Kal. Ian. u. f., l.ii., Anno Domini M. cccc. xc. u.
Cormac, mac Taidhg, mic Cormaic Meg Carrthaigh, do mharbadh lena brathair fein, .i. le h-Eogan, mac Taidhg, mic Cormaic Meg Carrthaigh, a tus na bliadhna: .i. fundubair Mainisdrech Cille Creidhe.
Férghal, mac Seaain Mic Donnchaidh Thire Oilella, do marbadh ar greis.
Eoin Cluasach, mac Eoin Mic Alaxdrainn, .i. macam uasal do Clainn Domnaill na h-Alban, d'h-eg in bliadhain-si.
Mac an Ghirr, .i. Gilla Padraig, mac Gilla Padraig eile, mic Con Uladh Mic an Girr, d'eg in bliadhain-si.
{fol. A 108b}An Pearsun h-Ua h-Aedha, .i. Sar Padraig, d'h-eg an bliadhain-si.
Mag Samradhain, .i. Feidhlim, mac Tomais, mic
Mac Toirrdelbaigh Charraigh h-Ui Conchobair, .i. tigherna Sligigh & o Shliabh anuas, d'h-eg. Ocus da thigherna do dhenum a n-aghaidh a cheile, .i. do [lt ]Ruaidhri Og, mac Ruaidhri Ballaigh, leis h-Ua n-Domnaill & d'Fheidhlim, mac Magnusa, mic Briain.
Iarla Cille Dara, .i. Geroid, mac Tomais, do Geraltachaibh, do ghabail a m-Baile Atha Cliath leisan Giustis Saxanach, 3 Kalendas Marcii, Dia h-aine & a chur a luing, Diardain ar cinn, a n-Droiched Atha dia breith a Saxanaibh.
Ruaidhri, mac Meg Uidhir, .i. mac Tomais Oig, mic Tomais Moir (.i. an Gilla Dubh) Meg Uidhir, do marbadh an dechmhadh la do 'n mhi Marta na bliadhna-sa, Dia Mairt, le cloind Airt h-Ui Neill.
Uilliam Glas, mac Phoil h-Ui Caisidi, .i. liaigh maith, aitheasach do bi ag Pilib Mag Uidhir & ag a clainn, d'h-eg in bliadhain-si.
Mag Tighernain Ichtarach d'h-eg, .i. Gormgal, mac Briain Meg Thighernain.
Seaan, mac an Espuicc Mheg Uidhir, .i. mac Piarais, mic Muiris airchideochain, d'h-eg in bliadhain-si, ui. die mensis Maii, scilicet, in festo Iohannis ante Portam Latinam, .i. persan Daire Maelain & aircindech Clain Indsi & fer tighi aidheadh gu coitchenn.
Mag Bradaigh d'h-eg an bliadhain-si, .i. Feidhlim, mac Murchaidh Meg Bradaigh.
Cathal, mac Taidhg, mic an Chalbaigh
{fol. B 96b}Coirpri, mac Oedha, mic Eogain, mic Neill Oicc {fol. A 108c}h-Ui Neill, do eg in bliadhain-si, in Luan re m-Bealtaine.
Nicolas Dalatun, .i. mac Emaind, mic Piarais Dalatun, do mharbadh le Fergus, mac Emainn, mic Laighsig, mic Rosa h-Ui Fherghail & le slicht Hanri Dalatun.
Torrdealbhach, mac Seaain, mic Toirrdelbaigh, mic Seaain, mic Eoghain h-Ui Raghalligh & Aedh, mac Maeil Mordha, mic Seaain, mic Eogain h-Ui Raghalligh, do marbadh ar aen lathair an bliadhain-si, scilicet, 6 Kalendas Iunii, feria 4, le Coin Connacht, mac Maghnusa, mic Maeil Mordha an Mhullaigh. Ocus Cu Connacht fein do marbadh d'urchur do gha ar an lathair cetna-sin leisin Aedh cetna. Ocus an ga le' r' thuit Aedh fein, tríd ina crois ag tabairt an urchair-sin do. Ocus ar cunntabairt gu roibe a n-Erinn an tan-so comaesa an Toirrdelbaigh-sin dob' ferr do dhuine & do chenn-fhedhna inas é. Caislen Tulcha Moghain do ghabail leis h-Ua Raighilligh, .i. le Seaan, mac Cathail, mic Eogain h-Ui Raighilligh, a cinn caicidhisi a n-diaigh an marbtha-sin & slicht Mail Mordha in Mhullaigh do theacht gu n-a chaeraidhecht a cenn h-Ui Raighilligh deis an marbtha-sin.
