Corpus of Electronic Texts Edition
Annals of Ulster otherwise Annala Senait, Annals of Senat (Author: [unknown])

Year U1499

U1499.0

{fol. A 113d} Kal. Ian. 3 f., l. xui., Anno Domini M. cccc. xc. ix.

U1499.1

Maidm mor an bliadhain-si leis h-Ua m-Briain ar Phiarus Ruadh Buitiller dú inar' marbadh Suifrin Cille-Cainnigh & moran do muinntir an Phiaruis-sin & inar' beanadh 6 xx. deg luírech dibh, ut dicunt quidam.

U1499.2

O Domnaill .i. Aedh Ruadh, do dul ar Galltacht an bliadhain-si a cinn fhir-ínaid righ Saxan, .i. Geroid, mac Tomais Iarla (& mac an Iarla do thabairt dho leis do dalta, .i. h-Anri).

U1499.3

Bean

p.440

Mheg Raith .i. Ruaidhri, .i. comarba Termuinn Da Bheoig, d'h-eg in bliadhain-si, .i. Graine, ingen in Priora h-Ui Fhlannagain.

U1499.4

Maghnus mac Goffraigh Oig, mic Goffraigh Ruaidh Meg Uidhir, do marbadh in bliadhain-si le Teallach Eathach.

U1499.5

Caisdel Bona Drobhaisi do ghabail in bliadhain-si le mac h-Ui Domnaill (.i. Aedha Ruaidh), .i. le Donnchadh na n-Ordóg, ar bardaibh h-Ui Domnaill fein & Aedh, mac h-Ui Domnaill, do shuidhe fa 'n caislen cetna & Pilib, mac Toirrdelbaigh Mheg Uidhir, do dul le Mág Uidhir i furtacht h-Ui Domnaill & a mic, .i. Aedha. Ocus Donnchadh na n-Ordog do thegmhail da cheile & Pilib, mac Toirrdelbaigh & iadh do bualadh a cheile & ech Donnchaidh na n-Ordog do marbadh & é féin do trascradh & a ghabail le Pilib ar an lathair-sin co senamail & a thoirbert d'O Domnaill. Ocus an caisdel do buain de in la cetna {fol. B 98d} & Donnchadh do thoirbeirt aris do Mhag Uidhir & a thabairt leis día tigh & tri fichit bó do mac Toirrdelbhaigh uadh h-Ua n-Domnaill & araile.

U1499.6

Mac Domnaill Cloinni Cheallaigh d'h-eg in bliadhain-si, .i. Cormac, mac Airt Mic Domnaill, fer daenachtach, deigheinigh & a adlucadh a Cluain Eois iar m-buaidh aithrighe.

U1499.7

Mac mic Phiarruis Buítiller d'h-eg in bliadhain-si, .i. Emonn, mac Semais, mic Piarruis Buitiller, sai cinn fheadhna & fer tigi aidhed gu coitchenn.

U1499.8

Bicair Cuile Maine d'h-eg an bliadhain-si, .i. Lochlainn Mac Gilla Chalma, .i. fer cleirchighi daenachtach subaltach.

U1499.9

Mac Gilla Fhindein (.i. Enri) do ghabail in bliadhain-si la Dartraighe Mheg Fhlannchaidh.

U1499.10

Brian mac Mheg Uidhir, .i. mac Seaain, mic Pilib Meg

p.442

Uidhir, do ghabail {fol. A 114a} le clainn Briain Mheg Uidhir a tus Shamhraidh na bliadhna-sa.

U1499.11

Sile, ingen an Espuic Meg Uidhir, .i. Ros Espuc, d'h-eg in bliadhain-si.

U1499.12

Donn, mac Conchobuir, mic Aedha Meg Uidhir, do marbadh le Feraibh Luirg in bliadhain-si, .i. le clainn Toirrdelbaigh h-Ui Mhaela Duin.

U1499.13

Cormac Dubh, mac Taidhg h-Ui Caiside, d'h-eg in bliadhain-si.

U1499.14

Maeilechlainn, mac Murchaidh, mic Taidhg Meg Raghnaill, do ghabail le Conn Carrach, mac Taidhg, mic Tighernain h-Ui Ruairc & le Seaan, mac Tighernain & a tabairt leo ar Inis Ochta ar Loch Mic Nén. Ocus Rughraidhe, mac Toirrdhelbaigh Meg Uidhir, d'innsoighidh an Locha orra & an da mac-sin h-Ui Ruairc do marbadh leis & mac an Caeich Mheg Fhlannchaidh & a mac-sin & mac Murchaidh do thabairt leis dia tigh. Ocus h-Ua Domnaill, .i. Aedh Ruadh, da fuaslucadh uadha & caislen Liath Droma do thabairt do h-Ua Domnaill arís o mac Murchaidh.

U1499.15

Gnim mor do denamh a n-Albain an bliadhain-si le righ Alban, .i. le Semus Sdibhard, .i. Eoin Mor Mac Domnaill, ri Innsi Gall & Eoin Cathanach, a mac & Ragnall Ruadh & Domnall Ballach do-riagadh a n-aen croich ina triur, mi re Lughnasadh.

U1499.16

Sluaighedh mor leis in Giustis in bliadhain-si, .i. le h-Iarla Cille Dara, .i. Geroid, mac Tomais, mic Sheoin Chaim, co h-Ath Luain tar Sinainn. Annsein ar fud Connacht, gur' gabh se ceithri caisteoil do 'n chur-sin, .i. caislen Beil Atha Liag & Ros Comain & Tuillsci & an Caislen Riabhach.

U1499.17

Mac Diarmada Muighi Luirg d'h-eg in bliadhain-si, .i. Tadhg, mac Ruaidhri Mic Diarmada & a derbrathair do oirdneadh ina ínadh, .i. Cormac, mac Ruaidhri

p.444

Mic Diarmata.

U1499.18

Mag Thighernain Teallaigh Dunchadha d'h-eg in bliadhain-si, .i. Seaan Mag Thighernain.

U1499.19

h-Ua Domnaill, .i. Aedh Ruadh, do dhul, sluagh, ar Mac n-Diarmada Og in bliadhain-si, .i. ar Cormac, mac Ruaidhri Mic Diarmata & gabail docum an Bealaigh Buidhe & Mac Diarmada do chothugadh an bealaigh-sin ris. Ocus dul assin co caislen Liath Troma & Mac Diarmada do thocht ina choínne and {fol. A 114b} & sidh do dhenum doib ri aroile. Ocus an Chathach, do bí re da bliadhain roime-sin a fegmhus h-Uí Domnaill & braighde aili do bí uadha a Muig Luirg, do thabairt do & Mac Diarmada do thabairt chisa cosanta d'h-Ua Domnaill ar Muigh Luirg o sin amach.

U1499.20

Creacha mora an bliadhain-si le Brian, mac h-Ui Neill (.i. Domnall), ar Mac Domnaill Clainni Ceallaigh, .i. ar Gilla Padraig.