Kal. Ian. 6a feria, l. uii., Anno Domini 1490.
Concobur Ruadh, mac Gilla Padraicc, mic Emainn Meg Uidhir, do abailt oidhchi feli Brigti.
Caiterfhina, ingen
Remann, mac Seon, mic ind Iarla, d'h-eg i tus na bliadhna-sa.
{fol. A 104a}Bicair Leth Ratha, .i. Matha Mag Conaing & an cananach Mag Tighernain do sheanadh Dromma Lethan & Oed, mac ind Epscoip Meg Bradaigh, .i. Brathair Minur occ, d'h-eg a cinn 7 la d'Errach a tríur.
h-Ua Caiside Cule, .i. ollamh legha Fer Manach, d'h-eg — .i. Condla, mac Cormaic, mic Ruaidhri, mic Taidhg Moir, mic Gilla na n-Aingel — an 14 la d'Errach na bliadhna-sa.
Eogan Carrach, mac Concobuir Mic Maghnusa, d'eg.
An Dilmuinech, .i. Emann, mac Tomais, mic Risderd, a ecc atbath um feil Micheoil.
Toirrdelbach, mac Toirrdelbaigh Ui Buighill, do marbadh la h-escur oc coimling for imuire Murbaigh Cedaine Luaithredh na bliadhna-sa: .i. tanusti Muinntire Buighill.
Catilin, ingen Briain, mic Concobuir Óig Meg Uidhir, ben Tomais, mic Concobuir Mic Maghnusa, d'h-eg 12 Kalendas Aprilis.
h-Ua Concobuir Connacht do abailt ind Errach na bliadhna-sa: .i. Fedhlim Find, mac Taidhg, mic Toirrdelbaigh Ruaidh, mic Aeda, mic Feidhlimthe, mic Oedha, mic Eogain h-Ui Concobuir.
Fergus, mac Eoin, mic Matha, .i. in Maighistir Mor, mac Concobuir, .i. an t-airchidechain, h-Ua h-Eogain — .i.
Ruaidhri, mac Philip, mic Con Connacht Meg Uidhir, do marbadh la Beltaine la cloind Briain, mic Concubuir Oicc Meg Uidhir & la slicht Concubuir airchena.
Margreg, ingen t-Semais, mic Mic Balront, .i. bean Tomais, mic Glaisne Ui Raghalligh, do marbadh, quarto Nonas Maii le mac Tomais fesin: .i. ben bui ina legnidh i l-Ladin & i m-Berla & i n-Goidhilc.
{fol. A 104b}h-Ua Cathain, .i. Seaan, mac Aibhne, mic Diarmata h-Ui Cathain, do airitin la luing tainic a h-Alpain, no a h-Inber Air, a m-mi Iúin isin bliadhain-si.
Oed, mac Moil Mhorda, mic Seain h-Ui Raghalligh, do gabail la clainn Glaisnne, mic Concobuir h-Ui Raghalligh, iar n-orcain baile Tomais, mic Glaisni leis.
Semus Occ Sabhais do marbadh in bliadhain-si la clainn in t-Senescail t-Sa{fol. B 94b}bais a fhiull.
Castel Edain Daubchairrgi, .i. castel Neill, mic Cuinn, mic Oeda Buidhe, do ghabhail & do brisedh la Fedhlim, mac mic h-Ui Neill Buidhe (i n-Noin Mai).
Felimidh, mac Rughruidhe, mic Seinicin Mic Uibhilin, do marbadh i nd-Oentrumha la clainn Briain, mic Oeda Buidhe.
Colla, mac Rughruidhe, mic Ardgail Meg Mathgamna, do marbadh la slicht Con Uladh, mic Neill Moir Uí Neill, in t-oenmad Kalainn dheg do 'n mí Iuin & in Satharnn ar ai laithi sechtmuine.
Edbhard, mac Nicolais, mic Cristoir Pluingced, do gabail & do creachadh i n-Noin Iuin la clainn Cathail, mic Eogain, mic Seaain Ui Raghalligh.
Tadhg, mac Toirdelbaigh, mic Filip Meg Uidhir, do scathadh l' a bhraithribh fesin in bliadhain-si, a prid Id Iuin.
Crecha mora in bliadhain-si la Fedhlim, mac
Clann Donnchaidh, mic Oedha Meg Uidhir, do orcuin an bliadhain-si gar ria Nodlaig la mac Ui Domnaill, .i. la h-Oedh n-Occ, mac Oedha Ruaidh, mic Neill Gairb. Ocus an creach do breith lais docum Atha Senaigh {fol. A 104c} & a marbadh ann doraith, .i. cccc. bo. Ocus bardo an casteoil, .i. clann Oedho Gallda Ui Domnaill ar tabairt in casteoil d'Aedh d'aimdheoin Ui Domnaill (.i. Aedh Ruadh).
h-Ua Dalaigh Brefne (.i. Seaan, mac Uilliam, mic Aedha) do ebhailt, sai h-i m-bairdne, caicthiges ria Samain in t-sainreth.
Ben h-Ui Ruairc, .i. Mor, ingen Eogain h-Ui Neill, do marbadh a fill do cethernach da muinntir fesin, .i. mac Cathail Ui Ardlamaigh & se fein do loscadh iarum.
h-Ua Neill & h-Ua Domnaill a n-dib scoraib for enech araile o Shamhfhuin co Nodlaig: .i. h-Ua Neill isin Cairrcín & h-Ua Domnaill a n-Druim Bo & cin sith, cin osadh, cin cogadh do denam doib, acht mur sin.
h-Ua Gairmleghaidh do h-eg in bliadhain-si: .i. Muircertach, mac Enri, mic Concobuir h-Ui Gairmleghaidh, tareisi Samhna.
Mac Mic Domnaill na h-Alpan (.i. Aengus), .i. nech d'á n-gairthi an Tigerna Aacc, do marbadh a fill le fer-ted Erendach, .i. Diarmait h-Ua Cairpri. Ocus a n-Inber Nis do marbadh h-e.