Corpus of Electronic Texts Edition
Annals of Ulster otherwise Annala Senait, Annals of Senat (Author: [unknown])

Year U1487

U1487.0

Kal. Ian. for Luan, l. 84, Anno Domini 1487.

U1487.1

Mac Aedhagain na h-Anghaile, .i. Tadhg mac Gilla na Naem Mic Aedhagain, do marbadh le clainn Uaithne, mic Iriail h-Ui Ferghail, .i. le Tadhg, mac Uaithne & araile.

U1487.2

Ruaidhri Glas & Donn Og, da mac Dúinn, mic Pilib na Tuaidhe Meg Uidhir, d'h-eg in bliadhain-si a n-diaidh Nodlaig.

U1487.3

Tadhg Dubh, mac Fínghin mic Gilla Padraig, tanusti Osraighi, d'h-eg.

U1487.4

Niall, mac Seaain Buidhe, mic Eogain h-Ui Neill, do ghabail le Niall, mac Toirrdelbaigh Ruaidh, mic Enri, mic Eogain h-Ui Neill, arna fhaghbhail ag fagbhail baile h-Ui Neill, .i. Cuinn, mic Enri h-Ui Neill, i cenn mis d'Erruch.

U1487.5

Gaeth mór in bliadhain-si, 6 Kalendas Marcii, ler' nochtadh tighi & templa imdha & ler' briseadh croinn & coitidha & garrghadha & araile.

U1487.6

{fol. B 92b}Brian Ruadh h-Ua Ruairc, .i. mac Tighernain, mic Taidhg, mic Tighernain h-Ui Ruairc—.i. cenn-fedhna is ceinnsealaighi do bí a n-Ichtar Connacht in tan-{fol. A 100d}sin — do ghoin le soighid, 6 Idus Marcii & a eg di. Ocus le h-Eogan, mac h-Ui Ruairc, .i. mac Feidhlim, mic Donnchaidh, mic Tighernain Oig, do-righnedh in marbadh-sin. h-Ua Domnaill, .i. Aedh Ruadh, do dhul trid an marbadh-sin um chaislen h-Ui Ruairc (.i. Feidhlim) & a gabail do & triur do muinntir h-Ui Ruairc do marbadh ann, ím Brian, mac Cathail, mic Tighernain h-Ui Ruairc, neoch do marbadh


p.314

le Goffraigh, mac Aedha Gallda h-Ui Domnaill, d'urchur do ghunna. Ocus in caisdel cedna do brisedh gairid beag iarsin.

U1487.7

Sgainner eter clainn Meg Uidhir, .i. clann Emuinn, mic Tomais Óig Meg Uidhir — .i. Aedh & Art & Brian — & clainn Tomais Óig Meg Uidhir, .i. Tomas & Conchobur. Ocus Fearadhach, mac Emuind Oig, mic Emuind Mheg Uidhir, do marbadh ann & Aedh, mac Duinn, mic Emuind & moirsheiser eile ina timceall do marbadh and & coicer, no seiser, eile da muinntir do ghabail ann.

U1487.8

Aillbhe, ingen in Gilla Duibh Meg Uidhir (.i. Mag Uidhir), .i. bean Concobuir Mic Maghnusa, mortua est. (Ocus Conchubar Mac Maghnusa fein d'h-eg hoc anno.)

U1487.9

Creacha mora in bliadhain-si leis h-Ua Cathain, .i. le Seaan, mac Aibhne h-Ui Cathain, isin Choill Ichtaraigh & dis, no triur, ar xx.id do dainib do marbadh ann leis. Ocus Brian Carrach, mac Aedha, mic Briain Meg Uidhir, do marbadh ann do 'n turus-sin.

U1487.10

h-Ua Ruairc, .i. Feidhlím, mac Donnchaidh, mic Tighernain Oig h-Ui Ruairc, d'ínnarbadh asa dhuthaidh leis h-Ua n-Domnaill, .i. le h-Aedh Ruadh, mac Neill Gairbh & a chur a Fearaibh Manach in bliadhain-si.

U1487.11

Cathal Dubh, mac Domnaill, mic Eogain h-Ui Conchobuir, do marbadh in bliadhain-si le Gaileangachaibh & é féin & clann Toirrdelbaigh Carraigh h-Ui Concobuir ar n-dul ar creich orra.

