Kal. Ian. for Satharnn, l. xuiii., Anno Domini M. cccc. xc. i.
Eogan, mac Muircertaigh, mic Eogain, mic
Seaan, mac Ruaidhri Caich Meg Uidhir, do h-eg gar iar Notlaic.
h-Ua Cathain, .i. Seaan, mac Aibhne, mic Diarmata h-Ui Cathain, do legen as a laimdecus an bliadhain-si {fol. A 104d} & a coeraigecht do bein do clainn Magnusa h-Ui Cathain lais suil do fitir nech da thír fein a legen.
Muircertach, mac Airt, mic Eogain h-Ui Neill, d'h-eg in bliadhain-si i n-deredh ind Erraich.
Feidhlimidh, mac Oeda, mic Eogain Uí Neill, do marbadh la Brian, mac Remainn, mic Rughruidhe Meg Mathgamna, tareisi feli Brenainn. Ocus mac aile Aeda, .i. Art h-Ua Neill, do denam creichi a Teallach n-Geluccain ind oidhchi cetna ina dighail. Ocus do loiscedh & do marbadh daine ann beos.
Brian, mac Meg Raghnaill, .i. mac Taidhg, mic Cathail Meg Raghnaill, do marbadh a fill la Tadhg, mac Concobuir Meg Raghnaill & la dha mac Mailechlainn Meg Raghnaill & caistel clainni Taidhg Meg Raghnaill (.i. caistel Liath Droma) do buain dibh for in lathair-sin do 'n muinntir cetna.
Sile, ingen Toirrdhelbaigh Ui Raghalligh, ben Glaisne, mic Remainn Meg Mathgamna, d'h-eg roim feil Cros.
{fol. B 94c}Cathal, mac Mailechlainn, mic Cathail Meg Raghnaill, do marbadh 'sa caistel cetna (.i. caistel Liath Droma), .i. le mac ele Taidhg Meg Raghnaill & le mac Mic Diarmata Ruaidh & le Tomaltach, mac Tomaltaigh Mic Diarmata. Ocus an castel fesin do airitin doib a Faghmur na bliadhna-sa &
Aodh, mac Iriail h-Ui Ferghail, do riaghadh l' a dis derbhbrathar fesin, .i. Rughraidhe, & Gilla na Naem, isind Errach.
Cocadh anbhail eter h-Ua Neill, .i. Conn, mac Enri & h-Ua n-Domnaill, .i. Aedh Ruadh, mac Neill Gairbh & a n-dul aroen a {fol. A 105a} Foghmur na bliadhna-sa do luaghaill a n-aghaidh a cheile co teach Iarla Cille Dara — neoch do bi i n-a Iustis a n-Erinn an tan-so — & a techt as gan sith, gan ossadh ar a roib greim.
Brian, mac Aedha Gallda, mic Neill h-Ui Domnaill, do marbadh ar in cogadh-sin le h-Enri, mac Enri h-Ui Neill. Ocus do coimed an fer cetna-sin, .i. Enri, an tir co maith an fad do bi h-Ua Neill a tigh Ghall.
Eachmhiledh, mac Mheg Aenghusa, .i. mac Aedha, mic Airt Mheg Aenghusa, do marbadh ina thigh fein ar greis oidhche, da la & sechtmuin re Samain, le cloinn Mailechloinn, mic Muircertaigh, mic Eogain h-Ui Neill.
Fliuch dhoínenn mor a Samradh na bliadhna-sa uile d'urmhor & a leitheid cetna i Foghmur na bliadhna cetna, co nach frith inntshamail do med na doíninn-si o dho fer an dile for an doman, innus gur' mheath arbur Erenn uile, achtmad bec & co h-airidhi a Feraib Manach.
Bean an Dalatunaigh, .i. bean Tomais, mic Emuinn, mic mic Piarais Dalatun, d'imthecht le mac h-Ui Mheachair an bliadhain-si.
h-Ua Raighilligh d'h-eg an bliadhain-si, .i. Seaan, mac Toirrdhealbaigh, mic Seaain h-Ui Raighilligh, .i. macamh óg oirrderc, a tús a ratha & a adhlucadh a Mainistir an Cabhain 25 die mensis Nouembris, .i. la fheili Caitrechfhina.
Cathal, mac Toirdelbaigh h-Ui Raghalligh, do tarraing Iarla Cilli Dara ar O Raghalligh n-Óc-sin & ar a braithribh & digbail arband & spreidhe do deuam lesin sluagh n-Gall do 'n tir. Ocus mac Mic Balronta do gabail la cloinn Cathail um an t-sluagh n-Gall & dias marcach aile do bádhadh impa & mac Emainn, mic Tomais, mic Feidhlim h-Ui Raighilligh, do marbadh lesin sluagh, .i. [gap: erasure/extent: half-line]
Crecha mora an bliadhain-si le Semus, mac Tomais Iarla, ar cloinn n-Glasne, mic Concobuir h-Ui Raighilligh.
Goeth adbalmor an bliadhain-si ar lo co n-oidchi na feili a n-diaidh Nodlaic.
Comorba & cend fine do denamh in bliadhain-si, gar bec ria Nodlaic, do Ruaidri, mac Diarmada, mic Marcais Meg Raith.
Aedh & Ruaidhri, da mac Domnaill, mic Oedha Oic, mic Aedha, mic Raghnaill, mic Donnchaidh Alainn Mec Craith, d'h-eg in bliadhain-si.
Maurchadh, mac Eogain Mec Craith, d'h-eg.
Hanri, mac Hoberd, mic Semuis Dilmain, do marbadh a athar feisin, .i. Hoiberd, do erchur do scin & se fein do ascnam docum {fol. A 105b} na Romha ina dhiaidh-sin.
{fol. B 94d}Tadhg h-Ua Siriden do h-eg fa feil ina Croche 'san Fogmur, .i. cerd dob' ferr i l-Leith Cuind in tan-sin.
Moilechlainn, mac Uilliam, mic Aedha, mic Briain h-Ui Cellaigh, do airitin a fell la Tadhg, mac n-Donnchaidh h-Ui Cellaigh, .i. prioir Tighi Eoin & se arna breith cuigi ar fuirecc fleide. Ocus a dias derbcomaltadh do gabhail fariss, .i. da mac Taidhg Caich h-Ui Maindín, .i. Aedh & Seaaan & a tairbert dia marbadh do slicht