Kl. Ienair for Domnuch an bliadhain-si, l. xx.ix.. Ocus bliadhain Bisex h-í. Anno Domini M. cccc. xc. ii.
Cocadh adbalmor in bliadhain-si iter h-Ua Raighilligh Occ, .i. Seaan, mac Cathail, mic Eogain & Cathal, mac Toirrdhelbaigh, mic Seaain, mic Eogain h-Ui Raighilligh. Crecha mora lasin Cathal-sin for h-Ua n-Gabann (.i. Seffraidh) & O Gabann fesin dia lenmain & a eg suil do impo.
Ossadh iter O Neill (.i. Conn) & O n-Domnaill (.i. Aedh Ruadh) co Beltaine.
Tomas, mac Seaain, mic Toirrdelbaigh h-Ui Raighilligh, d'h-eg in bliadhain-si, xii. anno sue etatis.
Barun Slaine, .i. tigerna mor do Plemannachaibh, d'h-eg an bliadhain-si (20 die mensis Marcii) do 'n plaidh allais neoch tanic co nua i nd-Erinn in tan-sin, .i. Semus Plemend.
Cuid do craind na Croiche Naim d'faghail isin Roim adlaicthi a talmain in bliadhain-si: .i. in clar boi os cind Crist ina m-bai scriphtha a n-aimsir na Paisi: IHESUS NAZARENUS, REX IUDEORUM. Ocus arna faghail scriphtha isin inadh cetnai gur' b' í Elena, mathair Constantin Impir, do fagaib a folach annsin in clar-sin.
Conn, mac Airt, mic Cuinn h-Ui Concobuir, do marbadh la muinntir Iarla Cilli Dara ar son urchair cuailli tuc se ar sugradh ar in Iarla.
Cend inna sleighi le' r' loit Longinus taebh Crist do
{fol. A 105c}Hoiberd, mac Mail Ruanaigh, mic Conchobair, mic Cathail Ruaidh Meg Raghnaill, do mharbadh in bliadhain-si, in 14 la deg do mhí Mharta, h-i Cill Srianain h-i Muinntir Eolais, le h-Eogan, mac Tigernain, mic Taidhg, mic Tighernain Moir h-Ui Ruairc. Ocus do loiscedh tempoll an baile cetna an la-sin, .i. Cille Srianain & do loiscedh sé duine dheg ann, itir fhiru & mhna, leisin Eogan cetna-sin & moran maithesa eile.
Crecha mora an bliadhain-si le Cathal, mac Toirrdelbaigh h-Ui Raighilligh & le clainn Meg Mathgamna (.i. Remuun), .i. Glaisne & Brian & le Gilla Padraig, mac Aedha Oig Meg Mhathgamna, ar tharraing Cathail h-Ui Raighilligh, ar h-Ua Raighilligh, .i. ar Sheaan, mac Cathail, mic Eogain h-Ui Raighilligh & ar a braithribh archeana, a n-deredh an t-Samhradh.
Domhnall, mac an Pearsuin Ui Fiaich, d'h-eg an bliadhain-si.
Seaan Buidhe, mac Eogain Meg Mathgamna (.i. mac Eogain, mic Rugraide, mic Ardgail), .i. tigherna Dhartraighi, d'h-eg in bliadhain-si, im fheil Tighernaigh.
Domnall, mac h-Ui Neill, .i. mac Enri,
Conn, mac h-Ui Domnaill, do gabail leis h-Ua n-Domnaill fein in bliadhain-si.
Cormac, mac Diarmada Mic Diarmada & a mac do marbadh le clainn Ruaidhri Mic Diarmada & Brian, mac Concobair, mic Ruaidhri, do shin lamh dho & do dhithcenn h-e.
Gilla Patraig Mac Cathmail do lígen as a laimdechus & Mac Cathmail do dhenum dhe a n-inad a brathar.
Brian, mac mic Emuind Mic Domnaill & a mac do marbadh le clainn Meg Mathgamna & le clainn Sheaain Buidhe Mheg Mhathgamna in bliadhain-si.
Mac Cairpri h-Ui Neill, .i. Seaan, do mharbadh le clainn h-Ui Anluain & le clainn Remuind h-Ui Anluain annsa Sradbaile, 12 Kalendas Iulii an bliadhain-si.
Ascalt mor a n-Erinn in bliadhain-si.