Maghnus Mael, mac Remuinn Riabaigh, mic Duind, mic Con Connacht Meg Uidhir, do marbadh an bliadhain-si felonice le Pilib, mac Emuind Meg Uidhir & leisin n-Gilla m-Ballach, mac Con Chonnacht Mic Gaffraigh, 6 Kalendas Iulii.
Creacha mora a Samhradh na bliadhna-sa ar h-Ua Cathain, .i. ar Sheaan, mac Aibne, mic Diarmata h-Ui Cathain, le Mac Uibilin, .i. le Ualtar, mac Cormaic, mic Seinicin Mic Uibílin.
h-Ua Domnaill, .i. Aedh Ruadh, mac Neill Gairbh h-Ui Domnaill, do dhul co tech righ Alban an
Mac an Baird Tire Connaill, .i. Aedh Mac an Baird, d'h-eg in bliadhain-si.
Gilla Padraig, mac Remuind h-Ui Anluain, do marbadh an bliadhain-si le mac Meg Aengusa, .i. le Feidhlim, mac Aedha, mic Airt, mic Aedha Meg Aenghusa.
Geroid Mised, .i. Gallmacamh {fol. A 108d} maith do muinntir Alastraind, mic Tomais Pluinced, do marbadh an bliadhain-si & Emund, mac Aintríu, mic an Ghilla Guirm Díuid.
Mag Mathgamna & a clann & a braithre do denam imirce a ferann cloinne Remuind Meg Mhathgamna & a losgadh leo & nar' impo siad, no gu fuaradur braigdi o chloind Meg Mhathgamna.
Mac h-Ui Domnaill, .i. Conn, mac Aedha Ruaidh, mic Neill Gairbh, do shuidhe fa chaislen Sligigh in bliadhain-si ím trathaibh na Lughnasadh. h-Ua Domnaill do theacht cum a bhaile fein, .i. co Dun na n-Gall, o baile righ Alban, an Aine iar Lughnasadh & imtheacht Dia Sathairn dó a leanmuin a mic co Sligeach. Ocus nír mor gur' bhean sé fai annsa bhaile, an trath do h-innisidh do sluagh Ichtair Connacht do beth cum an bhaile — ar tarraing Briaín, mic Taidhg, mic Eogain h-Ui Conchobair — & an Calbach, mac Domnaill, mic Eogain h-Ui Conchobuir, do chur mic h-Ui Domnaill o 'n chaislen. Ocus nir' shailedur h-Ua Domnaill fein do beith ni budh ghoire doibh ina teach rig Alban. Ocus ni time, no teichedh do-rinne h-Ua Domnaill leisna sgelaibh-sin, acht do thogaibh leis a roibe dia muinntir fa 'n caislen, eter choir & each & do bhuail a n-aghaidh an t-sluaigh & do brisedh leis orra gu sona, senamhail. Ocus do marbadh ann Brian, mac Taidhg, mic Eogain h-Ui Concobuir
Mac Uilliam Clainni Ricaird, .i. Uilleag, mac Uilleag, mic Uilleag, do thecht, sluagh, ar tarraing an Chalbaigh Chaeich, mic Domnaill, mic Eogain, do chur h-Ui Domnaill o chaislen Sligigh & h-Ua Domnaill d'fhagbail an chaislein & Mac Uilliam do milliudh a fuair se do rainn h-Ui Domnaill a n-Ichtar Connacht & caislen clainni Aedha, mic Domnaill Caim Mic Donnchaidh, do loscadh leis & u. duine deg, eter fear & mhnaí, do mhuchadh ann le deataigh. Ocus macamh og sgiamach {fol. A 109a} dob' inghean d'Aedh, mac Domnaill Caim, do mhuchadh ann.
