Kal. Ian. for Domnach l. xx. iii., Anno Domini M. cccc. lxxx. ui.
Art, mac Mic Domnaill Clainni Ceallaigh, .i. mac Cormaic, mic Airt Mic Domnaill, do marbadh a Cluain Eois a trodan do-righne se re cleircib la Nodlag beag (.i. le Semas, mhac Philib, mic in Comhorba Meg Mathgamna & le mac Donnchaidh Meg Mathgamna, .i. an Persun & le Gilla Padraig O Connalaigh, .i. an t-Abb).
Tuathal, mac Neill Carraigh, mic Muircertaigh Oig h-Ui Neill, do marbadh le Tomas, mac Aibhne h-Ui Cathain, isin Coill Ichtaraigh a n-diaigh Nodlaig.
Eogan, mac Ir Meg Radhnaill, do ghabail a feall le cuid do clainn Mael Ruanaigh Meg Raghnaill i n-diaigh Nodlaig.
Clann óg Emuind Meg Uidhir, .i. Aedh & Art Carrach & Pilib, do gabail le clainn {fol. B 92b} Toirrdelbaigh Meg Uidhir, .i. le Tadhg & le Pilib, 15 Kalendas Marcii, per dolum.
Crech mor le Brian, mac Remuind, mic Rughraidhe Meg Mathgamna, ar cloind Emuind, mic Thomais Oig Mheg Uidhir & ar Emund fein ar Cuil na n-Airther 7 Kalendas Marcii. Ocus Emunn Og, mac Emuinn Meg Uidhir, do mharbadh leo a n-Daire Chenainn & araile.
Clann Muiris, mic Mic Murchaidh an t-Shleibhe, .i. Domnall & Muiris & Feradhach, do marbadh a feall {fol. A 99d} le clainn Concobair, maic Mic Murchaidh, .i. le clainn derbrathar a n-athar, ina n-oirechtus fein & uilc imdha do thecht assin an bliadhain cetna.
Geroid, mac Iarla
Emunn, mac Tomais Greannaig, mic Duinn, mic Pilib na Tuaidhe Meg Uidhir, d'h-eg in bliadhain-si. Ocus a derbrathair aile-sin, .i. Eogan, mac Tomais Grennaigh & Maghnus, mac Mael Duin & Rughraidhe, mac Conchobuir, mic Duinn Mheg Uidhir, do marbadh ar baile a n-oirecht le Feidhlim, mac Donnchaidh Meg Uidhir, ar greathlaigh oidhce.
Prioir Maethla, .i. Ferghal, mac Raghnaill, mic Roiberd, mic an Priora Meg Raghnaill, d'h-eg in bliadhain-si la Casg.
Caitilin, ingen h-Ui Ferghail, .i. ingen Domnaill Buidhe, mic Dhomnaill, mic Seaain, mic Domnaill h-Ui Ferghail, .i. bean Mic Maghnusa Meg Uidhir, .i. ben Cathail Oig, mic Cathail Moir, hoc anno, 7 Idus Maii, quieuit.
Remunn, mac Glaisne Meg Mathgamna, do dul ar Galltacht Machaire Oirghiall & eich & daine do buain de & Fer Dorcha Magormain do marbadh uime, a tus an t-Shamhraigh.
Brian, mac Rughraidhe, mic Ardghail Meg Mathgamna (.i. tigherna Dartraighe), do marbadh le Gallaibh Machaire Oirghiall 8 Idus Iunii.
Donnchadh, mac Tomais, mic Ferghail Meg Samhradhain, .i. tanusti Teallaigh Eathach, d'h-eg i Samradh na bliadhna-sa.
Mac Diarmada Muighi Luirg, .i. Ruaidhri, mac Ruaidhri Caich, d'h-eg.