U1487.12

Coblach mor do Shaxanachaibh do thecht a n-Erinn an bliadhain-si d'ínnsoighidh mic Diuíci Odhearc5 do bí ar innarbadh in tan-sin a cenn Iarla Cille Dara, .i. Geroid, mac Tomais Iarla. Ocus nar' mhair ar slicht na fola righ in trath-sin


p.316

acht in mac-sin in Díuíce & rígh do gairm dhe Domnach in Spiruta Naeim, a m-Baile Atha Cliath an tan-sin. Ocus a ímtecht soir leisin cobhlach & moran do Erenncaibh do dhul leis soir, im derbrathair Iarla Cille Dara, .i. im Tomas, mac in Iarla & im Edbhard Pluingced, .i. Edbard Óg.

U1487.13

Creacha mora do dhenum do Choin Uladh, mic Aedha h-Ui Neill, & da braithribh & do clainn Remuinn Meg Mathgamna an bliadhain-si ar h-Ua n-Anluain, .i. ar Emunn Ruadh h-Ua h-Anluain.

U1487.14

{fol. A 101a}Doínenn mor fherthana i Samhradh na bliadhna-sa, amail gheimhredh n-doíneannta, innus gur' meathadh moran d'arbhannaibh Erenn le.

U1487.15

Tighernan Dubh, mac Donnchaidh, mic Tighernain Oig h-Ui Ruairc, do marbadh leis h-Ua n-Domnaill, .i. le h-Aedh Ruadh, in bliadhain-si.

U1487.16

Tighernan Carrach, mac Tighernain, mic Taidhg, mic Tighernain h-Ui Ruairc, do marbadh a Muinntir Eoluis le clainn Ruaidhri Mic Diarmada & le mac Mic Diarmada Ruaidh. Ocus Feradhach, mac Sean Toirrdelbaigh Meg Uidhir, do marbadh ann & Domnall, mac Duinn, mic Domnaill, mic Airt Meg Uidhir, do marbadh ann in la cedna & Domhnall Bernach Mag Samradhain do ghabail ann fos & araile.

U1487.17

h-Ua Ruairc, .i. Feidhlim, do dhul ina thir fein & sith do dhenum do ris h-Ua n-Domnaill, .i. le h-Aedh Ruadh.

U1487.18

Pilib Bocht, mac Cuinn Crosaigh h-Ui Uiginn, d'h-eg in bliadhain-si: .i. Brathair Minur {fol. B 93a} de Obseruancia, nech is mó & is ferr duanaire diadhachta 'san aimsir deigheanaigh.

U1487.19

h-Ua Raighilligh, .i. Toirrdelbach, mac Seaain, mic Eogain h-Ui Raighilligh, do eg do bidhg ina chaislen féin i Tulaigh Moghain (no Mongain), in cet la do mhi Seiptimbir na bliadhna-sa. Ocus O Raighilligh do dhenamh da mac ina ínadh, .i. do Sheaan h-Ua Raighilligh, in


p.318

treas la deg do 'n mhí cetna-sin.

U1487.20

Brian, mac Briain Ballaigh, mic Aedha, mic Fheidhlimthe h-Ui Conchobuir, do eg isin Earruch in bliadhain-si.

U1487.21

Bicair Clain Ínnsi, .i. Brian, mac mic in Espuic h-Ui Corcrain, d'h-eg in bliadhain-si.

U1487.22

Tomas Mag Uidhir, .i. mac Tomais Oig, mic Tomais eile (.i. in Gilla Dubh), do ghabail a n-Achadh Beithi le Mag Uidhir Óg, .i. la Seaan mac Pilib, mic Tomais Meg Uidhir & ochtar d'a muinntir do ghabail maille ris ann & ocht n-eich do buain dibh — & isin naemadh Kalainn do mhí Octimber do-ronadh sin — & loscadh doimhliag Achaidh Beithi do neamthoil Meg Uidhir an la-sin.

U1487.23

Emun, mac Cathail Oig Mic Maghnusa, do bathudh a purt Tamnaighi Riada & a adhlucadh i Mainistir Leasa Gabhail 8 Kalendas Augusti.

U1487.24

Cath do thabairt eter in dá righ do bi i Saxanaibh in tan-sa .i. an ri do bí do Breatnaibh ann & in macamh óg a dubrumar romaínn, d'ar' goiredh a m-Baile Atha Cliath — & in cath do chur ar in macamh óg-sin. Ocus nach rainig a suim, no a comairemh ca do marbadh do mhíltibh annsin. Ocus urmhor a n-deachaidh do Erennchaibh soir, do marbadh ann, im Tomas, mac Iarla Cille Dara {fol. A 101b} & im moran do Gallmacamhaibh uaisle ailibh. Ocus a timcheall na féili Cros tucadh in cath-sin & araile.

U1487.25

h-Ua Maeil Conaire, .i. Sigraidh, mac Seaain Ruaidh h-Ui Mail Conaire, d'h-eg, .i. ollam h-Ui Concobuir Connacht re senchus.

