{fol. B 91a} Kal. Ian. ii. f., l. xx. uii., Anno Domini M. cccc. lxxx. i.
Brian, mac Feilim h-Ui Raighilligh, d'h-eg in bliadhain-si: .i. cenn damh & deoradh & nech ro bo mo aithne & einech & tech n-aidhedh do bí ina aimsir fein, a eg iar m-buaidh Ongtha & aithrighe.
Toirrdelbach, mac Pilib, mic Tomais Meg Uidhir, do marbadh in bliadhain-si (scilicet, in crastino Sancti Francisci, scilicet, 3 Nonas Octobris), a feall ina caislen fein, le Donnchadh Og, mac Donnchaidh, mic Aedha Meg Uidhir: .i. mac uirrigh rob' ferr einech & cennus-feadhna & rob' ferr aithne ar gach eladhain & ro bo mo tucsi & is mo ro chennaig do dhan do bi i n-Erinn ina aimsir fein in Toirrdelbach-sin. Ocus fa bronach eigsi & ollamain Erenn uile ina diaigh. Ocus a adlucadh a Mainistir Duin na n-Gall iar togha do innti.
h-Ua h-Anluain do marbadh in bliadhain-si le clainn Aedha h-Ui Neill: .i. Feidhlim h-Ua h-Anluain, .i. sai cinn-fhedhna.
Mac Con Midhe d'eg, .i. Concobur Ruadh, .i. sai fhir dana & fhogluinntigh & oide.
Mac an t-Shabhaisigh do gabail le Conn, mac Aedha Buidhe, .i. Patraig Sabhais & a dhalladh & a sbochadh annsa laim-sin.
Cathair Caemanach, .i. mac Mic Murchadha, do marbadh leisin Cundae Riabaigh.
Slaine, ingen h-Ui Briain, .i. ben Mic Uilliam Clainni Ricaird .i. feichem coitcenn do damaib Erenn & Alban & ben dob' ferr derc & daenacht do bi ina h-aimsir a h-eg iar m-breith buadha o doman & o dheman.
Conn, mac h-Ui Neill (.i. Enri), do gabail le Clainn Aedha Buidhe h-Ui Neill in bliadhain-si & a tabairt illaim h-Ui Domnaill.
Cu Connacht mac Seaain, mic Con Connacht Meg Uidhir, obiit 7 Idus Iannarii.
Feidhlim, mac Duinn, mic Con Connacht, mic Pilib na Tuaidhe, mic Aedha Ruaidh Meg Uidhir, d'h-eg in bliadhain-si im fheil Cros.
Gilla Patraig Ruadh, mac Uilliam, mic in
Cormac, mac an Abaidh Meg Uidhir, .i. mac Tomais, mic Muiris airchideachain, d'eg in bliadhain-si.
Mael Mithigh h-Ua Caiside d'eg in bliadhain-si.
Semus, mac Maeil Ir Mic Oiribeart, do marbadh le Geroid, mac Emuinn Gheancaigh Mic Oiribeart, a fheall in bliadhain-si.