Samhradh tirim an bliadhain-si; .i. bliadhain ar fichit o 'n t-Samradh the roime.
Feidlim, mac Toirrdhelbhaigh, mic Aedha h-Ui Neill, do marbadh a Samhrad na bliadhna-sa le h-Enri, mac Briain (.i. Brian na Coille), mic Eogain h-Ui Neill.
Cormac, mac Aedha, mic Pilib Meg Uidhir, d'h-eg in bliadhain-si im Lughnasadh.
Colla, mac Donnchaidh mic Domnaill, do marbadh ina thigh fein do chaeir teinedh & an teach do loscadh & triur, no cethrar, aile do leathmarbadh ann do 'n caeir cetna.
Goffraigh h-Ua Cathain do marbadh an bliadhain-si le Ualtar Mac Uibilin, ar tarraing Tomais h-Ui Chathain. Ocus Seoan Gallda, a derbrathair aile, do marbadh ann fos: .i. da mac h-Ui
Caiterfhina, ingen Toirrdhealbaigh Meg Uidhir, d'h-eg in bliadhain-si.
Mac Gilla Fhinnein d'h-eg in bliadhain-si, .i. Toirrdelbach, mac Briain, mic Enri Crossaig. Ocus a eg im Chaisc na bliadhna-sa.
{fol. A 106a}Feidhlimidh Ruadh, mac Donnchaidh Mic Gilla Finnein, d'h-eg a Foghmhar na bliadhna-sa.
Comarba Termaind Da Beooig (.i. Mag Raith), .i. Diarmait, mac Marcais, mic Mhuiris, mhic Nícoil, mic Anrias Meg Raith, d'h-eg a n-dereadh Fhoghmhair na bliadhna-sa.
Aengus Mac an Ulltaigh, .i. Brathair Minur de Obseruancia & seanmontaighe maith, clumhar, in Aptumno obiit.
Pilib, mac Uilliam, mic an Esbuig Meg Uidhir, do marbadh an bliadhain-si le mac h-Ui Cathalain a m-baile Risderd, mic an Ridere Bheille.
Iarla Cille Dara do chur na Iustisechta de an bliadhain-si & do chur barantais Ghall na Midhe dhe, ar son nach fuair se uatha chur leis a n-adhaigh mic Iarla Urmuman. Ocus uilc mora do thecht do Ghallaibh dhe sin: .i. Gaeidhil da creachadh & da loscadh gu coitcend ar gach aird ina timchell.
An t-Oifficel h-Ua Duibhidhír, .i. Aedh, d'h-eg an bliadhain-si.
Toirrdelbach Ballach, mac h-Ui Chonchobair Fhailghe, .i. mac Cuinn, mic an Chalbaigh, d'h-eg an bliadhain-si, do ghalur tri n-oidche, a tus an Geimhridh.
Mac Con Mara, .i. Cu Medha, mac Seaain Mic Con Mara, d'h-eg an bliadhain-si roim Nodluig.
An Calbach, mac h-Ui Conchobair Fhailghi, .i. mac
Cathair, mic Cuind, mic an Chalbaigh, do mharbadh le cuid do mhuinntir mic Iarla Urmuman, .i. Shemuis, mic Sheaain, mic Shemais Buitiller, .i. le Maighistir
Clann Donnchaidh Meg Uidhir, .i. an Gilla Dubh & {fol. A 106b} Pilib & mac an Gilla Duibh, .i. Emonn, do dhul ar innsoighidh ar Seanadh Mic Magnusa & creach do denam doibh and & dias sgolog nemhurchoidech do mharbadh leo. Sed ipsi comprehensi sunt in superbia sua et Dominus uisitauit iniquitatem eorum. Et uersi sunt in fugam, ac xiiii. de electis ipsorum submersi sunt quasi plumbum in aquis, et descenderunt sicut lapis in profundum. Et, quia Dominus non erat cum eis, cum insurrexerunt homines in ipsos, sine dubio aqua absorbuit eos, ut ait Psalmista. Quia misit Dominus iram suam, quae deuorauit eos. Ocus do gabadh ann Emonn, mac an Gilla Duibh & dias da muinntir & do beanadh an chreach dhibh. Ocus a n-deired na bliadhna-sa do-ronadh so, .i. an Sathairn roim Nodlaig.
(Hoc anno natus est Carolus Iuuenis,
[...]
filius Betani, scilicet, Thome, in festo, scilicet, la feil, Beraid.)