U1487.26

h-Ua Domnaill, .i. Aedh Ruadh, do dhul, sluagh, i Muigh Luirg & tighi & arbanna do loscadh leis ann. Ocus cuid do Muigh Luirg fein, .i. Ruaidhri an Daire, mac Muirghisa, mic Aedha Mic Diarmada, do sharughudh na ceall Braighi Uallaighi &


p.320

edala mora do breith eisti & h-Ua Domnaill do aisig na n-edala do shagartaibh an teampaill ro sharaighedh ann.

h-Ua Domnaill cetna do dul i Muigh Luírg fecht aile i Foghmur na bliadhna-sa & tighi ímdha & arbanna do loscadh leis & teampoll Droma Conaille do loscadh ann le Ferghal Carrach, mac Domnaill, mic Taidhg h-Ui Ruairc. Ocus, mur nach rug h-Ua Domnaill ar Ferghal Carrach fein da thoirbert isin n-gnim-sin, mac Mic Tighernain na Buannaide do thoirbirt do cleirchibh an teampaill ar son in loiscthi-sin & araile.

U1487.27

Mac Uilliam Clainni Ricaird, .i. Uilleag, mac Uilleg, do dhul, sluagh, ar tarraing h-Ui Concobuir Duinn (.i. Aedh, mac Aedha, mic Toirrdelbaigh Duinn), isna Cluaintibh ar Feidlimidh Fhind, mac Taidhg, mic Toirrdelbaigh Ruaidh. Ocus baile Feidhlimidh Fhind do loscadh leo & a mac do marbadh, .i. Ros, mac Feidhlim Fhind & an tir uile do loscadh leo & do loisgedur & do mhilleadur an meid do bo rann d'Fheidlim Fhinn & do clainn mac Fheidhlim do Chorca Achlann & do Thir Briuin & do 'n Leath Tuaith. Ocus clann Feidlime Fhind, .i. Aedh & Toirrdelbhach & Conn, do dhul ar coir in t-shluaigh & mac Domnaill, mic Toirrdhelbaigh Doill, mic Toirrdelbaigh Duinn h-Ui Concobuir, do marbadh leo ag Ros Comain.

U1487.28

h-Ua Ceallaigh, .i. Uilliam, mac Aedha, mic Briain h-Ui Ceallaigh, do ghabail a tús Foghmuir na bliadhna-sa lena braithribh fein, .i. le Mailechlainn & le Concobur & le Ceallach & le h-Emunn.

U1487.29

Aedh, mac Donnchaidh h-Ui Cheallaigh, do marbadh le clainn h-Ui Ceallaigh, .i. le clainn Uilliam, mic Aedha.

U1487.30

h-Ua Mailechlainn, .i. Laighnech, mac Cuirc


p.322

h-Ui Mailechlainn, do marbadh le Conn, mac Airt, mic Cuinn, mic Cormuic Ballaigh h-Ui Mailechlainn, in bliadhain-si.

U1487.31

{fol. A 101c}Feidhlim, mac Mic Maghnusa Meg Uidhir, .i. mac Cathail Oig, mic Cathail Moir mic Maghnusa, d'h-eg in bliadhain-si, la Sang Lúcas Suibiscel, feria 5. Ocus dob' fher brighmur, beogha, daenachtach, dercach in Feidhlím-sin.

U1487.32

Ingin Mathgamna h-Ui Briain, .i. ben h-Ui Lochlainn, d'elodh le h-Emund, mac Ricaird a Burc, i tús Fhoghmuir na bliadhna-sa.

U1487.33

Creach do denum do mac h-Ui Domnaill, .i. do Chonn, mac Aedha Ruaidh h-Ui Domnaill, la Sang Fronseis ar Shemus mac Pilib Meg Uidhir, a Cuil Meg Thighernain, ar osadh do ghabail eter Fheraibh Manach & Conaillaibh in trath-sin. Ocus coicer, no seiser, do muinntir mic h-Ui Domnaill do marbadh le muinntir Shemuis & nach rug Semus féin orra.

U1487.34

h-Ua Neill, .i. Conn, mac Enrí h-Ui Neill, do fhuaslughudh Neill, mic Sheaain Buidhe h-Ui Neill, o Níall, mac Toirrdelbaigh Ruaidh h-Ui Neill & a breith leis cum caislein clainni Seaain Buidhe a n-doigh co fuighedh an caisdel as. Ocus, o nach fuair, faslongport do denum d'h-Ua Neill & da braithribh & da galloglachaibh a timcell an caisdeil ó fheil Cros co cet fheil Muire d'Fhoghmur. Ocus foirm shidha do chengal atorra ar a fuighedh h-Ua Neill an caislen & an fhoirm do dul o cheile aris. Ocus clann Sheaain Buidhe & marcsluagh clainni Meg Mathgamna, .i. Glaisne & Briain, do dhennm creiche a ferand clainni Toirrdelbaigh na Mart h-Ui Neill, ar a rucadur da cet, no tri, bó leó & do marbadur daine.

