{fol. A 97b} Kal. Ian. uii. f., l. x. ui., Anno Domini M. cccc. lxxx.
Mag Uidhir d'eg in bliadhain-si, .i. Tomas Og, mac Tomais Moir, mic Pilib, mic Aedha Ruaidh: .i. fer do bo mo deirc & crabadh & eineach do bi ina aimsir fein & fer do cosain a crich ar a comarsannaibh & fer do cumdaigh tempaill & mainistrecha & coiligh-aiffrind & do bi 'sa Roim ag a oilithri & fo dho a Cathair Sang Sem. Ocus fa lan Eire & Alba do clu in Tomais-sin. Ocus a adhlucadh a Mainistir an Cabain, ar toga do innti.
Mac Maghnusa Meg Uidhir d'eg an bliadhain-si, .i. Cathal Og, mac Cathail Moir, mic Gilla Patraig (.i. an Gilla Buidhe) Mic Maghnusa, .i. brughaidh dob' ferr do bi a n-Erinn ina aimsir fein. Ocus fa lan {fol. B 90d} Eire & Alba do clu an
Magnus Ruadh h-Ua Domnaill do mharbadh le clainn Feilimidh Riabhaigh h-Ui Domnaill.
h-Ua Neill do dhul ar innsoighidh a Tir Conaill & loiscthi mora & dighbala imdha do (no, leis).
h-Ua Domnaill do dhul ar innsoighidh a Cinel Feradhaigh & clann Airt h-Ui Neill & clann Fheilim h-Ui Neill ina fharradh. Ocus creacha mora do dhenum doibh ar Mac Cathmail. Brian, mac Toirrdelbaigh Rúaidh, maic h-Ui Neill (.i. Enri), do marbadh leo & mac Mic Cathmail, .i. Semas Mac Cathmhail, do marbadh leo. Ocus cuid do chlainn h-Ui Neill & Mac Cathmhail da leanmhain & Eogan, mac Neill, mic Airt h-Ui Neill, do marbadh leo, .i. sai cinn-fedhna & araile.
Remonn Riabhach, mac Duinn, mic Con Connacht Meg Uidhir, d'eg in bliadhain-si, .i. ferr beogha, daenachtach, Kalendis Augusti.
Mac Gilli Fhinnein d'eg in bliadhain-si (scilicet 10 Kalendas Marcii), .i. Tadhg, mac Briain Mic Gilli Finnein: .i. taisech ro bo beodha & rob' fherr tech n-aidhedh ina comfhogus.
Eogan h-Ua Domnaill do marbadh le clainn Nechtain h-Ui Domnaill a Cluain Laegh in bliadhain-si, & Eogan Caech, mac Maghnusa h-Ui Concobhair, do marbadh faris ann & mac Toirrdelbaigh Carraigh h-Ui Concobuir do gabail ann. Rughraidhe, mac Rughraidhi, mic Nechtain h-Ui Domnaill, do marbadh le clainn Neill h-Ui Domnaill ar an cogadh cetna.
h-Ua Domnaill do gabail coinne re clainn Nechtain & re Conn h-Ua Neill fa caislen na Finne & sith do dhenum doib re cheile & tanustecht Tire Conaill do tabairt d'Eigneachan h-Ua Domnaill.
Cormac, mac mic Airt Cuile Meg Uidhir, d'eg in bliadhain-si.
Pilib Riabhach
Art, mac Rughraidhe Meg Mathgamna, do marbadh ar deredh creichi (oidhce) do-rinne fein isna Fedaibh, .i. a ferann Con Uladh, mic Aedha h-Ui Neill.
Cogadh mor an bliadhain-si eter clainn Aedha Ruaidh Meg Mathgamna & clainn Remuinn Meg Mathgamna & crecha mora do denum ar clainn Remainn & a c-cur isin m-Breifne i cenn h-Ui Raighilligh.
Fergal Mac Eochadha d'eg, .i. sai fhir dana.
{fol. A 97c}h-Ua h-Eogusa d'eg in bliadhain-si, .i. Aenghus, mac Seaain h-Ui Eoghusa, .i. sai fhir dana & foglainnti & fhir liubair & araile.
Cumusc crodha eter clainn Emaind a Burc & clainn Ricaird a Burc & brisedh do cur ar clainn Emuinn & mac Mic Dubgaill na h-Alban do marbadh ann d'en urchur saighde, .i. Colla, mac Mic Dubgaill. Ocus Daibith Mac in Oirchinnigh & daine maithi aili do marbadh ann.
Seaan Mac Gilla Fhinnein, .i. mac Briain Mic Gilla Fhinnein & tri fir deg do muinntir clainni Briain, mic Pilib Meg Uidhir, do marbadh ag Bealach h-Ui Mithighen le clainn h-Ui Ruairc, .i. clann Tighernain, mic Taidhg, mic Tighernain h-Ui Ruairc, .i. le Tighernan & le Brian Ruadh, ii. Kalendas Marcii.
Sorcha, ingen Con Connacht, mic Donnchaidh Meg Mathgamna, .i. ben taisigh Muinntiri Peodachain, .i. ben Toirrdelbaigh, mic Briain Mic Gilli Fhinnen, obiit 6 Kalendas Augusti.
Mag Bhradaigh, .i. Toirrdhealbhach Ruadh, mac Cormaic, mic Donnchaidh Mheg Bradaigh, d'eg in bliadhain-si.