadh ann et alii multi.

U1501.14

Seaan, mac Rosa Espuic, mic Tomais OicMeg Uidhir, nech do bi ina cananach coradh i Clochar & ina persun & ina aircindech i nd-Achaidh Urchuire, d'h-eg {fol. B 99d} i n-Id Iuin na bliadhna-sa, mane die Dominico: .i. aen macamh ro ba shuarca, shubaltaighe a Leth Cuinn & ro pa treighidhe i n-gach ealadhain, iter leigheann & Gaidhilg & a treighibh tuatta airchena & fer thighi aidhedh coitchinn.

U1501.15

Maidm mor i n-Ard Macha in bliadhain-si (.i. la feili Padraig do shunradh) for Albanchaibh: .i. tri fichit do marbadh dib le slicht Aedha h-Ui Neill & le h-Art, mac Aedha h-Ui Neill & lena braithribh . Ocus is iad dob' fhearr do marbadh ann, .i. mac an tigherna Aíg & tri mic Colla, mic Alaxandair Mic Domnaill, .i. Toirdelbach & Donnchadh & Ludar.


p.458