{fol. B 99a} Kal. Ian. 4 f., l. xxuii., Anno Domini M. d.
Ocus bliadhain na n-gras isin Roim h-i: .i. an dorus ordha d'fhoslucudh & bliadhain Bisex beos h-í.
O Ruairc d'h-eg an bliadhain-si, .i. Feidhlim, mac Donnchaidh, mic Tighernain & Eogan, mac Tighernain, mic Taidhg h-Ui Ruairc, do righadh ina ínadh.
Tadhg Og, mac Taidhg, mic Tighernain h-Ui Ruairc, d'h-eg.
O Banain (.i. Nicolas) Airigh Maelain d'h-eg in bliadhain-si i Clainn in Chaeich h-Ui Raighilligh, .i. neach do bí ina bhicair i n-Daire Mhaelain & ina airchinnech ar trian in baile cetna.
Feradhach, mac Duinn Oig, mic Duinn Moir Meg Uidhir & Brian, mac Seaain, mic Domnaill
Ballaigh Meg Uidhir, do marbadh le clainn Chuinn h-Uí
{fol. A 114c}Gilla Crist, mac Eoin Fhinn Mic Caba, do marbadh ar greis oidchi ina thoigh fein le h-Aedh, mac Seaain Buidhi Meg Mathgamna, & crech an baile do denum do fos.
Da mac Donnchaidh Oig, mic Donnchaidh Moir, mic Aedha Meg Uidhir, .i. Sémus & Remunn, do marbadh le h-Eogan, mac Donnchaidh Mhoir, mic an Aedha cetna.
Slicht Duinn, mic Con Connacht Mheg Uidhir, do dhul ar ínnsoighidh ar baile Mic Gilla Ruaidh & an Gilla Dubh (.i. Mag Uidhir), mac Concobuir, mic Tomais Oig Meg Uidhir, do marbadh leo & Domnall Caech mac Gilla Ruaidh & a mac & Ruaidhri, mac Domnaill Ghirr (no, an t-Sracaidh) Mic Gilla Ruaidh & daine aili & a u., no a sé, d'eachaibh maithibh do breith leo doib.
Eoghan, mac Feradhaigh Bailbh, mic Feradhaigh, mic Duinn, mic Con Connacht Meg Uidhir, do marbadh le Goffraigh Mac Gilla Ruaidh.
Caislen do thinnsgnadh le Pilib mac Briain, mic Pilib Meg Uidhir, an bliadhain-si ar Carraig Locha an Tairbh ina duthaidh fein.
Gilla Padraig, mac Flaithbertaigh, mic Tomais Óig Meg Uidhir, do mharbhadh le Niall, mac Airt h-Ui Neill & lé n-a clainn & creacha mora do breith leo o chloind Fhlaithbertaigh in la-sin.
Brian Caech, mac Neill, mic Seaain Buidhe, mic Eogain h-Ui Neill, do marbadh le Domnall, mac Seaain Buidhi h-Uí Neill, & le muinntir Aedha an bliadhain-si, a n-dorus caislein Cinn Aird.
Fliuchaimsir do shir & doínenn dermair an bliadhain-si, o fheil na Croiche 'sa Foghmhur co h-eis fheile Padraig, innus gur' toirmisc moran do 'n tighedhus & co h-airighi an cruithnecht.
Tomas, mac Aédha, mic Briain, mic Pilib
Sluaghadh leis h-Ua n-Domnaill (.i. Aedh Ruadh) a Tir n-Eogain an bliadhain-si, gur ro loisc baile h-Uí Neill, .i. Dun Ghenaind & gur ro bris an Seanchaislen & gur ro loisc crannoc Locha Laeghuiri & a impodh imshlan do 'n turus-sin dia tigh.
Caislen clainni Seaain Buidhe h-Uí Neill, .i. caislen {fol. A 114d}Cinn Aird, do ghabail leisin Giustis, .i. le h-Iarla Chille {fol. B 99b} Dara, .i. le Geroid, mac Tomais Iarla & a thabairt ainnsein do Thoirrdelbach, mac Cuinn h-Ui Neill. Ocus an Toirrdelbach h-ísin do ghabail leis h-Ua Neill, .i. le Domnall h-Ua Neill, a caislen h-Ui Neill fein a cinn lethraithi iartain & a caeraidhecht do buain de & cogadh mór d'eirghi isin Coicidh de sin.
O Ferghail do marbadh an bliadhain-si, .i. Rughraidhe, mac Iriail h-Ui Ferghail, le Semus, mac Ruaidhri, mic Cathail, mic Uilliam h-Ui Ferghail (neoch do bi ina braghaid ag h-Ua Ferghail fein. Ar Inís Moir Locha Gobhna do-ronadh sin.)
O Brain Laighen, .i. Cathair, mac Duinluing h-Ui Brain, do marbadh an bliadhain-si le cuid da braithribh fein.
Sorcha, ingen Pilib, mac Tomais Meg Uidhir (.i. an Gilla Dubh), d'heg in bliadhain-si.
Baile na Gaillbe hoc anno ex maiore parte cremata est.
Goffraigh Óg, mac Goffraigh Ruaidh Meg Uidhir, d'h-eg in bliadhain-si.
An Barrach Mor do marbadh an bliadhain-si le n-a derbrathair fein, .i. le Dabhidh Barra, .i. airchideochain
An Sinnach Muinntiri Tadhgain, .i. Cairpri Sinnach, do marbadh an bliadhain-si le Conn, mac Airt, mic Cuinn h-Uí Mailechlainn.
Espuc Daire d'h-eg an bliadhain-si, .i. Domnall h-Ua Fallamhuin, Brathair Minur de Obseruancia, neoch do bi gu saethrach, adhmur ag senmóir ar fud Erenn re xxx. bliadhain roime-sin.
Maeilechlain Bradach, mac Taidhg, mic Mhaghnusa h-Ui Fhlannagain, do crochadh an bliadhain-si le Mag Uidhir, .i. le Seaan, mac Pilib Meg Uidhir, a Corgus na bliadhna. Ocus do adaimh an fear-sin (.i. Mailechlainn Bradach), leth amuigh do martaibh, no do mhucaibh, no do chaerchaibh, u. capaill x. ar fichit do ghoid o chill & o thuaith nar' tógbadh & nar' taibhdegh fair co h-aimsir a bhais, leth amuigh d'ar' togbadh & d'ar' taidhbedh guruigi sin air. Ataim ag tuitim m' o codhladh.
(Hoc anno, per duas noctes ante festum Natalis Domini, nata est Graniota, filia Boetani, scilicet, Thomae.)