Kal. Ian. iii. f., l.ix., Anno Domini M. cccc. lxxx. ii.
Conn, mac Aedha Buidhe h-Ui Neill, d'h-eg in bliadhain-si, .i. sai cinn-fedhna & cenn cosanta & cogaidh an Coicidh & feichemh coitcenn do chliaraibh Erenn & Alban, a eg iar m-buaidh aithrighe.
Murchadh, mac Taidhg Meg Raghnaill (.i. Mac Raghnaill), do marbadh d'en urcur soighdi.
Enri, mac Con Uladh, mic Aedha, mic Eogain h-Ui Neill, do marbadh le Gallaibh in Estate.
Art, mac Donnchaidh Meg Uidhir, d'eg 'sa bliadhain-si.
Mael Mordha, mac Cathail h-Ui Raighilligh, do marbadh le clainn Aedha h-Ui Raighilligh in bliadhain-si, .i. fer einigh & eghnuma & sai cinn-fhedhna gan uiresbaidh. Ocus clann Aedha h-Ui Raighilligh do thocht astir aris ar sith. Ocus clann Cathail d'innsoighidh orra & tech do gabail orra & da mac Aedha (.i. Feilim & Cathal) do marbadh & da mac Fheilim, {fol. B 91b} mic Aedha & moran do maithib a muinntire faru.
Brian, mac Feilim, mic Eogain, mic Neill Oig h-Ui Neill, do marbadh in bliadhain-si le h-Eogan, mac Cuinn, mic Aedha Buidhe h-Ui Neill & le slicht Enri Aimreidh: .i. sai cinn-fhedna & nech dob' ferr einech & eghnum & is mo ro cennaig duain & is mo do-righne do crechaibh coicrich do bí ina aimsir in Brian-sin. Ocus bennacht
{fol. A 98a}Croch naemh mirbuilech do thogbail chind in bliadhain-si ar bord locha a m-Baile in Chuilind & ferta & mirbuileadha mora do denamh dhi.
Donnchadh, mac Donnchaidh, mic Aedha Meg Uidhir, an fer le' r' marbadh Toirrdealbach, mac Pilib Meg Uidhir, a feall, do marbadh d'en urchur saighdi.
h-Ua Mael Chonaire d'h-egh an bliadhain-si, .i. Urard, .i. sai i cleircecht & i fhilidhecht & i senchus.
Gilla Crisd O Fiaich, bicair Airigh Brosca, d'h-eg an bliadhain-si: .i. sai clerich & fer tighe aidheadh re h-aimsir fada, .i. per xl. annos, go h-imshlan (Obiit, scilicet, x. Kalendas Maii).
(Hoc anno in Estate natus est Cormacus, filius Caroli Iuuenis.)
(Maileachlainn, mac Briain, mic Emuinn, mic Tomais h-Ui Fergail, do marbadh le Uilliam Garbh, mac Muiris, mic mic Phiaruis Dalatun, mí re Nodluig, feria 5 & le Laiseach, mac Seaain h-Ui Ferghail, scilicet A. D. 1482).