Maileachlainn Og Mac Caba do dhul le clainn h-Ui Ruairc, .i. le clainn Tighernain, mic Taidhg, mic Tighernain h-Ui Ruairc, .i. Tighernan & Brian Ruadh, do cumnadh le clainn Ir Meg Raghnaill a n-aghaidh clainni Mhailechlainn
Mag Raghnaill, taisech Muinntiri h-Eoluis, .i. Tadhg, mac Cathail, mic Cathail Ruaidh Meg Raghnaill, obiit 17 Kalendas Aprilis.
Caibidil coitchinn i n-Droichid Ata ag airdespuc Arda Macha, {fol. A 100a} .i. Octauianus Italícus & ag espucaibh & ag cleirchib Thuaisceirt Erenn, 5 Idus Iulii. Domnall h-Ua Fallamhain, .i. Brathair Minur de Obseruancia & senmontaigh as mo do-rinne d'fhoghnumh do Erennchaibh o do bi Padraig i n-Erinn, do beth ar in Caibidil-sin ag solathar a litreach d'fhuaslughudh ar espucoid Daire & si arna gnothughudh chuige in tan-sin o Roim.
Ocht m-baile fiched do Galldacht Machaire Oirgiall do losgadh le Mag Mathgamna, .i. le h-Aedh Og, mac Aedha Ruaidh, mic Rughraidhe, in Estate huius anni.
Mailechlainn & Ruaidhri, da mac Mic Donnchaidh Tire h-Oilella, do marbadh le clainn Domnaill Caim, mic Mic Donnchaidh.
Seaan Buidhe, mac Eogain, mic Neill Óig h-Ui Neill, mortuus est hoc anno, circa festum beati Patricii.
Domnall Og Mac Cartain, .i. fer
Art Ruadh, mac Gilla Padraig, mic Emuínn Meg Uidhir, do marbadh d'urchur do saighidh le clainn Toirrdhealbaigh, mic Pilib Meg Uidhir.
Caisdel Beil Fersdi do ghabail le Feidhlím, mac mic h-Uí Neill Buidhe & le mac an t-Shabhaisigh, .i. Roiberd, mac Seínicin Sabhais & le cloinn Neill Gallda, mic Briain Ballaigh, ar bardaibh Briain, mic Aeda Buidhe, mic Briain Ballaigh, in Estate.
Aedh, mac Neill, mic Aedha, mic Eogain h-Ui Neill, hoc anno quieuit.
Emunn Og, mac Emuinn, mic Con Uladh h-Ui Neill & Cormac, mac Airt Charraigh, mic Mailechlainn h-Ui Neill, do marbadh in principio Estatis.
Eogan, mac Ir Meg Radhnaill, do elogh asa laimdechus.
Clann Meg Uidhir, .i. clann Emuinn, .i. Aedh & Art Carrach, do fhuaslugadh an Luan a n-diaigh Samna. Ocus Mag Uidhir, .i. a n-athair, do legan a tighernuis de an la cetna-sin cum Seaain, mic Pilib Meg Uidhir (.i. a n-Inis Finnrach do-ronad sin.)
Gilla na Naem, mac Iriail h-Ui Ferghail, do gabail leis O Fergail, .i. le Rughraidhe, mac Cathail h-Ui Fherghail & a thabairt do 'n Iarla, .i. do Geroid, mac Tomais Iarla, .i. Iarla Cille Dara.
Donn, mac Emuinn, mic Tomais Oig Meg Uidhir, do marbadh a fell a n-dorus reilgi Achaidh Urchaire le cloinn Tómais Oig {fol. A 100b} Meg Uidhir, .i. Tomas & Conchobur & Ruaidhri & le clainn Flaithbertaigh, mic Tomais Oig, .i. Gilla Padraig & Cu Connacht & Brian Crosach, Kalendis Septimbris, luna 4.
Mac Padraig Cursa do ég.
An Barrach Mor do marbadh le mac mic Donnchaidh Meg Carrthaigh, .i. cenn fine do Clainn Carrthaigh.
