Corpus of Electronic Texts Edition
Annals of Ulster otherwise Annala Senait, Annals of Senat (Author: [unknown])

Year U1481

U1481.0

{fol. B 91a} Kal. Ian. ii. f., l. xx. uii., Anno Domini M. cccc. lxxx. i.

U1481.1

Brian, mac Feilim h-Ui Raighilligh, d'h-eg in bliadhain-si: .i. cenn damh & deoradh & nech ro bo mo aithne & einech & tech n-aidhedh do bí ina aimsir fein, a eg iar m-buaidh Ongtha & aithrighe.

U1481.2

Toirrdelbach, mac Pilib, mic Tomais Meg Uidhir, do marbadh in bliadhain-si (scilicet, in crastino Sancti Francisci, scilicet, 3 Nonas Octobris), a feall ina caislen fein, le Donnchadh Og, mac Donnchaidh, mic Aedha Meg Uidhir: .i. mac uirrigh rob' ferr einech & cennus-feadhna & rob' ferr aithne ar gach eladhain & ro bo mo tucsi & is mo ro chennaig do dhan do bi i n-Erinn ina aimsir fein in Toirrdelbach-sin. Ocus fa bronach eigsi & ollamain Erenn uile ina diaigh. Ocus a adlucadh a Mainistir Duin na n-Gall iar togha do innti.

U1481.3

p.276

Cogadh mor d'eirghi in bliadhain-si a Tir Eogain eter h-Ua Neill & Seaan Buidhe h-Ua Neill. Ocus clann Airt h-Ui Neill & clann Fheilim h-Ui Neill do beth in aghaidh h-Ui Neill ar in cogadh-sin. Ocus clann Airt do denum creichi ar clainn h-Ui Neill & clann h-Ui Neill do denum creichi, no a do, ar Sheaan m-Buidhe. Ocus clann Sheaain da lenmuin {fol. A 97d} & Aedh, mac Cathail, mic Feilimidh h-Ui Concobuir, do marbadh duibh & mac Gilla Patraig Mic Cathmail & daine aili nach airimter sunn.

U1481.4

h-Ua h-Anluain do marbadh in bliadhain-si le clainn Aedha h-Ui Neill: .i. Feidhlim h-Ua h-Anluain, .i. sai cinn-fhedhna.

U1481.5

Mac Con Midhe d'eg, .i. Concobur Ruadh, .i. sai fhir dana & fhogluinntigh & oide.

U1481.6

Mac an t-Shabhaisigh do gabail le Conn, mac Aedha Buidhe, .i. Patraig Sabhais & a dhalladh & a sbochadh annsa laim-sin.

U1481.7

Cathair Caemanach, .i. mac Mic Murchadha, do marbadh leisin Cundae Riabaigh.

U1481.8

Slaine, ingen h-Ui Briain, .i. ben Mic Uilliam Clainni Ricaird .i. feichem coitcenn do damaib Erenn & Alban & ben dob' ferr derc & daenacht do bi ina h-aimsir — a h-eg iar m-breith buadha o doman & o dheman.

U1481.9

Conn, mac h-Ui Neill (.i. Enri), do gabail le Clainn Aedha Buidhe h-Ui Neill in bliadhain-si & a tabairt illaim h-Ui Domnaill.

U1481.10

Cu Connacht mac Seaain, mic Con Connacht Meg Uidhir, obiit 7 Idus Iannarii.

U1481.11

Feidhlim, mac Duinn, mic Con Connacht, mic Pilib na Tuaidhe, mic Aedha Ruaidh Meg Uidhir, d'h-eg in bliadhain-si im fheil Cros.

U1481.12

Gilla Patraig Ruadh, mac Uilliam, mic in

p.278

Deganaigh Mail (.i. Domnall) h-Ui Eogain, d'h-eg in bliadhain-si 3 Idus Ianuarii.

U1481.13

Cormac, mac an Abaidh Meg Uidhir, .i. mac Tomais, mic Muiris airchideachain, d'eg in bliadhain-si.

U1481.14

Mael Mithigh h-Ua Caiside d'eg in bliadhain-si.

U1481.15

Semus, mac Maeil Ir Mic Oiribeart, do marbadh le Geroid, mac Emuinn Gheancaigh Mic Oiribeart, a fheall in bliadhain-si.