{fol. B 97b} Kal. Ian. i.f., l. xx.iiii, Anno Domini M. cccc. xc. uii.
Maidm do thabairt ar h-Ua Ferghail, .i. ar Cetach, mac Thomais, mic Cathail, mic Thomais & ar a braithribh le Seaan Ruadh, mac Cairpri, mic Laisich, du inar' marbadh Cetach féin & a mac, .i. Laiseach & Domnall, mac in Espuic, .i. mac Seaain, mic Briain, tigherna Clainni h-Amlaim & mac Aedha Oig, .i. Geralt, tigherna Muighi Treagha & a derbrathair eile, .i. Geroid, mac Cormaic & Tadhg, mac Uaithne, mic Briain, mic Emaind, mic Tomais. Ocus ochtar & da fichat do marbadh ann uile ina timceall-sin. Ocus a tus an Earraigh do-ronadh, Dia h-aine do shunnradh.
Flann Mac Casurlaigh, .i. fear dana maith, do marbadh le Ferghus, mac Emainn, mic Laisich, mic Rosa.
Mac Diarmada Muighi Luirg, .i. Concobur, mac Cormaic, mic Tomaltaigh Mic Diarmata, do marbadh le cloind Ruaidhri Mic Diarmata & Mac Diarmata do denam do Thadhg, mac Ruaidhri Mic Diarmata, ina inadh.
Feidhlim, mac Muircertaigh Ruaidh, mic Briain Bhallaigh h-Ui Neill, do marbadh seachtmhuin {fol. A 111b} roim fheil Patraig, le Domnall, mac Aedha Oig, mic Aedha Buidhe, mic Briain Bhallaigh h-Ui Neill.
Eignechan, mac Neachtain, mic Toirrdhelbaigh
Mac Donnchaidh an Choraind d'h-eg i n-Errach na bliadhna-sa, .i. Brian, mac Mael Ruanaigh, mic Tomaltaigh Mic Donnchaidh.
Glaisne, mac Seaain h-Ui Anluain, do marbadh le clainn h-Ui Brain.
Da mac Meg Mhathgamna, .i. Eimhear & Tuathal, .i. da mac Aedha Oig, mic Aedha Ruaidh, mic Rughraidhe, do mharbadh le h-Oirrtheraibh & ceithri fir x. da muinntir do mharbadh ann maille riu & x. neamar, no da fher x., do Oirrthearaibh do marbadh leosan, timceall Maghnusa Riabaigh h-Ui Anluain & timcheall Maeilechlainn, mic Maghnusa Óig h-Ui Anluain. Ocus ansa sechtmad Id do 'n mhi Aipril do-ronadh sin.
Clann Shiurtain Moir Mic Shiurtain do mharbadh {fol. A 111c} a n-Earrach na bliadhna-so le Mac Siurtain a fell, .i. le Tomas & lena chloinn.
Murchadh, mac Conmhuic, mic Sheaain
Uaim Purgodoire Patraig ar Loch Ghearg do briseadh in bliadhain-si le Gairdian Duin na n-Gall & le lucht-inaid espuic a n-deg{fol. B 97c}antacht Locha h-Eirne, a h-udaras an Phapa, im fheil Padraig na bliadhna-sa, arna thuigsin do chach a coitcinne as sdair an Ridire & a seinlebraibh eile nachar' h-i soín an Purghadoir fuair Padraig o Dhia, ge do bhadur cach ag gnathugadh uaithi.
Sith do dhenamh do 'n dá h-Ua Neill a n-deredh Earraigh na bliadhna-sa, .i. Domnall & Enri Og & mac Domnaill h-Ui Neill do legan amach, .i. Aedh, gan fhuasluccadh & comadha mora aili d'eachaibh & d'eidedh & do medughadh gacha h-ínmhechuis archena do thabairt do Domnall do chinn anma tigherna do legan de.