U1487.35

Toirrdelbach, mac Feradhaigh, mic Duinn, mic Con Chonnacht Meg Uidhir & Ruaidhri, mac Goffradha, mic Domnaill Mic Gilla Ruaidh, do marbadh an bliadhain-si le


p.324

clainn Mic Domnaill Clainni Ceallaigh, .i. Gilla Padraig & Cormac.

U1487.36

Deínis Mac Gilla Coisgle, .i. airchinnech & bicair Airigh Brosca, d'h-eg in bliadhain-si.

U1487.37

Tadhg, mac Briain Mic Amlaim Mheg Uidhir, nech do bi ina persun a m-Bothaibh ar tús & ina bicair a Cill Lasair & Maire, ingen Rughraidhe, mic Ardgail Meg Mhathgamna, nech do bí ina mnai ag Brian, mac Pilib Meg Uidhir & Una, ingen Domnaill Bain h-Ui Raighilligh, in bean do bi ag Toirrdelbach, mac Pilib Meg Uidhir & Ferghal h-Ua Mael Padraig & Maghnus Buidhe, mac Maghnusa Buidhe, mic Cairbri & Maghnus Buidhe, mac Cathail Riabaigh, mic Duinn {fol. A 101d} Cathanaigh & Cathal, mac Ruaidhri Caich Meg Uidhir—omnes quieuerunt hoc anno.

U1487.38

Seaan, mac Conchobuir mic Aedhagain, .i. ollam breithemhan Mic Uillaim Clainni Ricaird, d'h-eg.

U1487.39

Cloch Locha h-Uachtair do ghabail in bliadhain-si le clainn Domnaill Bain h-Ui Raighilligh, .i. Ferghal & Emunn. Ocus Ferghal féin {fol. B 93b} d'h-eg in bliadhain-si in Satharn ria Nodlaig & a adlucadh a n-Druím Lethan.

U1487.40

h-Ua Neill, .i. Conn, do dhul ar creich a n-Oirghiallaibh ar Glaisne, mac Remuínn Meg Mathgamhna, la feil Sdeabhtain & in creach do breith leis & Art, mac Neill, mic Seaain Buidhe h-Ui Neill, do marbadh leis ann. Ocus cuid do galloglachaibh h-Ui Neill do marbadh ann um mac Eímhir Ballaigh Mic Somairle, .i. Dubgall & mac eili do Eímhir Ballach do ghabail ann, .i. Seínícin & mac Mic an Ghirr do marbadh ann, .i. Art.

U1487.41

Aedh, mac Briain, mic Ferghail Ruaidh h-Ui Uiginn, d'h-eg in bliadhain-si isin Foghmur.

U1487.42

Iarla Desmuman, .i. Sémas, mac Tomais, mic Semais, mic Geroid, mic


p.326

Muiris Iarla, do marbadh a feall a n-deredh na bliadhna-sa, ím trathaibh na Nodlaig, le Seann Manntach [gap: extent: one line] & Iarla do dhenum da derbrathair aile, .i. do Mhuiris. Ocus Seaan Manntach do thuitim a cetoir isin n-gnim-sin leisin Iarla Óg-sin, .i. le Muiris.

U1487.43

h-Ua Ceallaigh, .i. Uilliam, mac Aedha, mic Briain h-Ui Ceallaigh, d'h-eg ina laimdechus & da h-Ua Ceallaigh do denum a n-adhaigh a cheile in h-Uíbh Maine, .i. Mailechlainn, mac Aedha, mic Briain h-Ui Cellaigh & Donnchadh, mac Breasail, mic Donnchaidh h-Ui Ceallaigh.

U1487.44

Mac Goisdelbh d'h-eg in bliadhain-si, .i. Seaan.

U1487.45

An Dalatunach, .i. Emunn, mac Piaruis Dalatun, d'h-eg in bliadhain-si.

U1487.46

(Gearoid, mac Emuinn Gheancaigh Mic Oiribeart, do marbadh le Seaan, mac Semuis, mic Maeil Ir Mic Oiribeirt, a n-dighailt a athar & le dha mhac Mic Oiribeirt, .i. Maeil Ir & Emunn, .i. da mac Fhir Dorcha, mic Maeil Ir Mic Oiribeirt).