Kal. Ian. uii. f., l. x. ii., Anno Domini M. cccc. lxxx. u.
Aedh Og, mac Aedha Ruaidh, mic Rughraidhe, mic Ardghail Meg Mhathgamna, do righadh ar Oirghiallaibh an bliadhain-si.
Baile Chon Uladh, mic Aedha h-Uí Neill, do loscadh le Brian, mac Eogan h-Ui Neill, .i. Brian na Coilledh, in bliadhain-si. Baile & ferann in Briain cetna-sin do loscadh an la arna mharach leisin Coin Uladh cetna-sin & le cloind Remuind, mic Rughraidhe Meg Mhathgamna, .i. Glaisne & Brian & le mac Meg Mathgamna Oig-sin, .i. le Gilla Patraig. Ocus Cu Uladh Mac Cernaighi do marbadh leo ann, .i. duine maith oirecht & araile.
Aedh Óg, mac Aedha Buidhe, mic Briain Ballaigh h-Ui Neill, do dul ar creich a Leith Cathail & breith air ann & a marbadh d'en urchur do gha: .i. macamh dob' ferr einech & cennus-fedhna do bí ar Trian Conghail in tan-sin.
Olíuer, mac Cristoir Pluíngced, d'eg an bliadhain-si.
Slicht Mhail Mordha in Mhullaigh ar innarbad asa n-duthaidh fein & clann Glaisne h-Ui Raighilligh ar n-denam caislein ina ferann. Ocus arna suighiughudh orra, iad san do tharraing Iarla Cille Dara, .i. Geroid, mac Tomais Iarla, ar cloinn Glaisne & cuíg buailte deg bo do buain dib a creich & Gilla Isa, mac Glaisne, do ghabail ann.
Mac Uilliam Clainni Ricaird, .i. Uilliug, in bona senectute quieuit & a mac, .i. Uilliug eile, do oirdnedh ina inadh & in t-Uilliug Óg sin do dhul, sluagh, isin Mumain & cuid do Crich Roidsech do loscadh leis.
h-Ua Conchobuir Ciaraidhe & a bean & h-Ua Conchobuir Corcu Mruadh & h-Ua Concobuir Dond, .i. Eogan Caech, mac Feidlime Geangcaigh, mic Toirrdhealbaigh Oig, mic Aedha, mic Toirrdhelbaigh, mic Aedha, mic Eogain; an {fol. A 99a} Barrach
Brathair Minur a Crich Cuirsech isin Mumain, .i. Emunn Cursa & dochtuir annsa diaghacht e do dhul a seilbh espucoide Clochair an bliadhain-si, acht nach tangadur a litrecha o Roim chuigi an tan-sa.
Cogadh mor eter h-Ua Neill, .i. Conn & h-Ua n-Domnaill, .i. Aedh Ruadh & acland Airt h-Ui Neill, .i. Niall & a braithre, do thaebh Ui Domnaill & clann Nechtain h-Ui Domnaill, .i. Eignechan & a braithre, do thaebh h-Ui Neill, ar an cogadh-sin.
Dias, no triur, do muinntir Eogain, mic Briain Carraigh h-Ui Neill, do marbadh do cair theinedh. An t-Eogan-sin, mac Briain, .i. duine maith oirecht do muinntir h-Uí Neill do shlonnadh ar snechta ag dul o bhaile h-Ui Neill cum a tighi fein & a eg dhe.
h-Ua Baighill, .i. Toirrdelbhach, do chur a tighernuis de an bliadhain-si & a mac, .i. Níall, do gabail a inaidh.
Feidhlim, mac Glaisne, mic Concobuir h-Ui Raighilligh, a n-diaigh fheil na Croichi isin Foghmur mortuus est do 'n plaidh.
h-Ua Raighilligh, .i.
Toirrdelbach, mac Seaain, mic Eogain, do dhul, sluagh
mor, a Teallach Eatach in Mairt roim fheil Mícheil & baile Meg Shamradhain do loscadh leis, .i. baile Feilim, mic Tomais, mic Ferghail & baile a derbrathar do loscadh leis, .i. Donnchaidh. Mag
An Peitidech, .i. Seonin Peitid & a mac, .i. Geroid, d'h-eg in bliadhain-si.
An Cosnaidhe, mac Aedha, mic Neill h-Ui Mael Muaidh, do dhenum creiche ar Émund Peitid & impodh do ar in toraidh & a n-gar do fichit {fol. A 99b} do marbadh di leis, .i. Ainntriu, mac an Gilla Ghuirm Duid & dias marcach da muinntir & Semus, mac Con Connacht, mic Espuic Concobuir h-Ui Ferghail et alii multi.