O Domnaill, .i. Aedh Ruadh, mac Neill Gairbh, do chur a thigernuis de isin sechtmadh Kalainn do mhí Iuin na bliadhna-sa a Cárna Thermaind Meg Craith Dia h-aine ar aí laithi sechtmaine & h-Ua Domnaill do dhenam dia mac Día Mairt iar sin, .i. do Chunn.
Mag Mhathgamna
Mac mic Iarla Urmuman, .i. Sémus, mac Seoin, mic Shemuis Iarla, do mharbadh la Piarus Ruadh, mac Shemais, mic Emuinn, mic Risderd Buitiller, 16 Kalendas Augusti.
Abbadh Cluana h-Eois d'h-eg, .i. Domnall, mac an Espuic (.i. Rosa), mic Thómais Oig, mic Tomais Meg Uidhir, .i. la Sang Mairgrég in bliadhain-si.
Cathal, mac Toirrdelhaigh, mic Sheaain, mic Eogain h-Ui Raighilligh, d'h-eg do shaithi fhiluin im Lughnasadh.
Aedh Buidhe, mac h-Ui Ruairc, .i. mac Feidhlim, mic Donnchaidh, mic Tighernain Oig h-Ui Ruairc, do marbadh la clainn Taidhg, mic Cathail, mic Tighernain Ui Ruairc, roim Lughnasadh na bliadhna-sa.
Uater, mac Ricaird a Burc, do dula, cablach, do chongnom leis O n-Domnaill Ócc, .i. Conn, mac Aedha Ruaidh, a n-agaidh a derbrathar aili, .i. Aedha h-Ui Domnaill. Aedh do theagmhail do 'n chablach & urmhór a n-arm & a n-eidigh & a loín do buain dibh. Iar Lughnasadh do-ronadh in sin. Aedh féin do ghabail leis O n-Domnaill, .i. le Conn, la, no dha lá, iar sin & a chur da coimed a
h-Ua Domnaill, .i. Conn, do dhul, sluagh mór, ar Mac n-Diarmata Muighi Luirg, .i. Tadhg, mac Ruaidri Mic Diarmata. Maidm mor do thabairt ar O n-Domnaill innsin & moran braghad do buain do 'n t-shluagh & do h-Ua Domnaill a timcheall an dá Mac Shuibhne, .i. Mac Suibhne Fanat (.i. Ruaidhri), & Mac Suibhne Baghainech, .i. Eogan & timcheall Donnchaidh, mic h-Ui Domnaill, re raiter Donnchadh na n-Ordóg & da mac Tuathail h-Ui Ghallchobuir, .i. Eoin & Toirrdelbach & da mac Domnaill Mic Suibhne Fanat, .i. Eoin & Domnall Óg & da mac Mic Shuibhne Badhanaigh, .i. Níall & Eogan Ruadh & Geralt, mac Domnaill, mic Feidhlím h-Ui Dochartaigh & fisigi h-Ui Domnaill, .i. mac Eogain Ulltaigh. Ocus daíne ilímdha aili do ghabhail & do mharbadh ann. Nono Kalendas Octobris do-radagh an maidm-sin. Ocus ro beanadh {fol. A 112a} an Chathach Coluim Cille dib annsin & do marbadh a maér ar in maidm cetna. Ocus moran aile do Chonallchaibh do ghabail & do marbadh ann.
Slicht Aedha Ruaidh Mheg Mathgamna do dhul a Fern Mhuighi an bliadhain-si & slicht Remuind do dhul ar in Lucht Tighi doridhisi.
Conn, mac Cuind, mic Neill h-Ui Domnaill, d'ég re feil Brighde hoc anno.