Ubla imdha a n-garrgadaibh & a coilltibh in bliadhain-si.
h-Ua Concobuir do denum i Connachtaibh in bliadhain-si le Mac Uilliam Burc & lena rainn fein i Connachtaibh do Aedh, mac Aedha, mic Toirrdelbaigh Oig, mic Aedha, mic Toirrdhelbaigh, mic Aedha, mic Eogain.
{fol. B 92c}Sgainner crodha ider h-Ua n-Domnaill, .i. Aedh Ruadh, mac Neill Gairbh & Mac Uilliam Ichtarach fa bel atha Áird na Riadh i Connachtaibh, Nonas-is Septimbris, in ro marbadh tuillodh ar ched do muinntir Mic Uilliam Burc & in ro gabadh Seaan, mac Mic Shiurtain & Uilleag, mac Risderd, mic Thomais a Burc et alii multi.
Eogan, mac Lochlainn, mic Taidhg h-Ui Ruairc, obiit iii. Idus Septimbris.
Sgainnear ider Teallach Eathach fein, in ro marbadh Feidhlim, mac Ferghail Meg Shamhradhain.
Mairsil, ingen t-Seaain, mic Domnaill, mic Sheaain, mic Domhnaill h-Ui Fherghail, .i. bean Concobuir, mic Glaisne h-Ui Raighilligh, do bathadh, no do mhuchadh, i n-Ath na Boirne: gidh b' e adhbur, no gidh b' e do-righne.
Rughraidhe, mac Iriail h-Ui Fherghail, do ghabhail le Brian Buidhe, mac h-Ui Fherghail, .i. le mac Rughraidhe, mic Cathail h-Ui Fherghail, isin Fhoghmhar.
h-Ua Neill, .i. Conn, mac Enri, mic Eogaín h-Ui Neill, do dhul, sluadh, ar Machaire Oirghiall & millte mora & loisgthe imdha do dhenam ann leis roim Samhuin.
Pilib, mac in Comorba Meg Mathgamhna, .i. mac Semuis, mic Rugraidhe, mic Ardghail Meg Mathgamna, .i. in t-e do bi ina chananach coradh a Clochur & ina comorba Tigernaigh i Cluain Eois & ina persun a n-Dartraighi & ag a roibhe d'urmhor cethramna espuic Oirghiall uile &
Geroid, mac Fherghail, mic Sheaain Ui Raighilligh, do marbadh le clainn Maghnusa, {fol. A 100c} mic Aedha Ruaidh Meg Mathgamna & le cuid do mhuinntir Baruin Slainge, gairid roim Nodluig, a Cloinn an Chaich h-Ui Raighilligh.
Tacha mor shalainn in bliadhain-si & in bliadhain eile-si romainn i n-Erinn, innus gur' ceannchadh co méiníc in carta salaind ar bonn isin Midhe & co rabadur lucht magaidh ag denum a marbhnaide, ar son nach faghbhaidhthea re n-a chennach h-é.
Mag Raghnaill do ghairm in bliadhain-si do Conchobur, mac Murchaidh Meg Raghnaill, do shlicht Mailechlainn.
Mac Domnaill, .i. consabul galloglach h-Ui Neill, do dhenum do Raghnall, mac Eoin, mic Donnchaidh Doichligh Mic Domnaill, in bliadhain-si.
Dairsi mor ar caiplibh in bliadhain-si a Coiced Uladh & in bliadhain eile-si romainn, innus gur' cennchedh co meinic colpach capuill ar loilghich & ar bhiraich.
Tigernus Dartraighi & h-í féin do thabairt do chlainn Eogain, mic Rughraidhe Meg Mathgamna, in hoc anno.
Mainistir Brathar Mínur do Obseruancia do thinnsgnadh in bliadhain-si le mac Sar Edbard Iustas, .i. le Rolan, ar bord abann Liffe.
In Dalatunach, .i. Emunn, mac Piarais Dalatun, do legan a tighernuis de cum a mic fein, .i. cum Tomais Dalatun, in bliadhain-si.
(Hic natus est Magonius, filius Caroli Iuuenis, 18 die Augusti, feria 6.)