Conn, mac mic Seaain, mic Domnaill, mic Seaain, mic Domnaill, h-Ui Fherghail, do lot gu guasachtach ina crob deas an Satarn a n-diaigh fheil na Croiche 'san Fogmur (le clainn Cathail, mic Eogain, mic Seaain h-Ui Raighilligh, .i. Eogan Ruadh & Pilib & la Aedh h-Ua Raighilligh & mac h-Ui Ferghail).
Mac Domnaill, .i. Consabul (no, Consal) galloglach h-Ui Neill, .i. Colla Mac Domnaill, d'h-eg in bliadhain-si, uel anno precedente.
Clann og Emuind Meg Uidhir, .i. Aedh & Art & Gilla Isu & clann Toirrdealbaigh Meg Uidhir, .i. Tadhg & Pilib & an Gilla Dub, do dhenam creiche ar Domhnall, mac Gilla Padraig, mic Emuinn Meg Uidhir, in Mairt roim fheil Michil.
Ocus Domnall fein do marbadh a toraidhecht na creiche le Maelechlainn Mac Geibinnaigh d'en sathadh do sgin. Ocus Maelechlainn fein do marbadh ar in lathair cetna. Mag
h-Ua Neill, .i. Conn, mac Enri, do dhul, sluagh mor, a Tir Conaill tareis fheile Michil & dighbhala mora do dhenum a Tir Aedha leis & baile Mic an Baird (.i. Aedh) do loscadh le Raghnall Mac Domnaill, .i. cenn-feadhna galloglach do muinntir h-Ui Neill an Raghnall sin. Ocus sith do denam do h-Ua Neill & do h-Ua Domnaill re cheile an trath-sin. Ocus Brian Dorcha, mac Eogain h-Ui Again, do marbadh le Níall, mac Airt h-Uí Neill, do 'n dul-sin.
Feidhlim, mac Donnchaidh Meg Uidhir, do lot & do gabail & Donnchadh Og, a brathair, mur an cetna, le Mac Gilla Ruaidh (.i. Brian) & le da mac Emuinn Meg Uidhir, .i. Aedh & Gilla Isu. Ocus Gilla Padraig, mac Maghnusa, mic Domnaill Aird h-Ui Mailigein & Cathal Buidhe, mac Aedha Citaigh, h-Ua Timaín do marbadh ann leó. Mac Seaain Mic Gilla Ruaidh (.i. Gilla Padraig) do marbadh 'na diaigh-sin ar greis oidhci leisin Feidhlím-sin, mac Donnchaidh & le Muinntir Maelagain & le Muínntir Timain & araile.
Mac h-Ui Concobuir Fhailghi, .i. Art, mac Cuinn, mic an Calbaigh, nech do n-goirthi Art an Bogain, do marbadh lena derbrathair fein d'en urchur do gha, .i. leis h-Ua Concobuir, .i. le Cathair, mac Cuinn
Ri Saxan, .i. Cing Risderd, do marbadh a cath & 5 cet deg do marbadh isin cath-sin, & ri do dhenamh do mac Breatnaigh, neoch le tucadh in cath & nar' mhair ar slicht na fola righ in tan-sin acht en macamh og, neoch tainig ar innarbadh in bliadhain ar cinn a n-Erinn. Ocus a tosach an Fhoghmuir tucadh in cath-sin.
Remunn, mac Glaisne, mic Remuinn Meg Mathgamna, do dhul ar Galltacht Machaire Oirghiall gairid roim Nodluig & mac do 'n Taa, .i. Seon Taa, do mharbadh leis & Conn, mac Maghnais h-Ui Connalaigh & mac Cormaic h-Ui Connalaigh & mac mic Ardghail do marbadh uime & a 4, no a 5, xx.it d'eachaibh do buain de fein & da muinntir. Ocus Cathair, mac Iriail, mic Philib, mic Eogain, mic Semuis & mac Eachadha Moir Meg Mathgamna do ghabail ann & Eogan d'elogh a n-diaigh Nodlaig.
Brian h-Ua h-Uid, .i. fer dana righmiadhach do Trian Conghail, do marbadh in bliadhain-si le mac Mic Eogain, .i. le Seaan, mac Eogain Mic Eogain.
Mac Oliuer Pluingced do marbadh le mac Risderd Pluingced eter da Nodluig.
(Gilla Padraig h-Ua h-Uiginn, .i. mac Briain, mic Maileachloinn h-Uí Uigind, .i. saidh dana & fer tighe n-aidheadh gu coitcheann do threnaibh & do throgaibh, a eg um fheil Michil an bliadhain-si, ar m-breith buadha o
(Hic natus est Connactius, filius Caroli Iuuenis, 5 Kalendas Februarii, feria 6.)