Mainistir na m-Brathar Minur a Carraig Fherghusa do ghnothughadh o 'n Roim, ar furailemh Neill, mic Cuind, mic Aedha Buidhe, docum na m-Brathar Minur de Obseruancia
Gorta dofhulaing, dermair ar fud Erenn uile in bliadhain-si, da nach facadur lucht na h-aimsiri-si fein séd no samail; uair fa terc {fol. B 97d} cuil no cernn a n-Erinn uile nach dechaidh moran do dhainibh d'ég do 'n nuna sin. Ocus do ceannchaidedh a coitchinne annsa Midhe an peici cruithneachta ar chuig uingi & an galún leanna ar sé pinginibh & do cennchaithidh eter Ghaidhelaibh an beart cael coirci ar boin dára, no x. meadhair coirci ar in m-boin cetna & an mart ar mharg & an loilgech ar dá bha dara & ar sgilling, no ní is mó.
O Neill, .i. Enri Óg, mac Enri, mic Eogain, do dhul, sluagh mór, a Tir Conaill an bliadhain-si & millti móra do denum a Fanaid doibh ar tús & h-Ua Domnaill Óg, .i. Conn, mac Aedha Ruaidh, d'eirghi do 'n t-shluagh taréis Fhanaid d'fhagbail doibh, .i. ag Bel Atha Daire. Ocus maidm do thabairt ar O n-Domnaill annsin & h-é fein do marbadh ann & os cind ocht fichit do marbadh ann ímaille fris & a dhis derbrathar do ghabail ann, .i. Niall Garbh & Domnall & mac Mic Shuibhne & sé fir x. ímaille friu do ghabail ann. Is iat so imorro na daine uaisle do marbadh h-i fochair h-Ui Domnaill isin maidm h-isin: .i. Domnall, mac Maghnusa Ruaidh, mic Domnaill, mic Neill Gairb h-Ui Domnaill & Emann, mac Feidhlim Riabaigh, mic {fol. A 112b}Neill Gairbh h-Ui Domnaill & Brian,
Eilénóra, ingen Iarla Chille Dara, .i. ingen Tomais, mic Sheoin Chaim, an bean do bui ag h-Ua Neill, .i. ag Cunn, mac Enri, mic Eogain, d'eg in bliadhain-si, 14 Nouembris.
Brian, mac Con Uladh, mic Aedha, mic Eogain, mic Neill Óig h-Uí Neill, d'h-eg in bliadhain-si.
Gráinne ingen Cathail Óig, mic Cathail Óig aili Mic Maghnusa, d'h-eg: .i. ben Maghnusa, mic Goffraigh Óig Mic Goffraigh, a teirt Noin Nouember.
Maghnus, mac Tomais, Mheg Samradhain, do marbadh le slicht Eogain Meg Shamradhain 7 Idus Nouembris.
Aedh, mac h-Ui Domnaill, .i. mac Aedha Ruaidh, mic Neill Gairbh, mic Toirrdelbaigh in Fhina, do leigin as a laimdechus hoc anno, 7 Idus Nouembris & Uater, mac Ricaird a Burc, do thocht leis co Dun na n-Gall.
Muircertach, mac Aedha Óig, mic Aedha Buidhe h-Ui Neill, do marbadh
Domhnall, mac Aedha Óig, mic Aedha Buidhe, mic Briain Ballaigh h-Ui Neill & a derbrathair aile, .i. Eimhear, do marbadh an bliadhain-si a n-deoigh Shamna la Seaan Dubh, mac mic Domnaill Chail h-Ui Neill & lena cloinn & lena braithribh aircheana a m-Baile na Scrine.
{fol. A 112c}Maghnus, mac Mic Mhaghnusa Mheg Uidir, .i. mac Cathail Óig, mic Cathail Óig aili, d'h-eg in bliadhain-si.
Uilliam Og, mac Uilliam Mic Gilla Ruaidh, .i. sai fhir théd, d'eg in bliadhain-si.
Niall, mac h-Uí Neill, .i. mac Enri, mic Eogain h-Ui Neill, do eg ider da Notlaig do 'n galur bhric, in bliadhain cetna.
h-Ua Maeil Mhuaidh d'h-eg, .i. in Cosnamhaigh.