Corpus of Electronic Texts Edition
Annals of Ulster otherwise Annala Senait, Annals of Senat (Author: [unknown])

Year U1479

U1479.0

Kal. Ian. ui. f., l. u., Anno Domini M. cccc. lxx. ix.

U1479.1

Cogadh mor eter h-Ua Neill & h-Ua n-Domnaill in bliadhain-si & clann Airt h-Ui Neill do dhul a Tir Conaill do cogadh ar h-Ua Neill & dighbala mora do denamh atorra. h-Ua Neill do dul ar innsoighidh a Tir Conaill & creacha mora do thabairt leis o Conallaibh & o clainn Airt do 'n turus-sin.

U1479.2

Aiffric, ingen Emaínn, mic Tomais Meg Uidhir, d'h-eg, .i. ben Cairpri, mic Aedha h-Ui Neill: .i. sai mhna gan uiresbaidh.

U1479.3

Brian, mac Feilim h-Ui Neill, do ghabail leis h-Ua Neill (.i. Enri) in bliadhain-si, & a legan amach aris & fuasluicthi mora do buain as & a dias mac do braigdib tairisi fos. Ocus Brian do dul a cenn h-Ui Domnaill do cocadh ar h-Ua Neill aris.

U1479.4

Piarus, mac Nicolais h-Ui Fhlannagain — neoch do bi ina chananach choradh i Clochair, ina persun & ina prioir Cheilé n-De & ina shacrisda i n-Daimh Inis & ina oífficel ar Loch Eirne — d'h-eg in bliadhain-si — .i. macamh subaltach, daennachtach, deigheiníg & sai cleirigh — ar m-breith buadha o domain & o dhemhon & araile.


p.268

U1479.5

Finnghuala, ingen in Airchideochain (.i. Emonn, mac in Espuic) Meg Uidhir, .i. ben Domnaill, mic Conchobair h-Ui Breislen, d'h-eg 9 Kalendas Marcii.

U1479.6

Eoin Bocht h-Ua Carmuic d'h-eg Kalendis Nouembris.

U1479.7

Matha h-Ua Mail Ruanaigh d'eg in bliadhain-si, .i. ollam cerda Meg Uidhir — .i. Tomais Oíg, mic Tomais Moir — & fer tighi aidhedh co coitcinn in Matha-sin & sai oircerda fos & araile.

U1479.8

Ricard, mac Emuinn A Burc, .i. Mac Uilliam Ichtarach, do marbadh d'easgar in bliadhain-si A. D. 1479.

U1479.9

Hic natus est Eduardus, filius Caroli Iuuenis, in festo Sancti Patricii.