Mac Donnchaidh do dhenam do Thadhg, mac Domnaill Caim Mic Donnchaidh, in bliadhain-si.
h-Ua Neill, .i. Domnall, do dhenum creiche moire gu beogha, aithesach ar h-Ua Neill eile, .i. ar Enri & ochtar, no naenmhar, do marbadh ann, timcheall mic Eogain Boicht h-Ui Neill.
h-Ua Neill, .i. Enri & Mag Aengusa, .i. Aedh, mac Airt, mic Aedha Meg Aengusa & h-Ua h-Anluain .i. Maeilechlainn, mac Feidhlím h-Ui Anluain & mac Meg Mathgamna, .i. Gilla Padraig, mac Aedha Oig, mic Aedha Ruaidh Meg Matgamna,
Brian, mac Somairle Mic Caba, d'h-eg in bliadhain-si.
{fol. B 96c}Tighernan h-Ua Doibhelen d'h-eg in bliadhain-si.
h-Ua Breislen d'h-eg, .i. Eogan, mac Eogain, mic Pedrais, mic Saerdhalaigh, .i. breithim Meg Uidhir & oirchinnech ar trian Daire Mhaelain. A eg ím fheil Mícheil & h-Ua Breislen do denamh do Domnall, mac Conchubair, mic Uilliam, mic Airechtaigh, mic Shaerdhalaigh h-Ui Breislen.
Mac Gilla Ruaidh, .i. Brian, mac Domnaill, mic Maeil t-Shechlainn Mic Gilla Ruaidh, do marbadh le clainn Briain, mic Feidhlim h-Ui Raighilligh & le slicht Duind & Seaain Még Uidhir a n-Doire Laegh, ar tarraing clainni Emaind Mheg Uidhir, .i. Aedh & Gilla Isu.
An Cundais, .i. ingen Rolain, mic Sar Edbard Iustas, bean Iarla Chille Dara, d'h-eg im Shamain.
Gilla Espuic Bec, mac Mic Domnaill, do marbadh maille re fichid, no dhó, d'a muinntir le Mac Uibhilín, .i. le Ualtur, mac Cormaic, mic Seinícin Mic Uibhilin & le
h-Aengus, mac
{fol. A 109b}Ruaidhri Óg, mac Ruaidhri Ballaigh, mic Muircertaigh Baccaigh, mic Domnaill, mic Muircertaigh h-Ui Concobhair, do marbadh gairid roim Nodlaig — .i. an dara tigherna do bi ar Shligeach & o Shliabh anuas an tan-so — leisin tigherna eile do bi ann an trath-so, .i. Feidhlim, mac Maghnusa, mic Briain, mic Domnaill, mic Muircertaigh & lena braithribh eile. Ocus derbrathair Feidhlim do marbadh ann le Ruaidhri ar an lathair-sin, .i. Muircertach Caech, mac Maghnusa, mic Briain h-Ui Conchobair & Toirrdelbach, mac Ruaidhri, mic Briain & Seaan Óg, mac Seaain, mic Ruaidhri Ballaigh, ar an lathair cetna.
Toirrdelbach, mac Cuinn, mic Domnaill, mic Eogain h-Ui Neill, .i. Brathair Minur do choimtinol Airde Macha, do marbadh annsa Chabhan lena each féin do phreib.
An Giustis Saxanach d'fhagbail Erenn an bliadhain-si roim Nodlaig.
Da mac h-Ui Anluain, .i. Murchadh Ruadh & Gilla Padraig, .i. clann Fheidhlim h-Ui Anluain, do marbadh le clainn Aedha, mic Eogain h-Ui Neill & le clainn Cairpri, mic Aedha h-Ui Neill.
An Dalatunach, .i. Tomas, mac Emaind, mic Piarais, mic Piarais eile Dalatun, do gabail & h-Anri, mac Seaain, mic mic Piarais Dalatun, do marbadh im Shamhain le Conn, mac Airt, mic Cuind h-Ui Mhaeilechlainn & le Mael Ruanaigh, mac h-Ui Cerbaill.
Dá mac Shemais, mic Mic Balronta, do marbadh in bliadhain-si, .i. Seon & Remunn Riabhach — .i. Seon, le clainn Muiris Bailis & Remunn, le sgológaib — ar bord Atha Cliath.
Cian, mac Eogain, mic Tomaltaigh h-Ui Gadhra, d'h-eg co h-obann an bliadhain-si & firt filedh sin.